މެމްބަރު ޔައުގޫބްގެ ގޮނޑި ނުގެއްލޭ ކަމަށް ސުޕްރީމް ކޯޓުން ހުކުމް ކޮށްފި

ދާންދޫ ދާއިރާގެ މެންބަރު ޔައުގޫބް އަބްދުﷲގެ ގޮނޑި ނުގެއްލޭ ކަމަށް ސުޕްރީމް ކޯޓުން ހުކުމް ކޮށްފިއެވެ.

ސުޕްރީމް ކޯޓުން މި ގޮތަށް ހުކުމް ކުރީ ޔައުގޫބުގެ ގޮނޑިއާ ގުޅޭ ގޮތުން އަމިއްލަ ފަރާތަކުން ހުށަހެޅި މައްސަލައެއްގެ ހުކުމުގައެވެ. ޔައުގޫބުގެ ގޮނޑިއާ މެދު ސުވާލު އުފެދުނީ އިންސްޓިޓިއުޓް އޮފް ޗާޓާޑް އެކައުންޓެންޓްސް އޮފް ދަ މޯލްޑިވްސްގެ ކައުންސިލްގެ މެންބަރު ކަމަށް އޭނާ އައްޔަންކުރުމާ ގުޅިގެންނެވެ. ޗާޓާޑް އެކައުންޓެންޓުންގެ ގާނޫނުގެ ދަށުން އުފެއްދި އިންސްޓިޓިއުޓަކީ މުސްތަގިއްލު މުއައްސަސާއަކަށް ވެފައި، މަޖިލީހުގެ މެންބަރެއްގެ ހައުސިއްޔަތުން ފިޔަވައި ދައުލަތުގެ އެހެން އެއްވެސް މަގާމެއް އަދާނުކުރެވޭނެ ކަމަށް ގާނޫނުއަސާސީގައި އޮންނާތީ ޔައުގޫބުގެ ގޮނޑި ގެއްލިފައިވާ ކަމަށް ބައެއް ފަރާތްތަކުން މާނަކޮށްފައި ވެއެވެ. އެ ސުވާލު އުފައްދަން ފެށުމާ ގުޅިގެން ޔައުގޫބު ވަނީ އެ އިންސްޓިޓިއުޓްގެ ކައުންސިލްގެ މަގާމުން އިސްތިއުފާ ދެއްވާފައެވެ.

advertisement

މި މައްސަލަ ސުޕްރީމް ކޯޓަށް ހުށަހެޅުއްވީ ސިވިލް ކޯޓުގެ ކުރީގެ ގާޒީ އާދަމް ހަލީމް އާއި އިދިކޮޅު ހަރަކާތްތަކުން ފެންނަ ގާނޫނީ ވަކީލް އަދި ކުރީގެ ފިލްމީ ތަރި އައްސަދު ޝަރީފެވެ.

ސުޕްރީމް ކޯޓުން ކުރި ހުކުމުގައި ބުނެފައި ވަނީ ޔައުގޫބުގެ ގޮނޑު ނުގެއްލޭ ކަމަށާއި ގާނޫނު އަސާސީގައި މަނާކުރާ ފަދަ ދައުލަތުގެ ވަޒީފާއެއް ޔައުގޫބު އަދާކުރައްވާފައި ނުވާ ކަމަށެވެ.

ސުޕްރީމް ކޯޓުގެ ހުކުމުގައި ބުނެފައި ވަނީ އިންސްޓިޓިއުޓް އޮފް ޗާޓާޑް އެކައުންޓެންޓްސް އޮފް ދަ މޯލްޑިވްސްއަކީ ގާނޫނު އަސާސީގައި ބަޔާންކޮށްފައިވާ ފަދަ މިނިވަން މުސްތަގިއްލު ކޮމިޝަނެއް ނޫން ކަމަށެވެ. އަދި އެއީ ސަރުކާރުގެ ސިޔާދަތުގެ ތެރެއިން ހިނގާ ތަނެއް ނޫން ކަމަށާއި އެއީ ވަކި ފަންނެއް ރެގިއުލޭޓްކުރުމަށް އުފައްދާފައިވާ ތަނެއް ކަމަށް ވެސް ހުކުމުގައި ވެއެވެ.

ހުކުމުގައި ބުނެފައި ވަނީ ގާނޫނުއަސާސީގައި މިނިވަން މުސްތަގިއްލު މުއައްސަސާތައް ސާފުކޮށް ބަޔާންކޮށްދީފައިވާ ކަމަށާއި އެކަން ހަނިކުރެވޭނީ އެ މިންގަނޑުގެ ތެރެއިން ކަމަށެވެ.

ސުޕްރީމް ކޯޓުން ބުނީ މެންބަރުންގެ ގޮނޑި ގެއްލޭނެ ހާލަތްތައް ވަކި މާއްދާއެއްގައި ބަޔާންކޮށްފައިވާ ކަމަށެވެ.