ދިވެހި އުފެއްދުންތަކަށް ޚާއްސަކޮށްގެން އޮތެންޓިކް މޯލްޑިވްސްގެ ފިހާރައެއް ހުޅުމާލޭގައި ހުޅުވައިފި

ދިވެހި އުފެއްދުންތަކަށް ޚާއްސަކޮށްގެން ހުޅުމާލެ ސެންޓްރޯ މޯލްގައި ‘އޮތެންޓިކް މޯލްޑިވްސް’ގެ ނަމުގައި ބީސީސީން ފިހާރައެއް ހުޅުވައިފިއެވެ.

ބިޒްނަސް ސެންޓަރ ކޯޕަރޭޝަން، ބީސީސީގެ އޮތެންޓިކް މޯލްޑިވްސް ފިހާރައަކީ ދިވެހި އަތްތެރި މަސައްކަތް ކުރާ ދިވެހިންނަށް އަމާޒުކޮށްގެން ސަރުކާރުގެ ކުދި އަދި މެދު ފަންތީގެ ވިޔަފާރިތައް ކުރިއެރުވުމުގެ ސިޔާސަތުގެ ދަށުން އެފަދަ ވިޔަފާރިތައް ކުރިއެރުވުމުގެ މަޤްސަދުގައި ހުޅުވާފައިވާ ފިހާރައެކެވެ.

މި ފިހާރަ ހުޅުއްވައިދެއްވާފައިވަނީ މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް ޔުމްނާ މައުމޫންއެވެ. ކުދި ފަންތިއާއި މެދުފަންތީގެ ވިޔަފާރިތަކުގައި ހަރަކާތްތެރިވާ 57 ވިޔަފާރިވެރިއެއްގެ އުފެއްދުން މި ފިހާރައިން ލިބެން ހުންނާނެ ކަމަށް އިކޮނޮމިކް މިނިސްޓްރީން މައުލޫމާތުދެއެވެ.

ހުޅުމާލެ ސެންޓްރޯ މޯލްގައި ބީސީސީން ހުޅުވި މި ފިހާރައިން ދިވެހި ތަފާތު އުފެއްދުންތައް ލިބެން ހުންނާނެއެވެ. އޭގެތެރޭގައި ދިވެހި ޘަޤާފަތް ދައްކުވައިދޭ ތަފާތު އުފެއްދުންތަކާއި، ޒީނަތްތެރިވުމަށް ބޭނުންކުރާ ގަހަނާ، ކީ ޗެއިންސް، ދަބަސް، ހެދުން ފަދަ ތަކެތި ހިމެނެއެވެ. 

advertisement

ބީސީސީން ވަނީ މިއަހަރުގެ ޖެނުއަރީމަހުގެ ތެރޭގައި ވެލާނާ އިންޓަނޭޝަނަލް އެއަރޕޯޓުގެ ޑިއުޓީ ފްރީގައި ދިވެހި އުފެއްދުންތަކަށް ޚާއްސަ ފިހާރައެއް ހުޅުވާފައެވެ.