އެމްޕީއެލްގެ ޗެއާމަން މަގާމުން އިސްތިއުފާ ދެއްވައިފި

މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ އެތެރޭގެ ހިޔާނާތެއް ދާދި ފަހުން ފާޅާއަރުވާލެއްވި އެ ކުންފުނީގެ ޗެއާމަން މުހައްމަދު ޒަކީ (ނަޒާކީ ޒަކީ) އެ މަގާމުން އިސްތިއުފާ ދެއްވައިފިއެވެ.

ޒަކީ ވަނީ މީގެ ދުވަސްކޮޅެއް ކުރިން ލޮކްޑައުންގެ ތެރޭގައި އެ ކުންފުނީގެ އެތެރޭގައި ހިންގާފައިވާ ހިޔާނާތުގެ މައްސަލަތަކެއް ސޯޝަލް މީޑިއާގައި އާންމުންގެ ސަމާލު ކަމަށް ގެންނަވާފައެވެ.

advertisement

ޒަކީ ކުރެއްވި ޓްވީޓެއްގައި ވިދާޅުވެފައި ވަނީ އެމްޕީއެލްގެ އަށް މިލިއަން ރުފިޔާގެ ކޮރަޕްޝަންގެ މައްސަލައެއްގައި ތުހުމަތުކުރެވޭ މީހުން ސަސްޕެންޑްކުރުމަށް މަސައްކަތް ކުރެއްވުމުން ބޯޑުގެ ތާއީދު އެ ކަމަށް ނުލިބުނު ކަމަށެވެ. އަދި އެކަމާ މެދު ހިތާމަކުރައްވާ ކަމަށް ވެސް ވިދާޅުވެފައި ވެއެވެ. ޒަކީ ވިދާޅުވެފައިވާ ގޮތުން އެއީ ތެލާ ގުޅޭ ކޮރަޕްޝަންގެ މައްސަލައެކެވެ.

ނަމަވެސް ޒަކީގެ އެ ވާހަކަތައް އެމްޕީއެމް އިން ފަހުން ވަނީ ބަޔާނަކުން ދޮގުކޮށްފައެވެ. އެ ބަޔާނުގައި ބުނެފައި ވަނީ ކޮރަޕްޝަންގެ މައްސަލަތައް އާދައިގެ މައްސަލަތަކެއްގެ ގޮތުގައި އެ ކުންފުނިން ނުނަގާނެ ކަމަށާއި ތުހުމަތުކުރެވޭ ފަރާތްތައް މިހާރު ސަސްޕެންޑްކޮށްފައިވާ ކަމަށެވެ. ލޮކްޑައުންގެ ތެރޭގައި ހިނގާފައިވާ ކަމަށް ބެލެވޭ އެ މައްސަލާގައި އޮޑިްޓުން ފާހަގަކުރެވޭ ކަންކަން އިތުރަށް ތަހުގީގުކުރުމަށް އެންޓި ކޮރަޕްޝަން ކޮމިޝަން (އޭސީސީ) އާއި އޮޑިޓް އޮފީހާއި ފުލުހުންނަށް ވެސް ހުށަހަޅާފައިވާ ކަމަށް އެ ބަޔާނުގައި ވެއެވެ.

އެނގިފައިވާ ގޮތުގައި ޒަކީގެ ޓްވީޓާ ގުޅިގެން އެ ކުންފުނީގެ މެނޭޖިން ޑިރެކްޓަރު ޝާހިދު އަލީ ވަނީ ޕްރައިވަޓައިޒޭޝަން ބޯޑުގެ ސަމާލުކަމަށް އެކަން ގެންނަވާފައެވެ.

ޕްރައިވަޓައިޒޭޝަން ބޯޑުން އެމްޕީއެލްގެ ޗެއާމަން ކަމަށް ޒަކީ ހަމަޖެއްސީ މިދިޔަ އަހަރުގެ ފެބްރުއަރީ މަހުގެ ތެރޭގައެވެ. އެއީ އަދާލަތު ޕާޓީގެ ސްލޮޓެއްގައެވެ.