ޗައިނާގެ ލޯނުތަކާ ބެހޭ ގޮތުން ނަޝީދު ދެއްކެވި ވާހަކަތައް ސަރުކާރުން ދޮގުކޮށްފި

ޗައިނާގެ ލޯނުތަކާ ބެހޭ ގޮތުން މަޖިލީހުގެ ރައީސް މުހައްމަދު ނަޝީދު ދެއްކެވި ވާހަކަތައް ސަރުކާރުން ދޮގުކޮށްފިއެވެ.

ވެރިކަމަށް ދެ އަހަރު ފުރުން ފާހަގަކުރުމަށް އަންގާރަ ދުވަހު އެމްޑީޕީގެ ހަރުގޭގައި ވާހަކަ ދައްކަވަމުން ރައީސް ނަޝީދު ވިދާޅުވެފައި ވަނީ ބަޖެޓަށް ބުރަވެގެން އުޅެނީ މި ސަރުކާރުން ނެގި ލޯނުތައް ދައްކަންޖެހިގެން ނޫން ކަމަށާއި ކުރީގެ ސަރުކާރުން ޗައިނާ އިން ނެގި ލޯނުތައް ދައްކަންޖެހުމުން ކަމަށެވެ. އަދި ކޮވިޑްގެ ދަތިކަމުގެ ތެރޭގައި ތިބި އިރު ވެސް އެ ލޯނުތައް ދެއްކުމުގައި ޗައިނާ އިން ލުޔެއް ނުދޭތީ ވެސް ރައީސް ނަޝީދު ވަނީ ހިތްހަމަނުޖެހުން ފާޅުކުރައްވާފައެވެ.

advertisement

އެ ވާހަކަތަކަށް ރައްދު ދީ ރައީސް އޮފީހުގެ ތަރުޖަމާން އިބްރާހީމް ހޫދު ބައެއް މީޑިއާތަކަށް ވިދާޅުވެފައި ވަނީ ޗައިނާ އަށް ދައްކަންޖެހޭ ބައެއް ލޯނުތައް ޗައިނާ ސަރުކާރުން ފަސްކޮށްދީފައިވާ ކަމަށެވެ. އެ ގޮތުން ޗައިނާ އިން ލޯނަށް ލުއިދީފައި ވަނީ ޖީ20ގެ “ޑެޓް ސާވިސް ސަސްޕެންޝަން އިނިޝިއޭޓިވް” (ޑީއެސްއެސްއައި)ގެ ދަށުން ކަމަށެވެ. މިއީ ފަގީރު ގައުމުތަކުން ނަގާފައިވާ ލޯނުތަކަށް ލުޔެއް ހޯދައިދިނުމުގެ ގޮތުން ވޯލްޑް ބޭންކުގެ އިސްނެގުމެކެވެ. މީގެ ތެރޭގައި ޖީ20ގައި ހިމެނޭ އެހެން ގައުމުތަކުން ނަގާފައިވާ ލޯންތައް ދެއްކުމުގައި ވެސް ލުއި ދީފައި ވެއެވެ. ނަމަވެސް މި އިނިޝިއޭޓިވްގެ ދަށުން ލުއި ލިބެނީ އަންނަ އަހަރުގެ ފުރަތަމަ ހަ މަސް ދުވަހަށެވެ. އޭގެ ފަހުން ލޯނުތައް ދައްކަންޖެހެއެވެ.

ޗައިނާ އިން ނަގާފައިވާ ލޯންތަކަށް ލުއި ލިބިފައިވާ ކަމަށް މީގެ ކުރިން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވެސް ވަނީ ވިދާޅުވެފައެވެ. ޖޫން މަހު އެ މަނިކުފާނު ވިދާޅުވެފައި ވަނީ ޗައިނާ އަށް ލޯނު ދެއްކުމުގައި ލުއިތަކެއް ލިބިފައިވާ ކަމަށެވެ. އެ ގޮތުން ސީދާ ޗައިނާ ސަރުކާރަށް ދައްކަންޖެހެނީ 600 ވަރަކަށް މިލިއަން ޑޮލަރު (9.2 ބިލިއަން ރުފިޔާ) ކަމަށާއި އެ ފައިސާ ހަތަރު ވަރަކަށް އަހަރަށް ފަސްކޮށްދީފައިވާ ކަމަށް ރައީސް އޭރު ވިދާޅުވެފައި ވެއެވެ. މީގެ އިތުރުން ވެސް ސަރުކާރުން ސޮވެރިން ގެރެންޓީ ދީގެން ކުންފުނިތަކުން ނަގާފައިވާ ލޯނުތައް އެބަހުއްޓެވެ. އެ ލޯނުތައް ދެއްކުން ފަސްކުރުމަށް ކުންފުނިތަކާ މަޝްވަރާކުރައްވާ ކަމަށް ޗައިނާގެ ސަފީރު ޒަަންގް ލިއޮންގް ކުރިން ވިދާޅުވެފައި ވެއެވެ.

ރައީސް އޮފީހުން މިހެން ވިދާޅުވި އިރު ޗައިނާގެ ލޯނުތަކާ ގުޅިގެން މަޖިލީހުގެ ރައީސް ނަޝީދު ވަނީ ޗައިނާ އަށް ވަރަށް ބޮޑަށް ފާޑު ވިދާޅުވެފައެވެ.

“މި ބަލި ހާލުގައި އަޅުގަނޑުމެންގެ އަތުން ފައިސާ ނަގަން ޗައިނާ ސަރުކާރުން އުޅެގެން ނުވާނެ. މިއީ އިންސާފެއް ނޫން، މިއީ ދުނިޔެ ދަންނަ އިންސާފެއް ނޫން،” މަޖިލީހުގެ ރައީސް ވިދާޅުވިއެވެ.

ނަޝީދު ވިދާޅުވީ މި އަހަރުގެ ބާކީ އޮތް ދެ މަހެއްހާ ދުވަހު އެކަނި ވެސް ޗައިނާ އަށް 83 މިލިއަން ޑޮލަރު ދައްކަންޖެހިފައި އެބަ އޮތް ކަމަށެވެ.

ކުރީގެ ސަރުކާރުން ޗައިނާ އާއި އެހެން ތަންތަނުން ނެގި ލޯނަށް އަންނަ އަހަރު ވެސް އަނބުރާ ދައްކަންޖެހޭ އަދަދު ފަސް ބިލިއަން ރުފިޔާ އަށް އަރާ ކަމަށް ވެސް އެމަނިކުފާނު ކުރިން ވިދާޅުވެފައި ވެއެވެ. އޭގެ ތެރެއިން 80 ޕަސެންޓަކީ ޗައިނާ އަށް ދައްކަންޖެހޭ ފައިސާ ކަމަށާއި އަންނަ އަހަރު އެ ފައިސާ ދެއްކެން ނެތުމުން ދެން ހަދަންޖެހޭ ގޮތަކީ ދަރަނި ދެއްކުމަށް ދަރަނި ނެގުން ކަމަށް ވެސް ރައީސް ނަޝީދު ވިދާޅުވެފައި ވެއެވެ.

“ދުނިޔޭގެ ވެރިކަމަށް އައުމަށް ތައްޔާރުވެ މަސައްކަތް ކުރަމުން އަންނަ ޗައިނާއިން އަންގަނީ އަޅުގަނޑުމެން މި ހަތަރު ލައްކަ މީހުންގެ އާބާދީއެއް އޮތް ގައުމު ކައިރީގައި އަޅުގަނޑުމެންގެ ފައްޓަރު ބައި ވިއްކާލާފައި އަވަހަށް ލޯނު ދައްކާށޭ،” ރައީސް ނަޝީދު ވިދާޅުވިއެވެ.

ރައީސް ނަޝީދުގެ މި ވާހަކަތަކަށް ޗައިނާގެ ސަފީރު ވެސް ވަނީ ނުސީދާ ގޮތެއްގައި ރައްދު ދެއްވާފައެވެ. ޗައިނާގެ ސަފީރު ޒަންގް ލިއޮންގ މިއަދު ވަނީ ފޮރިން މިނިސްޓަރު އަބްދުﷲ ޝާހިދާ ބައްދަލުކުރައްވާފައެވެ. އަދި ލޯންތަކާ ބެހޭ ގޮތުން މަޝްވަރާކުރެއްވި ކަމަށް ވިދާޅުވެފައި ވެއެވެ.