އިސްކަން ދެނީ ކުއްޔަކަށް ނޫން، ޖުމްލަ ފައިދާ އަށް: ފައްޔާޒް

މި ސަރުކާރުން އިސްކަންދެނީ ރިސޯޓްތަކުން ލިބޭ ކުއްޔަށް ނޫން ކަމަށާއި އޭގެ ބަދަލުގައި ޖުމްލަކޮށް ރިސޯޓްތަކުން ލިބޭ ފައިދާ އަށް ކަމަށް އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެއެވެ.

ޓުއަރިޒަމާ ބެހޭ ގާނޫނަށް ސަރުކާރުން ގެންނަ އިސްލާހްތަކާ ބެހޭ ގޮތުން މަޖިލީހުގައި ވާހަކަ ދައްކަވަމުން ފައްޔާޒް ވިދާޅުވީ މުހިންމީ ރިސޯޓްތަކުގެ ކުލި ނޫން ކަމަށާއި އޭގެ ބަދަލުގައި ތަފާތު ޓެކްސްތަކާއި އެ ރިސޯޓްގެ ސަބަބުން އެ ސަރަހައްދުގެ އެހެން ވިޔަފާރިތަައް ފުޅާވެގެން ދިއުން މުހިންމު ކަމަށެވެ. އެގޮތުން ބީޕީޓީ އާއި ޓީޖީއެސްޓީ ފަދަ ޓެކްސްތަކާއި އެ ރިސޯޓްތަކުގެ ވަށައިގެން އުފެދޭ ކުދި ވިޔަފާރިތައް ފުޅާވެގެންދާ ކަމަށް ފައްޔާޒް ވިދާޅުވިއެވެ.

advertisement

“ރަށްރަށުގެ މަސްވެރިން މަސްވިއްކުން، ފަރުމަސް ވިއްކުން، ފަންގިވިނުން، ވަޒީފާތައް، މި ހުރިހާ އެއްޗެއް،” އިކޮނޮމިކް މިނިސްޓަރު ވިދާޅުވިއެވެ.

ފައްޔާޒް ޓުއަރިޒަމްގެ ފައިދާ އެކަށީގެންވާ ގޮތެއްގައި ލިބެން އޮތީ ގިނަ އަދަދެއްގެ ޓުއަރިސްޓުން ރާއްޖެ އަށް ގެނެވިގެން ކަމަށެވެ. އެކަން ކުރުމަށް އެއާޕޯޓާއި އެނދު ކެޕޭސިޓީ އާއި އެ ނޫން ވެސް އެތައް ކަމެއް އިތުރުވެ ރަނގަޅުވާން އެބަޖެހޭ ކަމަށް މިނިސްޓަރު ވިދާޅުވިއެވެ. އެ ގޮތުން މިހާރު ދޫކޮށްފައި ހުރި ރަށްތައް ތަރައްގީކުރުމާއި އާ ރަށްތަކާއި އެއާޕޯޓްތައް ތަރައްގީކުރުން މުހިންމު ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ދޫކޮށްފައި ހުރި ރަށްތަކުގެ މަސައްކަތް ނުނިމި ހުރުމުގައި ވަރަށް ގިނަ ސަބަބުތައް އެބަހުރި ކަމަށެވެ. އެ ގޮތުން  ރާއްޖޭގެ ސިޔާސަތުތައް އަވަސް އަވަހަށް ބަދަލުވުމާއި އަދުލު އިންސާފުގެ ދާއިރާގެ އިތުބާރު ގެއްލިފައިވުން ހިމެނޭ ކަމަށެވެ. ޓުއަރިޒަމްގެ ގާނޫނަށް ސަރުކާރުން އިސްލާހްތަކެއް ހުށަހެޅުމުގެ މައިގަނޑު ބޭނުމަކީ ވެސް ގިނަ ދުވަސް ވެފައި ހުރި ރަށްތައް ތަރައްގީކުރުމަށް މަގުފަހިކުރުން ކަމަށެވެ. އެގޮތުން ލުއިތަކެއް ދޭންޖެހޭ ކަމަށް ގަބޫލުކުރައްވާ ކަމަށް ވެސް ފައްޔާޒް ވިދާޅުވިއެވެ.