އެންމެ ގިނަ ގެސްޓްހައުސް ހުޅުވާފައި ވަނީ ކ. އަތޮޅުން، އެއީ 37 ގެސްޓްހައުސް

މިހާތަނަށް އެންމެ ގިނަ އަދަދެއްގެ ގެސްޓްހައުސް ހުޅުވާފައިވަނީ ކ. އަތޮޅުންކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ކޯވިޑް19 ގެ ސަބަބުން ރާއްޖޭގެ ގެސްޓްހައުސްތައް ބަންދުކޮށްފައި އޮތުމަށްފަހު އަލުން ގެސްޓްހައުސް ހުޅުވާލުމުގެ ހުއްދަ ޓޫރިޒަމް މިނިސްޓްރީން ދޫކޮށްފައިވަނީ އޮކްޓޯބަރ މަހުގެ 15 ވަނަ ދުވަހުއެވެ.

advertisement

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ކ.އަތޮޅުގެ 7 ރަށެއްގައި 37 ގެސްޓްހައުސެއް ހުޅުވުމުގެ ހުއްދަ ވަނީ ދީފައެވެ. މި 37 ގެސްޓްހައުސްގެ ބެޑް ކެޕޭސިޓީއަކީ 1028 އެވެ.

ކ. އަތޮޅުން ގެސްޓްހައުސް ހުޅުވުމުގެ ހުއްދަ މިހާތަނަށް ދީފައިވާ ރަށްރަށުގެ ތެރޭގައި ހިމެނެނީ ކ. ހުރާ، ކ. މާފުށި، ކ. ގުރައިދޫ، ކ. ހިންމަފުށި، ކ. ގުޅި، ކ. ތުލުސްދޫ އަދި ކ. ގާފަރެވެ.

ކ. އަތޮޅު ފިޔަވައި ދެން އެންމެ ގިނަ އަދަދަކަށް ގެސްޓްހައުސް ހުޅުވުމުގެ ހުއްދަ މިހާތަނަށް ދީފައިވަނީ އއ. އަތޮޅަށެވެ. އެއަތޮޅުގައި 34 ގެސްޓްހައުސެއްވަނީ އަލުން ހުޅުވާފައެވެ. އެއަތޮޅުގެ 4 ރަށެއްގައި ގެސްޓްހައުސްތައް އަލުން ހުޅުވާފައިވާއިރު، މިއީ ފަތުރުވެރިކަމުގެ 474 އެނދެވެ.

އއ. އަތޮޅުން މިހާތަނަށް ގެސްޓްހައުސް ހުޅުވުމުގެ ހުއްދަ ދީފައިވަނީ މަތިވެރި، އުކުޅަސް، ތޮއްޑޫ އަދި ރަސްދޫއަށެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިހާތަނަށް އަތޮޅުތެރޭގެ އެކި ރަށްރަށުން 112 ގެސްޓްހައުސްއެއް ހުޅުވުމުގެ ހުއްދަ ވަނީ ދީފައެވެ.