ފެނަކައަށް 35 މިލިއަން ރުފިޔާގެ ފައިދާއެއް

ފެނަކަ ކޯޕަރޭޝަނަށް ފައިދާގެ ގޮތުގައި 35 މިލިއަން ރުފިޔާ ލިބިފައިވާ ކަމަށް އެ ކުންފުނިން ބުނެފި އެވެ.

ފެނަކަ ކުންފުނީގެ އޮޑިޓް ރިޕޯޓުގައިވާ ގޮތުން ކުންފުންޏަށް މިދިޔަ އަހަރު އާމްދަނީގެ ގޮތުގައި، 1.4 ބިލިއަން ރުފިޔާ ލިބިފައިވެއެވެ. އަދި ޚަރަދު ކެނޑުމަށްފަހު ތިރީސް ފަސް މިލިއަން ނުވަ ލައްކަ ސާދަ ހާސް ހަ ސަތޭކަ ސާޅީސް ތިން ރުފިޔާ، ފައިދާގެ ގޮތުގައި އެކުންފުންޏަށް ވަނީ ލިބިފައެވެ.

2018 ވަނަ އަހަރު އެކުންފުންޏަށް އާމްދަނީގެ ގޮތުގައި 1.1 ބިލިއަން ރުފިޔާގެ ލިބިފައިވާއިރު، 143 މިލިއަން ރުފިޔާގެ ގެއްލުންވެފައި ވެއެވެ.

މިއީ ސަރުކާރު ޙިއްސާވާ ކުންފުންޏަކުން ދެއްކި އެންމެ ތަފާތު ބޮޑު ބަދަލުކަމަށް ފެނަކައިން ވިދާޅުވެއެވެ. ފެނަކައިން މިކަމާއި ގުޅިގެން ނެރުނު ނޫސް ބަޔާނުގައިވަނީ، މިއީ ވޭތުވެ ދިޔަ 2 އަހަރުގެ ތެރޭގައި ކުންފުނީގެ ހިންގުމަށް ގެނެވުނު އިންޤިލާބީ ބަދަލުތަކުގެ ނަތީޖާ ކަމަށެވެ.
ފެނަކައިން ނެރެފައިވާ ބަޔާނެއްގައި ބުނެފައިވަނީ 49 އާ އިންޖީނުގޭގެ މަސައްކަތް މުޅިން އަލަށް ފަށާ، 20 އިންޖީނުގެ އެއްކޮށް ނިންމާ އަދި ކަރަންޓުގެ 77 މެގަވަޓް އިންސްޓޯލްކޮށްފައިވާ ކަމަށެވެ. މީގެ އިތުރުން، މުޅި ރާއްޖޭގެ ހުރިހާ އިންޖީނުގެއެއް ސިންކްރޮނައިޒް ކުރެވިފައިވާ ކަމަށާއި ކަރަންޓު ވިއުގަ އަޕްގްރޭޑް ކޮށް ނަރުދަމާ އާއި ފެނުގެ ހިދުމަތް ކަށަވަރުކުރުމަށް ގިނަ މަސައްކަތްތަކެއް ކޮށްފައިވާ ކަމަށެވެ.

އެ ކުންފުނިން ބުނީ، މިދިޔަ އަހަރުގެ ރިޕޯޓަކީ އެ ކުންފުނީގެ ތާރީހުގައި މިހާތަނަށް ލިބުނު ހަމައެކަނި ސާފު އޮޑިޓް ރިޕޯޓު ކަމަށެވެ.

advertisement