ބީއެމްއެލްއިން އދ. ދިގުރަށުގައި އޭޓީއެމްއެއް ހުޅުވައިފި

ބޭންކް އޮފް މޯލްޑިވްސް (ބީއެމްއެލް) އިން އދ. ދިގުރަށުގައި ސެލްފް ސާވިސް ބޭންކިން ސެންޓަރެއް ހުޅުވައިފިއެވެ. ދިގުރަށުގައި ހުޅުވި ބީއެމްއެލްގެ މި ބެންކިން ސެންޓަރު ހުޅުވާފައިވަނީ އިއްޔެއެވެ.

މިއީ ބީއެމްއެލް އިން އަތޮޅުތެރޭގައި ކުރަމުންދާ އިންވެސްޓްމަންޓް އިތުރަށް ފުޅާކުރުމުގެ ގޮތުންނާއި މުޖުތަމައަށް ފޯރުކޮށްދޭ އެހީތެރިކަމުގެ ދަށުން ގާއިމްކުރި އޭޓީއެމް ސެންޓަރެކެވެ. މި އޭޓީއެމް ސެންޓަރު މެދުވެރިކޮށް އަމިއްލަ ފަރުދުންނާއި ވިޔަފާރިތަކަށް 24 ގަޑިއިރު ފައިސާ ނެގުމާއި، ފައިސާ ޖަމާކުރުމާއި، ފައިސާ ދެއްކުމާއި ޓްރާންސްފާ ކުރުމުގެ ހިދުމަތް ލިބޭނެ ކަމަށް ބީއެމްއެލްއިން ބުނެއެވެ. 

advertisement

ބީއެމްއެލްއިން އދ. ދިގުރަށުގައި ޤާއިމްކުރި އޭޓީއެމް ސެންޓަރާއިއެކު އދ. އަތޮޅުގެ 3 ރަށަކުން މިހާރު ބީއެމްއެލް އޭޓީއެމްގެ ޚިދުމަތް ލިބޭނެއެވެ. އެއީ އދ. މާމިގިލި، މަހިބަދޫ އަދި ދިގުރަށެވެ.

ބީއެމްއެލް އިން ވަނީ ދާދިފަހުން ނ. ކެނދިކުޅުދޫ، ތ. ތިމަރަފުށި އަދި އއ. ތޮއްޑޫ އާއި އުކުޅަހުގައި ވެސް އޭޓީއެމްގެ ޙިދުމަތްދޭން ފަށާފައެވެ.

މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 38 ބްރާންޗް، 64 ސެލްފްސާވިސް ބޭންކިން ސެންޓަރު، 127 އޭޓީއެމް ބަހައްޓައި ބީއެމްއެލްއިން އަންނަނީ ރައްޔިތުންނަށް ޙިދުމަތް ފޯރުކޮށްދެމުންނެވެ.