ދައުލަތަށް ފައިސާ ހޯދުމަށް ދަރުމަވަންތަ “ރަހުނު” ކުރަނީ!

ދައުލަތަށް ފައިސާ ހޯދުމަށް ވިއްކާ ސުކޫކަކަށް ދަރުމަވަންތަ ހޮސްޕިޓަލްގެ އިމާރާތް “ރަހުނު” ކުރުމަށް ނިންމައިފިއެވެ.

ފިނޭންސް މިނިސްޓަރު އިބްރާހީމް އަމީރު ސޮއިކުރައްވައި ރައީސުލްޖުމްހޫރިއްޔާ އަށް ފޮނުއްވާފައިވާ ސިޓީފުޅެއްގައި ވިދާޅުވެފައި ވަނީ ދައުލަތަށް ބޭނުންވާ ފައިސާ ހޯދުމަށްޓަކައި ބައިނަލްއަގުވާމީ މާލީ ބާޒާރުގައި 300 މިލިއަން ޑޮލަރު (4.6 ބިލިއަން ރުފިޔާ)ގެ ސުކޫކެއް ވިއްކުމަށް އިސްލާމިކް ކޯޕަރޭޝަން ފޯ ދި ޑިވެލޮޕްމަންޓް އޮފް ޕްރައިވެޓް ސެކްޓާ (އައިސީޑީ)އާ އެކު މަސައްކަތް ކުރަމުން އަންނަ ކަމަށެވެ. އިސްލާމިކް ޝަރީއާގެ ހަމަތަކުގެ މަތިން ވިއްކާ މި ސުކޫކަށް ދައުލަތުގެ 100 ޕަސެންޓް ހިއްސާވާ ސެޕެޝަލް ޕާފޮސް ވެސެލް (އެސްޕީވީ) އެއް ހެއްދުމަށް ސުކޫކްގެ 51 ޕަސެންޓަށް ވުރެ އަގު ކުރެވޭ ދައުލަތުގެ އެސެޓެއް ބެނިފިޝަލް އޯނާޝިޕް އެސްޕީވީ އަށް ބަދަލު ކުރަންޖެހޭ ކަމަށް އެ ސިޓީގައި ވެއެވެ.

advertisement

އެ ސިޓީގައި މިނިސްޓަރު ވިދާޅުވެފައި ވަނީ ސަރުކާރުގައި މި ވަގުތު ހުރި އެސެޓްގެ ތެރެއިން އެ އަގުގެ އަދި އެކަށީގެންވާ އެސެޓަކީ ދަރުމަވަންތަ ހޮސްޕިޓަލް ކަމަށެވެ. ނަމަވެސް މި ވަގުތު އެ ތަނަކީ ހެލްތު މިނިސްޓްރީގެ ދަށުގައި ރަޖިސްޓްރީކޮށްފައިވާ ތަނެއް ކަމަށާއި ސުކޫކް ވިއްކުމަށް ބޭނުންކުރާ މުދަލަކީ ފިނޭންސް މިނިސްޓްރީގެ ދަށުގައި ހުންނަ ތަނަކަށް ވާންޖެހޭތީ ހެލްތުގެ ދަށުން ފިނޭންސް މިނިސްޓްރީގެ ދަށަށް އެ ތަން ބަދަލުކުރުމަށް މަސައްކަތް ކުރައްވަމުން ގެންދަވާ ކަމަށް ވެސް އެ ސިޓީގައި ވެއެވެ. އެގޮތުން އެކަން ހަމަޖެއްސުމަށް ސިޓީ ކައުންސިލަށް އެކަން އަންގަވައިދެއްވުމަށް ރައީސްގެ އަރިހުން މިނިސްޓަރު އެދިވަޑައިގެންފައި ވެއެވެ.

ސުކޫކް ވިއްކުމަށް ދަރުމަވަންތަ ބޭނުންކުރާތީ ވަރަށް ގިނަ ފަރާތްތަކަކުން ގެންދަނީ އެކަމާ ދެކޮޅަށް ސޯޝަލް މީޑިއާގައި ހިޔާލު ފާޅުކުރަމުންނެވެ. ހާއްސަކޮށް އިދިކޮޅު ފަރާތްތަކުން ގެންދަނީ ސަރުކާރަށް ވަރަށް ބޮޑަށް ފާޑުކިޔަމުންނެވެ. އެ ގޮތުން މި ސަރުކާރަށް ފައިސާ ހޯދަން ވެސް ބޭނުންކުރަން ޖެހުނީ ކުރީގެ ރައީސް އަބްދުﷲ ޔާމީންގެ ސަރުކާރުގައި ހެދި ދަރުމަވަންތަ ކަމަށާއި އެ ތަނާ ގުޅޭ ގޮތުން ދެއްކި ވާހަކަތައް ދޮގުކަން މިއަދު ސާބިތު ވެއްޖެ ކަމަށް ވެސް އިދިކޮޅު ފަރާތްތަކުން ދަނީ ބުނަމުންނެވެ.

ދަރުމަވަންތަ ހޮސްޕިޓަލްގެ 25 ބުރީގެ އިމާރާތައް އެކަނި 143 މިލިއަން ޑޮލަރު ހޭދަކޮށްފައި ވެއެވެ.