ޑިފެންސް މިނިސްޓަރު މާރިޔާ އަހުމަދު ދީދީ، ސްރީލަންކާގެ ބޮޑުވަޒީރު މަހިންދަ ރާޖަޕަކްސައާ ބައްދަލު ކުރައްވައިފި

މިނިސްޓަރު މާރިޔާ ސްރީލަންކާއަށް ކުރައްވާ ރަސްމީ ދަތުރުފުޅަކީ ހަތަރުވަނަ “އެންއެސްއޭ ލެވަލް މީޓިން އޮން ޓްރައިލޭޓަރަލް މެރިޓައިމް ސެކިއުރިޓީ ކޯޕަރޭޝަން” ގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. 

ޑިފެންސް މިނިސްޓަރ މާރިޔާ އާއި ސްރީލަންކާގެ ބޮޑުވަޒީރު މަހިންދަ ރާޖަޕަކުސަ ބޭއްވެވި ބައްދަލުކުރެއްވުމުގައި ވަނީ ދެ ޤައުމު ގުޅިގެން ޑިފެންސް ކޯޕަރޭޝަންގެ ދާއިރާ މިހާރަށްވުރެ ބޮޑަށް ކުރިއެރުވުމާއި ކޯވިޑް-19އާ ގުޅިގެން ރައްކާތެރިވުމުގެ ގޮތުން އަޅާ ފިޔަވަޅުތަކާ ގުޅޭގޮތުން މަޝްވަރާކުރައްވާފައެވެ.

މީގެ އިތުރުން މިނިސްޓަރ ވަނީ ސްރީލަންކާގެ ޑިފެންސް ސެކްރެޓަރީ މޭޖަރ ޖެނަރަލް ރިޓަޔަރޑް ކަމަލް ގުނަރަޓަނެ އާ ވެސް ބައްދަލުކުރައްވާފައެވެ. ޑިފެންސް ސެކްޓަރީއާއެކު ބޭއްވި ބައްދަލުކުރެއްވުމުގައި ވަނީ ދެ ޤައުމުގެ ދެމެދުގައި ވާ ގާތްގުޅުމާއި އެއްގޮތް ކަންތައްތަކާ ގުޅޭގޮތުން މަޝްވަރާކުރައްވާފައެވެ. މީގެ އިތުރުން ދެޤައުމު ގުޅިގެން މަސައްކަތް ކުރުމާއި ޚާއްސަކޮށް މަސްތުވާތަކެތީގެ މައްސަލަތައް ހުއްޓުވުމަށް ކުރެވިދާނެ މަސައްކަތްތަކާ ގުޅޭގޮތުން މަޝްވަރާކުރެއްވިއެވެ. މިބައްދަލުވުމުގައި ޑިފެންސް ސެކްޓްރީ ވަނީ ދެ ޤައުމުންގުޅިގެން މަސައްކަތް ކުރުމަށް އެއްބާރުލުން ދެއްވާނެކަމަށް ވިދާޅުވެފައިވެއެވެ.

advertisement

އިއްޔެގެ ނިޔަލަށް ބޭއްވި “އެންއެސްއޭ ލެވަލް މީޓިން އޮން ޓްރައިލޭޓަރަލް މެރިޓައިމް ސެކިއުރިޓީ ކޯޕަރޭޝަން” ކުރިއަށް ގެންގޮސްފައިވަނީ ސްރީލަންކާގެ ކޮލަންބޯގައެވެ.