ރަޝިއާގެ އަޒުރު އެއާއިން ރާއްޖެއަށް ދަތުރުތަށް ފަށައިފި.

ރަޝިއާގެ މަޝްހޫރު އަޒުރު އެއާއިން ރާއްޖެއަށް ދަތުރުތަށް ފަށައިފިއެވެ.

އަޒުރު އެއަރގެ ދަތުރުތައް ރާއްޖެއަށް ކުރާނީ ރަޝިއާގެ މޮސްކޯއިން ވެލާނާ އިންޓަނޭޝަނަލް އެއަރޕޯޓަށެވެ. އަޒުރު އެއަރގެ ދަތުރުތައް ރާއްޖެއަށް ފެށީ އިއްޔެއެވެ. އެ އެއަރލައިންގެ ދަތުރުތައް ރާއްޖެއަށް ހަފްތާއަކު 1 ދަތުރު އެ އެއަރލައިނުން ރާއްޖެއަށް ބޭއްވުމަށް ވަނީ ނިންމާފައެވެ. މި ދަތުރު ކުރާނީ ހަފްތާގެ ހޮނިހިރު ދުވަހުއެވެ.

advertisement

މި ފްލައިޓުގައި 500އަށްވުރެ ގިނަ ފަސިންޖަރުން ރާއްޖެ ވަނީ އައިސްފައެވެ. މިކަމާގުޅިގެން ވެލާނާ އިންޓަނޭޝަނަލް އެއާޕޯޓުން ކުރި ޓްވީޓެއްގައި ބުނެފައިވަނީ މިއީ ރާއްޖޭގެ ބޯޑަރު އަލުން ހުޅުވުމާއެކު އެއް ފްލައިޓެއްގައި މިހާ ގިނަ ފަސިންޖަރުން އައި ފުރަތަމަ ފަހަރު ކަމުގައެވެ.

މިދިޔަ އަހަރުގެ ފިނި މޫސުމާއި ދިމާކޮށްވެސް އަޒުރު އެއަރއިން ވަނީ ޗާޓަރ ފްލައިޓްތަކެއްވެސް ރާއްޖެއަށް ބާއްވާފައެވެ. ކޯވިޑް-19 އަށްފަހު ރާއްޖޭގެ ބޯޑަރު އަލުން ހުޅުވާލުމާއިއެކު އެންމެ ގިނަ ފަތުރުވެރިން ރާއްޖެ އަންނަ އެއް ޤައުމަކީ ރަޝިއާއެވެ.

ރަޝިއާގެ އޭރޯފްލޮޓުން ވަނީ ރާއްޖޭގެ ބޯޑަރު ހުޅުވާލުމާއެކު އަލުން ރާއްޖެއަށް ދަތުރުތައް ފަށާފައެވެ. އަދި މިހާރު އެ އެއަރލައިނުން ވަނީ ރާއްޖެއަށް ކުރާ ދަތުރުތައް އިތުރުވެސްކޮށްފައެވެ. އަދި ރަޝިއާގެ ރޮސިޔާ އެއަރލައިނުންވެސްވަނީ މިމަހުގެ ތެރޭގައި ރާއްޖެއަށް ޝެޑިއުލް ދަތުރުތައް ފެށުމަށް ހަމަޖައްސާފައެވެ.

ރާއްޖޭގެ ބޯޑަރު އަލުން ހުޅުވިފަހުން އެންމެ ގިނަ ފަތުރުވެރިން ރާއްޖެއަށް އައިސްފައިވަނީ ރަޝިއާއިންނެވެ. މިހާތަނަށް ރަޝިއާއިން 14،855 ފަތުރުވެރިން ވަނީ ރާއްޖެ އައިސްފައެވެ.