ސަސްއަށް 4 ބިދޭސީ ކުޅުންތެރިން ގެނެސްފި

ސުޕަ ޔުނައިޓެޑް ސްޕޯޓްސް (ސަސް) އަށް ބިދޭސީ 4 ކުޅުންތެރިން ގެނެސްފިއެވެ. ސަސްއަކީ މި ފަހަރު ފުރަތަމަ ޑިވިޝަނުގައި އަލަށް ވާދަކުރާ ޓީމެކެވެ.

ސަސްއަށް އަލަށް ގެނެސްފައިވާ 4 ބިދޭސީ ކުޅުންތެރިންގެ ތެރޭގައި ހިމެނެނީ އުޒްބެކިސްތާން ގޯލްކީޕަރަކާއި ޖަޕާނުގެ ދެ މިޑްފީލްޑަރުންގެ އިތުރުން ސްޕެއިނުގެ ފޯވާޑެކެވެ.

advertisement

އެ ޓީމަށް އަލަށް ސޮއެކޮށްފައިވާ އުޒްބެކިސްތާން ގޯލްކީޕަރ މިރްޒޮހިދު ވަނީ އުޒްބެކިސްތާން ޔޫތު ލީގާއި އުޒްބެކިސްތާން ދެ ވަނަ ޑިވިޝަނާއި އުޒްބެކިސްތާން 23 އަހަރުން ދަށުގެ ލީގުގެ އުޒްބެކިސްތާން ސުޕަ ލީގުގެ ޓީމުތަކަށް ކުޅެފަ އެވެ. އޭނާ ކުޅުނު ޓީމުތަކަށް ބަލާއިރު އެފްސީ ނަސަފް ޔޫތު ކްލަބާއި އެފްސީ ޒޮތީރާ 79 އާއި އެފްސީ ނަވްބަހޯރް އަދި އެފްސީ ޝުރްޓަން ހިމެނެ އެވެ.

ސަސް އިން ގެނައި ޖަޕާނުގެ ޔޮނެޒޭވާ ވަނީ އެ ގައުމުގެ ދެ ވަނަ ޑިވިޝަނުގައި ވާދަކުރާ ޖެފް ޔުނައިޓެޑާއި އިންޑިއާގެ އައި ލީގުގެ ރޯޔަލް ވެހިންޑޯ އާއި އައިޒޯލް އަދި މިނެރްވާ އަށް ކުޅެފަ އެވެ.

ސަސްއަށް ސޮއެކުރި ސްޕެއިންގެ ޕޯވާޑް ވިކްޓޯ ވަނީ ސްޕެއިނުގެ ދަށް ޑިވިޝަންތަކުގެ ޓީމުތަކަށާއި އޮސްޓްރިއާގެ ކްލަބަކަށް ވެސް މީގެ ކުރިން ކުޅެފަ އެވެ.

ސަސްގެ ކޯޗަކަށް ހަމަޖައްސާފައިވަނީ ފުރަތަމަ ޑިވިޝަނާއި ދެ ވަނަ ޑިވިޝަނުގެ އިތުރުން ގައުމީ އެކި ޓީމުތަކުގައި މަސައްކަތްކޮށްފައިވާ ކޯޗު އަހުމަދު ނާޝިދު (ނާދު) އެވެ.