މާލެ ހޯރަފުށި ދަތުރުގެ ޑިމާންޑް ބޮޑުވެއްޖެ

ހޯރަފުށީ އެއާޕޯޓަށް މޯލްޑިވިއަނުން މި މަހު ކުރަން ނިންމި ދަތުރަށް ޑިމާންޑު ބޮޑުވެ، އިތުރު ދަތުރެއް ބާއްވަން ނިންމައިފިއެވެ.

ގައުމީ އެއާލައިން، މޯލްޑިވިއަން އިން މީގެ ކުރިން ނިންމާފައި އޮތީ ހޯރަފުށީ އެއާޕޯޓަށް މިމަހުގެ 26 ގައި ފުރަތަމަ ޝެޑިއުލް ދަތުރު ކުރުމަށެވެ. އެ ދަތުރަށް އޮތް ޑިމާންޑު ބޮޑުވެ މިމަހުގެ 28 ގައި އިތުރު ދަތުރެއް ބާއްވަން މިހާރު މޯލްޑިވިއަނުން ވަނީ ނިންމާފައެވެ.

advertisement

މޯލްޑިވިއަން އިން ނިންމާފައިވަނީ އަންނަ މަހުން ފެށިގެން ހޯރަފުއްޓަށް ހަފްތާއަކު ތިން ދަތުރު ބޭއްވުމަށެވެ. މޯލްޑިވިއަންގެ ހޯރަފުށީ ދަތުރުގެ އަގު އުޅެނީ މާލެ- ހޯރަފުށި އެއްކޮޅު ޓިކެޓު 1،113 ރުފިޔާ އަށެވެ.

ހޯރަފުށީ އެއާޕޯޓު ރަސްމީކޮށް ހުޅުވާފައިވަނީ މިދިޔަ ބުރާސްފަތި ދުވަހުއެވެ. އެއާޕޯޓަށް ޓެސްޓު ފްލައިޓު ޖެއްސީ މިމަހުގެ 16 ވަނަ ދުވަހުއެވެ.198  މިލިއަން ރުފިޔާ ޚަރަދުކޮށްގެން ހއ.ހޯރަފުށީގައި އެއަރޕޯޓެއް ތަރައްޤީކޮށްފައިވާއިރު މި އެއަރޕޯޓްގައި 1200 މީޓަރު ދިގު، 35 މީޓަރު ފުޅާ ރަންވޭއެއް އޮވެއެވެ. 8635 ސްކުއަރ މީޓަރުގެ އޭޕްރަން އަކާއި ޓެކްސީ ވޭއެއްގެ އިތުރުން ސާވިސް މަގުތަކާއި، 9473 ސްކުއަރ މީޓަރުގެ ޕާކިން އޭރިއާއަކާއި 1718 ސްކުއަރ މީޓަރުގެ ފަޔާ އެކްސެސް މަގެއްވެސް މި މަޝްރޫޢުގެ ދަށުން ވަނީ ތަރައްޤީކޮށްފައެވެ.