ދަތުރުތަކަށް ފަހު ކަރަންޓީން ވާންޖެހޭ މުއްދަތު 10 ދުވަހަށް ކުރުކޮށްފި

ޓުއަރިސްޓުން ފިޔަވައި ރާއްޖެއިން ބޭރުން އަންނަ މީހުންނާއި ރަށްތަކަށް ދަތުރުކުރާ އާންމު ފަރާތްތައް ކަރަންޓީން ވާންޖެހޭ މުއްދަތު 14 ދުވަހުން 10 ދުވަހަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިންމައިފިއެވެ.

ކަރަންޓީންވުމުގެ އުސޫލަށް ގެނައި ބަދަލުތަކަށް އަމަލުކުރަން ފަށާނީ ހުކުރު ދުވަހުން ފެށިގެންނެވެ. ދަތުރުތަކަށް ފަހު ކަރަންޓީން ވާންޖެހޭ މުއްދަތު މަދުކުރި ނަމަވެސް ޕޮސިޓިވްވާ ފަރާތްތަކާއި އެ ފަރާތްތަކާ ކޮންޓެކްޓް ވެގެން ކަރަންޓީން ވާންޖެހޭ މީހުން އަދިވެސް 14 ދުވަހުގެ މުއްދަތެއް ކަރަންޓީންގައި ހޭދަކުރަންޖެހޭ ކަމަށް އެޗްޕީއޭ އިން އަލަށް ގެނައި ބަދަލުގައި ބުނެފައި ވެއެވެ.

advertisement

މީގެ އިތުރުން މީހުން ދިރިއުޅޭ ހުރިހާ ރަށެއްގަ އާއި އެއާޕޯޓްތައް ހިމެނޭ ތަންތަނުގައި ވެސް މާސްކް އަޅަންޖެހޭނެ ކަމަށް އުސޫލަށް ގެނައި ބަދަލުގައި ހިމަނާފައި ވެއެވެ. ނަމަވެސް އެޗްޕީއޭ އިން ފަހުން ބުނެފައި ވަނީ އެއީ “އެދެވިގެންވާ” ކަމެއްގެ ގޮތުގައި ނިންމާފައެވެ. މީގެ ކުރިން މާސްކް އެޅުން މަޖުބޫރުކޮށްފައި ވަނީ ހަމައެކަނި ބަލި ފެތުރޭ ރަށްތަކުގަ އާއި ގެސްޓް ހައުސްތައް ހިންގާ ރަށްރަށުގައެވެ.

ކަރަންޓީން ވުމުގެ އުސޫލަށް ގެނައި އިތުރު ބަދަލުތަކުގެ ތެރޭގައި ކޮންމެހެން ރަށްތަކަށް ދަތުރުކުރަންޖެހޭ ހާލަތެއް މެދުވެރިވެގެން ދަތުކުރާ ފަރާތްތަކުން 72 ގަޑިއިރު ނުވާ ޕީސީއާރު ނެގެޓިވް ޓެސްޓެއް ހުށަހަޅައިފި ނަމަ އެ ފަރާތަކަށް ހުއްދަ ދޭ މުއްދަތަކަށް ދަތުރުކުރުނުގެ ފުރުސަތު ދޭ ގޮތަށް ހަމަޖައްސާފައިވުން ހިމެނެއެވެ. މީގެ ކުރިން ސަރުކާރާއި ކުންފުނިތަކުގެ މަސައްކަތްތައް ކުރުމަށް ކަރަންޓީންވުމަކާ ނުލައި ފަސް ދުވަހުގެ މުއްދަތަށް ދަތުރުކުރެވެއެވެ. މީގެ ކުރިން އެކި މަސައްކަތްތަކުގައި ދަތުރުކުރާ އިރު ޕީސީއާރު ޓެސްޓްގެ ނަތީޖާ ހުށަހަޅާކަން ނުޖެހެއެވެ.

ކަރަންޓީން ވާންޖެހޭ މުއްދަތު ރާއްޖެއިން 10 ދުވަހަށް ބަދަލުކޮށްފައިވާ އިރު ބޭރުގެ އެހެން ބައެއް ގައުމުތަކުގައި ވެސް މި މުއްދަތު ވަނީ ކުޑަކޮށްފައެވެ. އެ ގޮތުން ބައެއް ގައުމުތަކުގައި ހަތް ދުވަސް ވެސް ވަނީ ކަނޑައަޅާފައެވެ.