32 ދައުވާއަކަށް ޒިޔަތު އެއްބަސްވެ ދައުލަތާ އެކު އެއްބަސްވުމަކަށް!

މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްޓީޑީސީ)ގެ ބޮޑު ހިޔާނާތާ ގުޅިގެން އެ ކުންފުނީގެ ކުރީގެ މެނޭޖިންްގް ޑިރެކްޓަރު އަބްދުﷲ ޒިޔަތުގެ މައްޗަށް ދައުލަތުން އުފުލި 32 ދައުވާއަކަށް އޭނާ އެއްބަސް ވެއްޖެއެވެ.

ޒިޔަތުގެ މައްޗަށް އުފުލާފައިވާ ދައުވާތަކަށް އެއްބަސްވެ ދައުލަތާ އެކު އެއްބަސްވުމެއް ހަދާފައިވާކަން ހާމަކުރީ ވެސް އޭނާ އަމިއްލައަށް ސުޕްރީމް ކޯޓުގައި މިއަދު އޮތް އަޑުއެހުމެއްގައެވެ.

advertisement

މި އަޑުއެހުމަކީ މާބިންހުރާގެ މައްސްލާގައި ޒިޔަތުގެ މައްޗަށް ކޮށްފައިވާ ހުކުމް އޭނާގެ ފަރާތުން ސުޕްރީމް ކޯޓުގައި އިސްތިއުނާފުކުރުމަށް ފަހު އެ މައްސަލަ އަނބުރާ ގެންދިއުމަށް ހުށަހެޅުމުން ބޭއްވި އަޑުއެހުމެކެވެ.

މި އަޑުއެހުމުގައި ޒިޔަތު ބުނީ މައްސަލަ އަނބުރާ ގެންނަން ބޭނުންވީ ދައުލަތާ އެކު އިއުތިރާފުގެ އެއްބަސްވުމެއް ހަދާފައިވާތީ ކަމަށެވެ. ޕްރޮސެކިއުޓާ ޖެނެރަލް އޮފީހުގެ ވަކީލުން ވެސް ވަނީ އެއްބަސްވުމެއް ހަދާފައިވާ ކަމަށް ވިދާޅުވެފައެވެ.

ޕީޖީގެ ވަކީލް ވިދާޅުވީ އެއްބަސްވުމެއް ހަދާފައި ވަނީ ފުލުހުންނާއި އެންޓި ކޮރަޕްޝަން ކޮމިޝަންގެ އިތުރުން ކޮރަޕްޝަންގެ މައްސަލަތައް ތަހުގީގުކުރުމަށް ރައީސުލްޖުމްހޫރިއްޔާ އުފައްދަވާފައިވާ ރިޔާސީ ކޮމިޝަންގެ ވެސް މަޝްވަރާގެ މަތިން ކަމަށެވެ.

މާބިންހުރާ މައްސަލާގައި ޒިޔަތުގެ މައްޗަށް އަށް އަހަރު ދުވަހުގެ ހުކުމެއް ކްރިމިނަކް ކޯޓުން ކޮށް ހައި ކޯޓުން ތާއީދުކޮށްފައި ވެއެވެ. ހުކުމެއްގައި ހުރި ނަމަވެސް މި ސަރުކާރުން އައި ފަހުން ޒިޔަތު ހުންނަނީ ގޭބަންދުގައެވެ. ޒިޔަތުގެ އިތުރުން އެމްއެމްޕީއާރުސީގެ ހިޔާނާތާ ގުޅިގެން ދައުލަތުން ދައުވާ އުފުލާފައިވާ ކުރީގެ ނައިބު ރައީސް އަހްމަދު އަދީބު ވެސް ވަނީ ދައުލަތާ އެކު އެއްބަސްވުމެއް ހަދާފައެވެ. އެ އެއްބަސްވުމާ އެކު ކްރިމިނަކް ކޯޓުން ވަނީ އަދީބުގެ މައްޗަށް 20 އަހަރަށް ޖަލަށް ލައި ދެ މިލިއަން ރުފިޔާގެ ޖޫރިމަނާގެ ހުކުމެއް ކޮށްފައި ވެއެވެ. ނަމަވެސް އަދީބު ވެސް  ހުންނެވީ ގޭބަންދުގައެވެ.