ސަފާރީތަކުގެ ފަތުރުވެރިން މާލެ ނައިސް ޕީސީއާރު ޓެސްޓް ހެދޭނެ އިންތިޒާމް ހަމަޖައްސައިފި

ސަފާރީތަކުގެ ފަތުރުވެރިން މާލެ ނައިސް ޕީސީއާރު ޓެސްޓް ހެދޭނެ އިންތިޒާމް ނޭޝަނަލް ބޯޓިން އެސޯސިއޭޝަން އޮފް މޯލްޑިވްސްއިން ހަމަޖައްސައިފިއެވެ.

ބޯޓިން އެސޯސިއޭޝަނުން ބުނީ ސަފާރީތަކަށް އައިސް އަނބުރާ ޤައުމަށްދާ ފަތުރުވެރިން ކޯވިޑް-19 އަށް ޓެސްޓު ހެދުމަށް މާލެ ނައިސް ރާއްޖޭގެ 9 ރަށަކުން އެކަން ކުރެވޭނެ އިންތިޒާމް މިހާރު ހަމަޖައްސަދީފައިވާކަމަށެވެ. އެ ރަށްތަކުގެ ތެރޭގައި ހިމެނެނީ ކ.ތުލުސްދޫ، ކ.ހިންމަފުށި، ކ.ދިއްފުށި، ކ.ގުޅި، ކ.ގުރައިދޫ، ކ.މާފުށި، އދ.ދަނގެތި، އދ.ދިގުރަށް އަދި އއ.އުކުޅަހެވެ.
މި ރަށްރަށުން ޕީސީއާރު ޓެސްޓް ހެދޭނެ އިންތިޒާމް ހަމަޖައްސާފައިވަނީ އެ ރަށްރަށުގެ ކަމާގުޅުންހުރި ފަރާތްތަކާއެކު މަޝްވަރާ ކުރުމަށްފަހުކަމަށް ބޯޓިން އެސޯސިއޭޝަނުން ބުނެއެވެ. މިރަށްރަށުން ފަތުރުވެރިއަކަށް ޕީސީއާރު ޓެސްޓް ހަދައިދެނީ 75 ޑޮލަރަށެވެ.
ރާއްޖޭގެ ބޯޑަރު އަލުން ހުޅުވާލުމާއިއެކު މިހާތަނަށް 122 ސަފާރީއަކަށް ޓޫރިޒަމް މިނިސްޓްރީން ވަނީ އަލުން އޮޕަރޭޓްކުރުމުގެ ހުއްދަ ދީފައެވެ. މިއީ މުޅި ޖުމްލަ 1023 ކޮޓަރިއެވެ. އަދި 2300 އެނދެވެ.

advertisement