އައިއެލްޓީއެމް ވަރލްޑް ޓުއަރގައި ރާއްޖެއިން ބައިވެރިވެއްޖެ

އައިއެލްޓީއެމް ވަރލްޑް ޓުއަރގައި މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީން ބައިވެރިވެއްޖެއެވެ. އެމްއެމްޕީއާރުސީން ވަނީ ދުނިޔޭގެ 3 ހިސާބެއްގައި ކުރިއަށް ގެންދާ އައިއެލްޓީއެމް ވަރލްޑް ޓުއަރގައި ބައިވެރިވުމަށް ނިންމާފައެވެ. މި މުޅި ހަރަކާތް ކުރިއަށްދާނީ ތިން ހަފްތާގެ ނިޔަލަށެވެ.

ދުނިޔޭގެ 3 ހިސާބެއްގައި ކުރިއަށްދާ އައިއެލްޓީއެމް ވަރލްޑް ޓުއަރއަށް ބަލާލާއިރު އޭޝިއާ ޕެސިފިކްގައި މި އިވެންޓް ކުރިއަށްދާނީ މިމަހުގެ 17 އިން 19 އަށެވެ. ޔޫރަޕް، މިޑްލް އީސްޓް އަދި އެފްރިކާގައި މިމަހުގެ 23 އިން 25 އަށް މި ހަރަކާތްކުރިއަށްދާއިރު ނޯތު އަދި ސައުތު އެމެރިކާގައި އައިއެލްޓީއެމް ވަރލްޑް ޓުއަރ ކުރިއަށްދާނީ އަންނަ މަހުގެ 1 އިން 3 ވަނަ ދުވަހުގެ ނިޔަލަށެވެ. މި މުޅި އިވެންޓްގައި ބައިވެރިވުމަށް އެމްއެމްޕީއާރުސީން ވަނީ ނިންމާފައެވެ.

ކޯވިޑް19 ގެ ސަބަބުން މިއަހަރުގެ މި އިވެންޓް ކުރިއަސްދާނީ ވަރޗުއަލްކޮށްނެވެ. ނަމަވެސް އިވެންޓް އިންތިޒާމްކުރި ފަރާތުން ވަނީ ވިޔަފާރިވެރިންނަށް ޙާއްސަ ފުރުސަތުތަކެއް ފަހިކޮށްދީފައެވެ. އެގޮތުން ގަނެވިއްކުމުގެ މަރުހަލާ ކުރިއަށް ގެންދާނެ ފުރުސަތާއި ބައްދަލުވުންތައް ބޭއްވުމުގެ ފުރުސަތާއި ލީޑްތައް ބެލެހެއްޓުމަށް ޚާއްސަ ޑޭޝްބޯޑެއް ބޭނުން ކުރުމުގެ ފުރުސަތު ވަނީ ވިޔަފާރިވެރިންނަށް ފަހިކޮށްދީފައެވެ.

އެމްއެމްޕީއާރުސީގެ އިތުރުން ރާއްޖޭގެ ބައެއް ރިސޯޓްތަކުންވެސް މި އިވެންޓްގައި ބައިވެރިވެއެވެ. އެގޮތުން ކޮންރަޑް މޯލްޑިވްސް ރަންގަލި އަދި ވިލާ ހޮޓެލްސް އެންޑް ރިސޯޓްސް ހިމެނެއެވެ.
މި އިވެންޓްގައި އެމްއެމްޕީއާރުސީން ބޮޑަށް ރާއްޖެ އިޝްތިހާރުކުރާނީ ރާއްޖޭގެ ރަށްތައް ޤުދުރަތީ ގޮތުން އެކުލެވިފައިވުމުގެ ސަބަބުން ރާއްޖެއަކީ ފަތުރުވެރިންނަށް ރައްކާތެރި މާހައުލެއްކަމަށާއި، ކޯވިޑް-19ގެ ސަބަބުން އެޅިފައިވާ ހަރުދަނާ ރައްކާތެރި ކަމުގެ ފިޔަވަޅުތަކުގެ މައްޗަށެވެ.

advertisement