އީސީގެ ނައިބު ރައީސް އަކްރަމް އިސްތިއުފާ ދެއްވައިފި

އަންހެން މުވައްޒަފުންތަކަކަށް ފުރައްސާރަކުރުމުގެ ތުހުމަތުގައި މަގާމުން ވަކިކުރަން މިނިވަން މުއައްސަސާތަކުގެ ކޮމިޝަނުން ނިންމާފައި ވަނިކޮށް އިލެކްޝަންސް ކޮމިޝަންގެ ނައިބު ރައީސް އަހްމަދު އަކްރަމް އިސްތިއުފާ ދެއްވައިފިއެވެ.

ރައީސް އޮފީހަށް އަކްރަމް ފޮނުއްވި ސީޓިގައި ވިދާޅުވެފައި ވަނީ އޭނާގެ މައްޗަށް ތުހުމަތުކުރެވޭ މައްސަލައަކާ ގުޅިގެން މަގާމުން ވަކިކުރަން މަޖިލީހުގެ ތަޅުމަށް ފޮނުވަން އެ ކޮމިޝަންގެ އަގުލަބިއްޔަތުން ނިންމާފައިވާތީ އެ ކޮމިޓީގެ އިތުބާރު ނެތި މިނިވަން މުއައްސަސާއެއްގެ މެންބަރުކަމުގައި ދެމިހުރުމަކީ އެންމެ ރަނގަޅު ގޮތް ކަމަށް ދެކެވަޑައިނުގަންނަވާ ކަަމަށެވެ.

advertisement

އެހެންނަމަވެސް އަކްރަމް ވަނީ އޭނާގެ މައްޗަށް ކުރެވޭ ތުހުމަތުތަކަށް އިންކާރުކުރައްވާފައެވެ. ސިޓީގައި އޭނާ ވިދާޅުވީ މަޖިލީހުގެ މިނިވަން މުވައްސަސާތަކާއި ބެހޭ ކޮމެޓީއަށް ހުށަހަޅާފައިވާ މައްސަލައަކީ ވަކި ބައެއްގެ ރޭވުމެއްގެ ތެރެއިން ކަނޑައެޅިގެން ހަގީގަތާ ހިލާފު ވާހަކަތަކެއްގެ މައްޗަށް ބިނާކޮށް ހުށަހަޅާފައިވާ މައްސަލައެއް ކަމަށެވެ.

“އެ މައްސަލާގައި ތުހުމަތުކޮށްފައިވާ އެއްވެސް ކަމެއް އަޅުގަނޑުގެ ފަރާތުން ހިނގާފައިނުވާކަމުގެ ފުރިހަމަ ޔަގީންކަން އަރުވަމެވެ،” އަކްރަމް ވިދާޅުވެފައި ވެއެވެ.

އީސީގެ މެމްބަރުކަމަށް ދެވަނަ ދައުރަކަށް މިދިޔަ މާޗް މަހު މަޖިލީހުން އައްޔަންކުރި އަކްރަމް ވިދާޅުވީ އެކަން ހިނގާ ދިޔަ ގޮތް ހެއްކާ އެކު މަޖިލީހަށް ހުށަހަޅުއްވާފައިވާ ކަަމަށެވެ.