ލަންކާއަށް އެތެރެނުކުރެވިހުރި ރާއްޖޭގެ މަސް ޝިޕްމަންޓް އެގައުމަށް އެތެރެކޮށްފި

ލަންކާއަށް އެތެރެނުކުރެވިހުރި ރާއްޖޭގެ މަސް ޝިޕްމަންޓް އެޤައުމަށް އެތެރެކޮށްފިއެވެ. މި ޝިޕްމަންޓް ލަންކާއަށް އެތެރެކުރުން ލަސްވެފައިވަނީ ސްރީލަންކާ ސަރުކާރުން އެގައުމަށް މަސް އެތެރެކުރުމުގެ ސިޔާސަތުތަކަށް ގެނައި ބަދަލުތަކާ ގުޅިގެންނެވެ.

ފޮރިން މިނިސްޓްރީން ވިދާޅުވީ ސްރީލަންކާގެ ކަސްޓަމްސްގައި ތާށިވެފައި ހުރި މަހުގެ ޝިޕްމަންޓްތައް އެގައުމަށް އެތެރެކުރެވިފައިވަނީ ފޮރިން މިނިސްޓަރ އަބްދުﷲ ޝާހިދު އާއި ސްރީލަންކާގައި ހުންނަވާ ދިވެހި ހައިކޮމިޝަނަރ، ސްރީލަންކާ ސަރުކާރުގެ އިސް ބޭފުޅުންނާއެކު ކުރެއްވި މަޝްވަރާތަކަށްފަހުކަމަށެވެ.

ރާއްޖޭގެ މަހުގެ އުފެއްދުންތައް، ސްރީލަންކާ ސަރުކާރުން ކުރިންވެސް ދީފައިވާ ޔަޤީންކަމާ އެއްގޮތަށް ލަންކާއަށް އެތެރެކުރެވޭނެ ފަސޭހަ އިންތިޒާމްތައް ހަމަޖެއްސުމާއި ގުޅޭ ގޮތުން ލަންކާ ސަރުކާރާއެކު ފޮރިން މިނިސްޓަރ އަބްދުﷲ ޝާހިދު މަޝްވަރާކުރައްވަމުން ގެންދަވާކަމަށް ފޮރިން މިނިސްޓްރީން ވިދާޅުވިއެވެ.

ދިވެހި ކަނޑުމަހުގެ ބާވަތްތައް ސްރީ ލަންކާއަށް އެތެރެކުރުން މަނާކުރިކަމުގެ ރަސްމީ އެއްވެސް މަޢުލޫމާތެއް ލަންކާ ސަރުކާރުން ދިވެހި ސަރުކާރާ ކުރިން ޙިއްސާކޮށްފައިނުވާކަމަށް ފޮރިން މިނިސްޓްރީއިން ވަނީ ވިދާޅުވެފައެވެ.

ދިވެހިރާއްޖޭގެ ކަނޑުމަހުގެ ބާވަތްތައް އެއްވެސް ހުރައްހެއް ނެތި ސްރީ ލަންކާއަށް އެތެރެކުރެވޭނެކަމުގެ ޔަގީންކަން، މިދިޔަ މަހު ލަންކާ ސަރުކާރުން ވަނީ ދިވެހި ސަރުކާރަށް ދީފައެވެ.

advertisement

ލަންކާގެ އައު ސަރުކާރުން ވަނީ އެ ގައުމުގެ މަސްވެރިންނަށް ފުރުސަތު ފަހިކޮށްދިނުމަށް، އެހެން ޤައުމުތަކުން އެ ޤައުމަށް އެތެރެކުރާ މަހުގެ ބާވަތްތަކުން ނަގާ ޓެކްސް ވަނީ ބޮޑުކޮށްފައެވެ. އާ ޓެކުހުގެ ރޭޓުތަކުގައިވާގޮތުން ރާއްޖެއިން އެޤައުމަށް އެތެރެކުރާ މަހުގެ ބާވަތްތަކުން ޓެކްސްގެ ގޮތުގައި ކިލޯއަކަށް 62.49 ރުފިޔާ ނެގުމަށް އެޤައުމުން ވަނީ ނިންމާފައެވެ.