މިއަހަރުގެ ނިޔަލަށް އެޗްޑީސީން ކުލިތަކަށް ލުއިދެނީ

ކޯވިޑް19އާ ގުޅިގެން ސަރުކާރުގެ އިކޮނޮމިކް ރިކަވަރީ ޕްލޭންގެ ދަށުން ހައުސިންގް ޑިވެލޮޕްމަންޓް ކޯޕަރޭޝަން، އެޗް.ޑީ.ސީ އަށް ދަކަން ޖެހޭ ކުއްޔަށް ލުއި ދިނުމަށް ނިންމި ނިންމުން މި އަހަރުގެ ނިޔަލަށް އިތުރުކޮށްފިއެވެ.

މި ބަދަލާއިއެކު އެޗްޑީސީން ދޫކޮށްފައިވާ ފްލެޓު، ގޯތި، ރޯހައުސް އަދި ކޮމާޝަލް ޔުނިޓްތަކާއި ސިނާޢީ ބިންތަކަށް މިއަހަރުގެ އޭޕްރީލްމަހުން ފެށިގެން އިންސްޓޯލްމަންޓާއި ކުލީގެ 30 އިންސައްތައަށްވާ ފައިސާ ދެއްކުން ފަސްކޮށްދިނުމަށް ނިންމާފައިވާ ނިންމުން ޑިސެމްބަރުމަހުގެ ނިޔަލަށް ވަނީ އިތުރުކޮށްފައެވެ. އަދި ތިލަފުއްޓާއި ގުޅީފަޅުން ކުއްޔަށް ދޫކޮށްފައިވާ ކޮމާޝަލް ޔުނިޓްތަކާއި، ސިނާޢީ ބިންތަކަށްވެސް މި ލުއި ދިނުމަށް އެކޯޕަރޭޝަނުން ވަނީ ނިންމާފައެވެ.

advertisement

އެޗްޑީސީން ނެރުނު އިއުލާނެއްގައި ބުނީ އޭޕްރީލް މަހުން ފެށިގެން ކުލި/އިންސްޓޯލްމެންޓްގެ ފައިސާ ފަސް ކުރަން ބޭނުންވާ މީހުން، އެކަމަށް އެދި އަންނަ މަހުގެ 31ގެ ނިޔަލަށް ފޯމު ހުށަހެޅޭނެ ކަމަށެވެ. އެކަމަކު އެގޮތަށް އެކަން ކުރެވޭނީ މިދިޔަ މާޗު މަހުގެ ނިޔަލަށް، ގަވައިދުން ފައިސާ ދައްކާފައިވާ ފަރާތްތަކަށް ކަމަށް އިއުލާނުގައި ވެ އެވެ. އަދި އެއާއެކު، ކޮންމެ މަހަކު ދައްކަން ޖެހޭ ކުއްޔާއި އިންސްޓޯލްމެންޓްގެ 70 ޕަސެންޓްގެ ފައިސާ އެ ކޯޕަރޭޝަނަށް ދައްކާ ހަލާސް ކުރުމުގެ ފުރުސަތު އަންނަ އަހަރުގެ ޖެނުއަރީގެ ނިޔަލަށް ދީފައިވާ ކަމަށް ވެސް އެޗްޑީސީން ބުންޏެވެ.

އޭގެ އިތުރުން، ޑައިރެކްޓް ޑެބިޓް އުސޫލުން ބޭންކް އޮފް މޯލްޑިވްސް މެދުވެރިކޮށް ފްލެޓް، ގޯތި އަދި ރޯހައުސްއަށް އިންސްޓޯލްމަންޓް ފައިސާ ދައްކާ މީހުންގެ ތެރެއިން އިންސްޓޯލްމަންޓް ދެއްކުން ފަސްކުރުމަށް މިހާރު ފޯމު ހުށަހަޅާފައިވާ މީހުން، ކުރިއަށް އޮތް ދުވަސްތަކުގައި ވެސް އިންސްޓޯލްމަންޓްގެ 30 ޕަސެންޓް ރީފަންޑް ކުރަން ބޭނުން ނަމަ އެކަން އެންގުމުން ހަމަޖައްސައިދޭނެ ކަމަށް އެޗްޑީސީން ބުންޏެވެ.

ކުއްޔަށް ލުއި ދިން މަސްތަކުގެ ފައިސާ އަނބުރާ ދައްކަން އެއް އަހަރަށް ވުރެން ދިގު ނޫން މުއްދަތެއް ދޭނެ ކަމަށް ވެސް އެތަނުން ބުންޏެވެ. ފައިސާ ދައްކަން ފަށަން ޖެހޭނީ އަންނަ އަހަރުގެ ފެބުރުއަރީން ފެށިގެންނެވެ.