ސްރީލަންކަން އެއަރލައިންސްއިން ރާއްޖެއާއި ލަންޑަންއާ ދެމެދު ސީދާ ދަތުރުތައް ފަށަނީ

ސްރީލަންކަން އެއަރލައިންސްއިން ރާއްޖެއާއި ލަންޑަންއާ ދެމެދު ސީދާ ދަތުރުތައް ފެށުމަށް ނިންމައިފިއެވެ.

މި ދަތުރުތައް ފެށުމަށް ހަމަޖެހިފައިވަނީ ޑިސެމްބަރުމަހުގެ 12 ވަނަ ދުވަހުއެވެ. އަދި މި ދަތުރުތައް އަންނަ އަހަރުގެ އޭޕްރީލްމަހުގެ 13 ވަނަ ދުވަހުގެ ނިޔަލަށް ކުރިއަށްދާނެއެވެ. ލަންޑަނާއި ރާއްޖެއާއި ދެމެދު ފެށުމަށް ހަމަޖެހިފައިވާ ދަތުރުތައް ކުރުމަށް ހަމަޖެހިފައިވަނީ ކޮންމެ ހަފްތާއެއްގެވެސް އަންގާރަ އަދި ހޮނިހިރު ދުވަހުއެވެ.

ސްރީލަންކަން އެއަރލައިންސްއިން ރާއްޖެއާއި ލަންޑަންއާއި ދެމެދު ފަށާ ދަތުރުތަކާއި އެކު އިނގިރޭސިވިލާތުން ރާއްޖެއަށް ފަތުރުވެރިން އައުމަށް ފަސޭހަވެގެންދާނެއެވެ. ރާއްޖޭގެ ބޯޑަރު ހުޅުވާލުމާއިއެކު ސްރީލަންކަން އެއަރލައިންސްއިން މިހާރުވެސް ދަނީ ރާއްޖެއަށް ހަފްތާއަކު 7 ދަތުރުކުރަމުންނެވެ.

ރާއްޖޭގެ ބޯޑަރު އަލުން ހުޅުވާލުމާއިއެކު އިނގިރޭސިވިލާތް ހިމެނިފައިވަނީ ރާއްޖެއަށް 2 ވަނައަށް އެންމެ ގިނަ ފަތުރުވެރިން ޒިޔާރަތްކުރި ޤައުމުގެ ގޮތުގައެވެ. ކޯވިޑް19ގެ ފަހުން އަލުން ބޯޑަރު ހުޅުވާލުމާއިއެކު އިނގިރޭސިވިލާތުން ރާއްޖެއަށް މިހާތަނަށް 4468 ފަތުރުވެރިން ވަނީ އައިސްފައެވެ.

advertisement