ދުނިޔޭގެ 16 ސަރަހައްދަކުން އަލުން ރާއްޖެއަށް ދަތުރުތައް ފަށައިފި

ދުނިޔޭގެ 16 ސަރަހައްދަކުން މިހާރު ރާއްޖެއަށް ދަތުރުކުރަމުން އަންނަކަމަށް މޯލްޑިވްސް އެއަރޕޯޓްސް ކޮންޕެނީ ލިމިޓެޑް، އެމްއޭސީއެލްއިން ހާމަކޮށްފިއެވެ.

އެމްއޭސީއެލްއިން އާންމުކޮށްފައިވާ ތަފާސްހިސާބުތައް ދައްކާގޮތުން ޖުލައި 15 ގައި ރާއްޖޭގެ ބޯޑަރު އަލުން ހުޅުވާލުމާއިއެކު ވެލާނާ އިންޓަނޭޝަނަލް އެއަރޕޯޓަށް އަންނަނީ 16 ސަރަހައްދަކުން ދަތުރުތައް ކުރަމުންނެވެ. އޭގެތެރޭގައި ގިނައީ އިންޑިއާގެ ސަރަހައްދުތަކެވެ. އިންޑިއާގެ 6 ސަރަހައްދެއް ހިމެނޭއިރު އެއީ ނިއުދިއްލީ، މުންބާއީ، ޗެންނާއީ، ބެންގަލޫރު، ކޮޗިން، އަދި ޓްރިވެންޑްރަމްއެވެ. އިންޑިއާގެ އިތުރުން އޭޝިއާ ސަރަހައްދުން ސަރީލަންކާގެ ކޮލަންބޯ، އާއި ބަންގްލަދޭޝްގެ ޑާކާއިންވެސް އަންނަނީ ރާއްޖެއަށް ދަތުރުތައް ކުރަމުންނެވެ.

މެދުއިރުމަތީގެ 4 ސަރަހައްދަކުން ރާއްޖެއަށް ދަތުރުތައް ކުރަމުންއަންނައިރު އޭގެތެރޭގައި ހިމެނެނީ ތުރުކީގެ އިސްތަންބޫލް، ޤަތަރުގެ ދޯހާ، ޔޫއޭއީގެ ދުބާއީ އާއި އަބޫދާބީއެވެ. ޔޫރަޕްގެ ސަރަހައްދުތަކުގެ ތެރޭގައި ލަންޑަން، ފްރެންކްފާޓް، އަދި ވިއެނާއިން އަންނަނީ ދަތުރުތައް ކުރަމުންނެވެ. މީގެއިތުރުން ރަޝިއާގެ މޮސްކޯއިންވެސް ކޯވިޑް-19 އަށްފަހު ރާއްޖެއަށް ޝެޑިއުލް ދަތުރުތައް ވަނީ ފަށާފައެވެ.

ޓޫރިޒަމް މިނިސްޓްރީން އެންމެފަހުން އާންމުކޮށްފައިވާ ތަފާސްހިސާބުތައް ދައްކާގޮތުން ބޯޑަރު ހުޅުވާލުމާއިއެކު މިހާތަނަށް ބައިނަލްއަޤްވާމީ 14 އެއަރލައިނަކުން އަންނަނީ ރާއްޖެއަށް ދަތުރުތައް ކުރަމުންނެވެ. އަދި ޑިސެމްބަރ މަސް ނިމުމުގެ ކުރިން އިތުރު 10 އެއަރލައިނަކުން ރާއްޖެއަށް ޝެޑިއުލް ދަތުރުތައް ކުރުމަށް ވަނީ ނިންމާފައެވެ.

advertisement