ބްރިޖާއި 25 ބުރީގެ އިމާރާތް ނެތަސް ދެ އަހަރު ކުރި މަސައްކަތް ގިނަ!

މާލޭގައި އުޅޭ ގިނަ ބަޔަކަށް ތަރައްރީ ފެންނަނީ 25 ބުރި އިމާރާތުންނެވެ. ނުވަތަ ހުޅުމާލެ އަށް ދާން އޮތް ބްރިޖުންނެވެ. ހުޅުމާލޭގެ ދެ ވަނަ ފިޔަވަހި ވެސް މިސާލަކަށް ނަގައެވެ. އެއީ މިދިޔަ ސަރުކާރުން ކުރި މަސައްކަތުގެ ރަމްޒުތަކެވެ. ނަމަވެސް ރައްޔިތުން އެ ސަރުކާރަށް “އެފް” ރިޕޯޓެއް ދި ބޭރުކޮށްލީ އެ ތަންތަން ހަމަ ލޮލަށް ފެންނަން ހުއްޓައެވެ. މާލެ ތޮއްޖައްސައި “ކޮންކްރީޓް” ތަރައްގީ ގެނައި ނަމަވެސް ރައްޔިތުންނަށް މުހިންމުވީ ހައްގުތަކެވެ. އެ ތަންތަނާ މެދު ރައްޔިތުން ދެކެނީ ކޮރަޕްޝަންގެ ހާލިތަކެއްގެ ގޮތުގައެވެ. މި ސަރުކާރަށް ވެސް މި މަހުގެ 17 ވަނަ ދުވަހު ދެ އަހަރު ފުރޭނެއެވެ. ނަމަވެސް ޖުމްހޫރީ ދުވަސް ކަމަށް ވާތީ އިދިކޮޅު ފަރާތްތަކުން ވަނީ ސަރުކާރުގެ ދެ އަހަރަށް “އެފް” ރިޕޯޓް ދީފައެވެ. ނަމަވެސް ނަމަބަރުތަކުން ދައްކަނީ މުޅިން އެހެން މަންޒަރެކެވެ.

މި ސަރުކާރުން ކުރަމުން އަންނަ މަސައްކަތްތައް އާންމު މީހާ އަށް ނޭނގޭ ނުވަތަ އޮޅުން ފިލުވައި ނުދެވޭ ކަމަށް ބައެއް ފަރާތްތަކުން ދެކެއެވެ. ނަމަވެސް މަޝްރޫއުތަކުގެ އަދަދުތަކާއި އެ މަޝްރޫއުތަކުން ރައްޔިތުންނަށް ލިބެމުންދާ ފައިދާ ކުޑައެއް ނޫނެވެ. ބޯހިޔާ ވަހިކަމާއި ފެނާއި ނަރުދަމާ އާއި މަގު ހެދުމާއި ފަޅު ކޮނުމާއި ބަނދަރު ހެދުމާއި ކުޅިވަރު ކުޅޭނެ ތަންތަން ތަރައްގީކުރުމާއި ސިއްހީ ދާއިރާ ފުޅާކުރުމަށް ފާއިތުވި ދެ އަހަރުގެ ތެރޭގައި ވެސް އިންތިހާ އަށް ގިނަ މަޝްރޫއުތައް މި ސަރުކާރުން ހިންގިއެވެ. އަދި އަންނަނީ ހިންގަމުންނެވެ. އެ މަންޒަރުތައް ފަހަރުގައި މާލޭގައި ތިބޭ އިދިކޮޅު މީހުންނަށް ނުފެނުނަސް ރަށްރަށުގައި ވެސް އެފަދަ އެތައް މަޝްރޫއެއް އެބަ ކުރިއަށް ދެއެވެ. ކޮވިޑް-19ގެ ސަބަބުން ގައުމުގެ އިގްތިސާދު ހުއްޓުމަކަށް އައި ނަމަވެސް އޭގެ ތެރެއިން ގިނަ މަޝްއުތަކުގައި ބުރަކި ޖެހުމެއް ނެތެވެ.

advertisement

ތަފާސް ހިސާބުތަކަށް ބަލާއިރު މި ސަރުކާރު ވެރިކަމަށް އައި ފަހުން މިހާތަނަށް މާލެ އާއި ރާއްޖޭގެ އެކި ކަންކޮޅުތަކުގައި 372 މަޝްރޫއެއް ވަނީ ފަށާފައެވެ. އެތަނުން އެތައް މަޝްރޫއެއް ނިމި އަނެއް ބައި މަޝްރޫއު ކުރިއަށް އެބަ ދެއެވެ. ރަށްރަށުގައި އެކަނި ވެސް 180 އަށް ވުރެ ގިނަ މަޝްރޫއު ކުރިއަށް އެބަދެއެވެ. އަދި 122 މަޝްރޫއެއް ވަނީ ނިމިފައެވެ. ފެށުމުގެ މަގުމަތީގައި ވެސް އެތައް މަޝްރޫއެއް އެބަ އޮތެވެ. މީގެ ތެރޭގައި ފެނާއި ނަރުދަމާ ގާއިމުކުރުމާއި މަގުތައް ހެދުމާއި ސްކޫލްތަކުގެ ކްލާސްރޫމްތައް އިތުރުކުރުމާއި ބަނދަރު ހަދައި ފަޅުކޮނުމާއި މިހެން ގޮސް އެތައް ކަމެކެވެ. ސިއްހީ ދާއިރާ ތަރައްގީކުރުމުގެ ގޮތުން ރާއްޖޭގެ ފަސް ސަރަހައްދެއްގައި ޓާޝިއަރީ ހޮސްޕިޓަލް ތަރައްގީކުރުމަށް އިއުލާނުކޮށްފައިވާ އިރު މަސައްކަތްތައް ވަނީ ފެށިފައެވެ. މީގެ އިތުރުން ގިނަ ސިއްހީ މަރުކަޒުތަކެއް ހޮސްޕިޓަލް ފެންވަރަށް ތަރައްގީކުރުމުގެ މަސައްކަތް ވެސް އަންނީ ކުރިއަށެވެ. ކޮވިޑް-19 އާ ގުޅިގެން ވެސް ސިއްހީ ދާއިރާ އަށް ވަނީ މިއިން ޒަމާނަކު ނުފެންނަ ވަރުގެ ހަލުވި ކުރިއެރުމެއް ލިބިގެން ގޮސްފައެވެ. ކުރިން ރާވާފައި ނެތް އެތައް ކަމެއް ސިއްހީ ދާއިރާ އިން ވަނީ ފެނިގެން ގޮސްފައެވެ. އެ ގޮތުން މާލޭގެ ހޮސްޕިޓަލްތަކުގައި ވެސް ނުކުރާ ފަދަ ބައެއް އޮޕަރޭޝަންތައ ރަށްތަކުގައި ކުރަން ފެށުމާއި އައިސީޔޫތައް ގާއިމުކޮށް ވެންޓިލޭޓަރުތައް ބެހެއްޓުން ފަދަ އެތައް ކަމެއް ވަނީ މި ސަރުކާރުން ކޮށްފައެވެ.

މީގެ އިތުރުން ދިރިއުޅުމާ ގުޅިފައިވާ އެތައް ހިދުމަތްތަކެއް މި ސަރުކާރުން ވަނީ ތައާރަފްކޮށްފައެވެ. އޭގެ ތެރޭގައި ދަރިވަރުންނަށް ހެނދުނު ނާސްތާ ދިނުމާއި ވިހެއުމުން މައި މީހާ އަށް ހަ މަސް ދުވަސް އަދި ބައްޕަ އަށް އެއް މަސް ދުވަހުގެ ޗުއްޓީ ދިނުން ފަދަ އެތައް ކަމެއް މި ސަރުކާރުން އަލަށް ވަނީ ތައާރަފްކޮށްފައެވެ.

ތަރައްގީއަކީ ހަމައެކަނި އުމްރާނީ ތަރައްގީއެއް ނޫނެވެ. ދައުލަތުގެ ހިންގުމާއި ހައްގުތައް ކަށަވަރުކުރުމަށް ކުރާ މަސައްކަތަކީ ވެސް ތަރައްގީއާ ގުޅިފައިވާ ކަންކަމެވެ. އެ ގޮތުން މިދިޔަ ސަރުކާރަށް ރައްޔިތުން “އެފް” ރިޕޯޓެއް ދިން މައިގަނޑު އެއް ސަބަބު ކަމަށްވާ ޝަރުއީ ދާއިރާ ގަޑުބަޑުކުރުން މި ސަރުކާރުން ވަނީ އިސްލާހުކުރަން ފަށާފައެވެ. އެ ގޮތުން ޝަރުއީ ދާއިރާ އަށް ގެނައި ބަދަލުތަކުގެ ސަބަބުން އިންސާފު ލިބޭނެ ކަމުގެ އުންމީދު މިހާރު ވެސް ވަނީ އާވެފައެވެ. އެތައް ޒަމާނެއް ވަންދެން ކޯޓުތަކުގައި ތާސިވެފައި ހުރި މައްސަލަތައް މިހާރު ވަނީ ހިނގައިގަންނަން ފަށާފައެވެ. ހާއްސަކޮށް ސުޕްރީމް ކޯޓުގެ ދުވެހި އިންތިހާ އަށް ވަނީ ރަނގަޅުވެފައެވެ. ޝަރުއީ ދާއިރާ އަށް ހެޔޮ ބަދަލުތަކެއް އަންނަމުންދާކަމުގެ ޔަގީންކަން ވަނީ ލިބެން ފަށާފައެވެ. އޭގެ އެއް މިސާލަކީ މި ސަރުކާރުން ސިޔާސީ ގޮތުން ބަޔަކަށް ހުކުމްތަކެއް ނުކުރާ ކަމެވެ. ފަނޑިޔާރުން ގެންގޮސް ޖަލަށް ނުލާ ކަމެވެ. ސުޕްރީން ކޯޓށް ބިރު ނުދައްކާ ކަމެވެ.

އިންސާނީ ހައްގުތަކަށް ބަލާއިރު މިދިޔަ ސަރުކާރުގައި ނޫސްވެރިކަމަށް ކުރިމަތިވި ބިރުވެރިކަން މި ސަރުކާރުގައި އެއްގޮތަކަށް ވެސް ނެތޭ ބުނުމަކުން ގޯހަކަށް ނުވާނެއެވެ. މީޑިއާ އަށް ހުރަސް އެޅުމަށްޓަކައި މިދިޔަ ސަރުކާރުން އުފަންކުރި އަބުރުގެ ގާނޫނު ވަނީ އުވާލާފައެވެ. ގަޑުބަޑުވެފައި އޮތް ބްރޯޑްކާސްޓިން ކޮމިޝަނަށް ވަނީ ބަދަލުތަކެއް ގެނެސްފައެވެ. ދާއިރާ ހަރުދަނާ ކުރުމަށް ގާނޫނުތަކަށް ބަދަލު ގެނައުމުގެ މަސައްކަތް ވަނީ ފަށާފައެވެ. ނޫސްވެރިކަމުގެ މިނިވަންކަން މިއިން ޒަމާނެއްގައި ނުލިބޭ ވަރަށް އެބަ އޮތެވެ. ހިޔާލު ފާޅުކުރުމުގެ މިނިވަންކަން ވެސް އެބަ އޮތެވެ. އެއްވުންތައް ރޫޅާލުމުގައި މިދިޔަ ސަރުކާރުން ގެންގުޅުނު ހަރުކަށި ގޮތްތައް މި ސަރުކާރުން ނުގެންގުޅެއެވެ. ވީހާ ވެސް ފުޅާ ދާއިރާއެއްގައި ހިޔާލު ފާޅުކުރުމުގެ މިނިވަންކަން ދިނުމަށްޓަކައި ގަވާއިދަށް އިސްލާހު ގެނައުމުގެ މަސައްކަތް ވެސް ވަނީ ފެށިފައެވެ.

ފާއިތުވި ދެ އަހަރެއްހާ ދުވަހުގެ ތެރޭގައި އިގްތިސާދު ފުޅާކުރުމަށް ގާނޫނީ ގޮތުން ގެނައި ބަދަލުތައް ވެސް ގިނައެވެ. ދައުލަތުގެ އާމްދަނީ އިތުރުކުރުމަށް އިންކަމް ޓެކްސް ވަނީ ތައާރަފްކޮށްފައެވެ. ކުދި އަދި މެދުފަންތީގެ ވިޔަފާރިތައް ތަރައްގީކުރުމަށް ހާއްސަ ބޭންކެއް ހުޅުވައި ލޯނު ދޭން ވަނީ ފަށާފައެވެ. މި ނޫން ވެސް އެތައް އެތައް ކަމެކެވެ.  

މާލޭ ސަރަހައްދުގައި ފަށާފައިވާ މަޝްރޫއުތައް ވެސް އަދަދުން ގުނާ ނަމަ މަދެއް ނޫނެވެ. ކުޅިވަރު ކުޅޭނެ ތަންތަން ތަރައްގީކުރުމާއި ޕާކްތައް ތަރައްގީކުރުމާއި ހުޅުމާލެ ދެ ވަނަ ފިޔަވަހީގެ މަސައްކަތްތައް ވެސް ފާހަގަކޮށްލެވެއެވެ. މީގެ އިތުރުން މާލޭގެ ވިޔަފާރި ބަނދަރު ގުޅިފަޅަށް ބަދަލުކުރުމަށް ބިން ހިއްކުން ކުރިއަށްދާ އިރު ތިލަފުށީން ފެށިގެން މާލެއާ ހަމަށް ބްރިޖް އެޅުމަށް ލޯނާއި ހިލޭ އެހީ ހަމަޖެހި އަމަލީ މަސައްކަތް އޮތީ ފެށުމާ ހަމައިގައެވެ. ބޯހިޔާވަހިކަމުގެ އެތައް މަޝްރޫއެއް ޕްލޭންކުރެވި ހިސާބު ޖެހިފައިވާ އިރު މި މަޝްރޫއުތައް ހަމަ ލޮލަށް ފެންނަން ދުވަސްކޮޅެއް ނަގާނެއެވެ. ދަރުމަވަންތަ ހޮސްޕިޓަލްގެ 25 ބުރީގެ އިމާރާތާއި ސިނަމާލެ ބްރިޖަކީ ވެސް ދެ އަހަރުގެ ތެރޭގައި މިދިޔަ ސަރުކާރުން ނިންމި ތަންތަނެއް ނޫނެވެ. އެ ތަންތަން ހަގީގަތަކަށްވީ ދައުރު ނިމެނިކޮށެވެ. މި ސަރުކާރަށް ވެސް ބާކީ ތިން އަހަރު އެބަ އޮތެވެ. ކޮވިޑްގެ ސަބަބުން ތަރައްގީގެ ދުވެލި މަޑުޖެހި ނަމަވެސް އެކަމުން އަރައިގަތުމަށް ރާވާފައިވާ ޕްލޭންތައް ރަނގަޅެވެ. އެހެންކަމުން ދެ އަހަރު ނިމޭ ތަނުން “އެފް” ރިޕޯޓް ދޭންޖެހޭ ސަބަބެއް ނެތެވެ. ތަފާސް ހިސާބަށް ބަލާ ނަމަ ކޮވިޑްގެ ދަތިކަމާ ހުރެ ވެސް ސަރުކާރަށް “އޭ ޕްލަސް” ރިޕޯޓެއް ހައްގެވެ. މިހާރު މިސްރާބު ހުރި ގޮތަށް ބަލާ ނަމަ ދައުރު ނިމޭ އިރު އުމްރާނީ ތަރައްގީން ވެސް “އޭ ޕްލަސް” ހޯދޭނެ ކަމަށް ބެލެވެއެވެ.