އިމްރާންގެ އިތުބާރު ނެތް ކަމަށް ހުށަހެޅި މައްސަލަ ފާހެއް ނުވި!

ހޯމް މިނިސްޓަރު އިމްރާން އަބްދުﷲގެ އިތުބާރު ނެތް ކަމަށް އިދިކޮޅުން މަޖިލީހަށް ހުށަހެޅި މައްސަލައާ ދެކޮޅަށް މަޖިލީހުގެ މެޖޯރިޓީން ވޯޓު ދީފިއެވެ.

މަޖިލީހުގައި ނެގި ވޯޓުގައި އެ މައްސަލަ އަށް ތާއިދުކޮށްފައި ވަނީ 11 މެންބަރުންނެވެ. ވަޒީރެއްގެ އިތުބާރު ނެތް ކަމަށް މަޖިލީހަށް ހުށަހެޅެނީ ވެސް 10 މެންބަރުންގެ ސޮޔާ އެކުއެވެ. އެ މައްސަލަ ހުށަހެޅީ ވެސް 11 މެންބަރުންގެ ސޮޔާ އެކުގައެވެ.

advertisement

އިމްރާންއާ ދެކޮޅަށް އެމްޑީޕީގެ ބައެއް މެންބަރުން މަޖިލީހުގައި ވާހަކަ ދެއްކެވި ނަމަވެސް އެމްޑީޕީން މީގެ ކުރިން ވަނީ އިމްރާނަށް އިތުބާރު އޮތް ކަމަށް ތްރީ ލައިން ވިޕެއް ނެރެފައެވެ. އެހެންކަމުން މަޖިލީހުގައި މެޖޯރިޓީ އޮތް އެމްޑީޕީގެ މެންބަރުން ވޯޓު ދިނީ އެ މައްސަލައާ ދެކޮޅަށެވެ.

އިމްރާންގެ މައްސަލަ އިދިކޮޅުން މަޖިލީހަށް ހުށަހެޅީ މަޖިލީހުގެ ކުރީގެ މެންބަރު އަދި ދީނީ އިލްމުވެރިޔާ ޑރ. އަފްރާޝީމް އަލީ އާއި ނޫސްވެރިޔާ އަހްމަދު ރިލްވާން މަރާލި މައްސަލައާ ގުޅިގެން މޭޑޭ އެއްވުމުގައި އިމްރާން ދެކެވި ވާހަކަފުޅުތަކެއްގައި އެ ކަންކަމުގެ އެކި ހުރި ކަމަށް ވިދާޅުވެ ނަމަވެސް އެ ހެކިތައް މިހާރ ނެތް ކަމަށް ދާދި ފަހުން މަޖިލީހުގައި ވިދާޅުވުމާ ގުޅިގެންނެވެ. މީގެ އިތުރުން ހުޅުމާލެ ފަޅުތެރޭގައި އޮތް ސަފާރީއެއްގައި އަންހެނަކަށް ޖިންސީ ގޯނާކުރި ކަމަށް ބުނާ މައްސަލައަކީ އާދައިގެ ކަމެއްގެ ގޮތުގައި ސިފަކުރެއްވުމަކީ ވެސް އިމްރާންގެ އިތުބާރު ނެތްކަމުގެ މައްސަލަ ހުށަހެޅި ސަބަބުތަކުގެ ތެރޭގައި ހިމެނޭ ކަމެކެވެ.

މި މައްސަލަ އަށް ޖަވާބު ދެއްވަމުން މިނިސްޓަރު އިމްރާން ވިދާޅުވީ މިއީ ވުޖޫދުގައި ވެސް ނެތް މައްސަލައެއް ކަމަށާއި އަދި މައްސަލަ ހުށަހެޅީ މިދިޔަ ދެ އަހަރުގެ ތެރޭގައި ސަރުކާރުން ހޯދި ކާމިޔާބީ “ފުރޮޅައިލުމަށް” ކަމަށެވެ.