ހިޔާގެ އެޗް7 ކެޓަގަރީ އިން ހާހަކަށް ވުރެ ގިނަ މީހުން ޑިސްކޮލިފައިކޮށް ވަގުތީ ލިސްޓް އާންމުކޮށްފި

ހިޔާ މަޝްރޫއުގެ ތެރެއިން އެންމެ ގިނަ މީހުން ކުރިމަތިލި އެޗް7 ކެޓަގަރީން ހާހަކަށް ވުރެ ގިނަ މީހުން ޑިސްކޮލިފައިކޮށް ވަގުތީ ލިސްޓް އާންމުކޮށްފިއެވެ.

މިދިޔަ ސަރުކާރު ނިމެމުން ދަނިކޮށް އިއުލާންކުރި ލިސްޓްތައް އަލުން ބަލައި ޗެކް ކުރުމަށް ފަހު މި ސަރުކާރުން އަންނަނީ ހިޔާ މަޝްރޫއުގެ ޝަރުތު ހަމަވާ ފަރާތްތަކުގެ ލިސްޓްތައް އަލުން އިއުލާންކުރަމުންނެވެ. އެ ގޮތުން މީގެ ކުރިން ވެސް ގިނަ ކެޓަގަރީތަކެއްގެ ވަގުތީ ލިސްޓް އާންމުކޮށްފައިވާ އިރު އެޗް7 އަކީ 18 އަހަރާއި 40 އަހަރާ ދެމެދުގެ ކައިވެނިކޮށްގެން އުޅޭ މީހުންގެ ކެޓަގަރީއެވެ. ހިޔާ ފްލެޓްތަކަށް 25،000 އަށް ވުރެ ގިނަ މީހުން ކުރިމަތިލި އިރު އެޗް7 ކެޓަގަރީން އެކަނި ވެސް 8،000 އަށް ވުރެ ގިނަ މީހުން ކުރިމަތިލާފައި ވެއެވެ. މި ސަރުކާރުން މި ކެޓަގަރީ އަށް މިހާރު ކަނޑައަޅާފައި ވަނީ 805 ފްލެޓެވެ.

advertisement

މި ކެޓަގަރީން 1248 މީހަކު ޑިސްކޮލިފައިކޮށްފައިވާ އިރު ގިނަ މީހުން ޑިސްކޮލިފައި ވެފައި ވަނީ މާލެ ސަރަހައްދު ނުވަތަ ކ. އަތޮޅު އެއްވެސް ރަށެއް ނުވަތަ ރިސޯޓެއްގައި ވަޒީފާ އަދާކުރާ މީހަކަށް ނުވުމެވެ. ނުވަތަ ވަޒީފާއެއްގައި އުޅޭކަމުގެ ލިޔުން ހުށަހަޅާފައި ނުވުން ފަދަ ކަންކަން ހިމެނެއެވެ. މި ކެޓަގަރީން ޝަރުތު ހަމަވާ ލިސްޓްގައި 7808 މީހަކު ހިމެނެއެވެ.

https://www.gazette.gov.mv/iulaan/view/138202

މިއީ މީގެ ކުރިން ވެސް އެންމެ މައްސަލަ ބޮޑުވި ކެޓަގަރީއެވެ. މިދިޔަ ސަރުކާރުން ލިސްޓް އެކުލަވައިލި އިރު ދިރިއުޅުމުގެ ހާލަތަށް 30 ޕޮއިންޓް ދީފައި ވެއެވެ. ނަމަވެސް ދިރިއުޅުމުގެ ހާލަތު ނުބަލައި ޕޮއިންޓް ދިން އުސޫލެއް އެނގެން ނެތް ކަމަށް މި ސަރުކާރުން ފްލެޓްތަކުގެ ކަންކަން ބަލާ ފަރާތްތަކުން ބުނެފައި ވެއެވެ. މި ސަރުކާރުން ލިސްޓްތައް ނެރެމުން ދަނީ ގޭގެއަށް ޒިޔާރަތްކޮށް ދިރިއުޅުމުގެ ހާލަތު ދެނެގަތުމަށް ފަހުއެވެ.

ހިޔާ މަޝްރޫއުގެ ދަށުން މިދިޔަ ސަރުކާރުން 16 ޓަވަރުގައި 7،000 ފްލެޓް އެޅުމުގެ މަސައްކަތް އައީ ކުރަމުންނެވެ. އެ ސަރުކާރު ނިމުނު އިރު މަޝްރޫއުގެ ބޮޑުބައި ނިމިފައިވީ ނަމަވެސް ގިނަ މަސައްކަތްތަކެއް އަދިވެސް ދަނީ ކުރަމުންނެވެ. ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީން ބުނެފައި ވަނީ ހިޔާ ފްލެޓްތައް މާޗް މަހު ހައްގުވެރިންނާ ހަވާލުކުރެވޭ ވަރު ވާނެ ކަަމަށެވެ. ނަމަވެސް ދެ ކޮޓަރީގެ މި ފްލެޓްތައް ދެނީ ފްނިޝިންގެ ބައެއް މަސައްކަތްތައް ނުނިންމައެވެ. އެ ގޮތުން ބައެއް ދޮރުތަކާއި ތަށިމުށި ޖެހުން މި މަޝްރޫއުގެ މަސައްކަތުގެ ތެރޭގައި މިދިޔަ ސަރުކާރުން ހިމަނާފައެއް ނުވެއެވެ. އަދި ފްލެޓްތަކަށް ބޭނުންވާ އަސާސީ ހިދުމަތްތައް ދޭނެ ޖާގަ ނެތުމުން މި ސަރުކާރުން މިހާރު ވަނީ ފްލެޓްތަކުގެ އަދަދު މަދުކޮށް ގްރައުންޑް ފްލޯގައި ވިޔަފާރި ފަދަ ކަންކަމަށް ހާއްސަކޮށްފައެވެ. އެހެން ކަމުން މިހާރު ދޫކުރުމަށް ހަމަޖައްސާފައި ވަނީ 6،720 ފްލެޓެވެ.