ގަލްފް ކްރާފްޓް ކުންފުނިން ފަޅެއް ތަރައްގީކުރަން 400 މިލިއަން ޑޮލަރު އިންވެސްޓްކުރަނީ

ޔޫއޭއީގެ ގަލްފް ކްރާފްޓް ކުންފުނިން ރާއްޖޭގައި ފަޅެއް ތަރައްގީކޮށް ބައިނަލްއަގުވާމީ ފެންވަރުގެ ބޯޓު ޔާޑެއް ހެދުމަށް 400 ވަރަކަށް މިލިއަން ޑޮލަރު އިންވެސްޓްކުރުމަށް ނިންމައިފިއެވެ.

މާލެ އަތޮޅު ސަންތާރާ ރިސޯޓް ކައިރީގައި އޮންނަ ފަޅު ތަރައްގީކުރުމުގެ އެމްއޯޔޫގައި ގަލްފް ކްރާފްޓް ކުންފުންޏާއި އެސްއޭއެސްއީ ކޮންސްޓްރަކްޝަންއާ ދެމެދު ބުރާސްފަތި ދުވަހު ވަނީ ސޮއިކޮށްފައެވެ. ތިލަފުށީގައި ހުންނަ ގަލްފް ކްރާފްޓް މޯލްޑިވްސްގެ ބޯޓު ޔާޑުގައި އޮތް ރަސްމިއްޔާތުގައި މި އެއްބަސްވުމުގައި ގަލްފް ކްރާފްޓް ކުންފުނީގެ ފަރާތުން ސޮއިކުރެއްވީ އެ ކުންފުނީގެ ޗެއާމަން އަދި ކުރިން އެ ގައުމުގެ މިނިސްޓަރު އޮފް ސްޓޭޓް ފޯ ފޮރިން އެފެއާޒްގެ މަގާމު ވެސް އަދާކުރައްވާފައިވާ މުހައްމަދު ހުސައިން އަލް ޝާލީއެވެ. އެސްއޭއެސްއީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު ސައުދުﷲ އަހްމަދެވެ.

advertisement

ގަލްފް ގްރާފްޓް ކުންފުނިން ރާއްޖޭގައި މިހާރު ވެސް ފުޅާ ދާއިރާއެއްގައި ވިޔަފާރިކުރެއެވެ. އެ ކުންފުނިން ލޯންޗް ފަހަރާއި އުޅަނދުފަހަރު ބަނުމުގެ މަސައްކަތްކުރަމުން އަންނަތާ އަހަރުތަކެއް ވެއްޖެއެވެ.

“ގަލްފް ލެގޫން”ގެ ނަމުގައި ތަރައްގީކުރާ މި ފަޅަކީ މިދިޔަ ސަރުކާރުގައި މާލެ އަތޮޅު ގިނަ އަދަދެއްގެ ފަޅުތަކެއް ދޫކުރި އިރު އެ ކުންފުންޏާ ހަވާލުކޮށްފައިވާ ފަޅެކެވެ. ނަމަވެސް މިހާތަނާ ޖެހެންދެން ވެސް އެ ތަނުގައި އެއްވެސް މަަސައްކަތެއް ކޮށްފައެއް ނުވެއެވެ.

މި ފަޅު ތަރައްގީކުރަނީ ބޯޓު ބަންނަ ހާއްސަ ފެކްޓަރީއަކާއި ޔޮޓް މެރީނާއަކާ އެކު ކަމަށް ގަލްފް ކްރާފްޓް ކުންފުނިން ބުނެއެވެ. އަދި އެންމެ ފަހުގެ ޒަމާނީ ވަސީލަތްތަކާ އެކު މި ތަން ތަރައްގީކުރާނީ މި ދާއިރާ އަށް މީހުން ބިނާކުރުމަށް ހާއްސަ ތަމްރީން ސެންޓަރަކާ ވެސް އެކުގައެވެ.

މި މަޝްރޫއުގެ ބިން ހިއްކައި ތޮށިލުމުގެ މަސައްކަތް ކުރާނީ އެސްއޭއެސްއީ ކުންފުނިންނެވެ. މާލެ އަތޮޅުގައި އެނބޫދޫ ފަޅު ހިއްކައިގެން ތަރައްގީކުރާ ރަށްތައް ވެސް ހިއްކާފައި ވަނީ އެ ކުންފުނިންނެވެ. ގަލްފް ލެގޫން ނިންމުމަށް ހަމަޖައްސާފައި ވަނީ 2023 ހުޅުވޭ ވަރަށެވެ.