މިހާތަނަށް 1137 ފަތުރުވެރިން މާފުއްޓަށް އައިސްފި

ގެސްޓްހައުސް ސިނާއަތް އަލުން ހުޅުވާލުމާއިއެކު މިހާތަނަށް މާފުއްޓަށް 1137 ފަތުރުވެރިން އައިސްފައިވާކަމަށް އެރަށުން ހާމަކޮށްފިއެވެ. ކޯވިޑް19 އަށްފަހު އަލުން ގެސްޓްހައުސް ސިނާއަތް ހުޅުވާލާފައިވަނީ މިދިޔަ އޮކްޓޯބަރ މަހުގެ 15 ވަނަ ދުވަހުއެވެ. މިހާތަނަށް މާފުށީގެ 14 ގެސްޓްހައުސްއެއް ހުޅުވުމުގެ ހުއްދަ ޓޫރިޒަމް މިނިސްޓްރީން ވަނީ ދީފައެވެ.

އޮކްޓޯބަރ މަހުގެ 15 ވަނަ ދުވަހުން ފެށިގެން ޑިސެމްބަރ 1 ވަނަ ދުވަހުގެ ނިޔަލަށް މާފުއްޓަށް އައިސްފައިވަނީ 1137 ފަތުރުވެރިންކަމަށް ތަފާސްހިސާބުތަކުން ދައްކައެވެ. މީގެތެރެއިން ބައެއް ފަތުރުވެރިން ވަނީ ޕޮޒިޓިވްވެސް ވެފައެވެ. ތަފާސްހިސާބުތައް ދައްކާގޮތުން މާފުއްޓަށް އައި ފަތުރުވެރިންގެ ތެރެއިން މިހާތަނަށް ޕޮޒިޓިވް ވެފައިވަނީ ޖުމްލަ 11 ފަތުރުވެރިންނެވެ. މީގެތެރެއިން މިހާތަނަށް 5 ފަތުރުވެރިއަކު ވަނީ ރަނގަޅުވެފައެވެ.

advertisement

ކ. މާފުއްޓަކީ ރާއްޖޭގައި ގެސްޓު ހައުސް ވިޔަފާރި އެންމެ ފުޅާ ދާއިރާއެއްގައި ކުރަމުން އަންނަ ރަށެވެ. މާފުށީގައި މުޅި ޖުމްލަ 42 ގެސްޓްހައުސް އަންނަނީ އޮޕަރޭޓްކުރަމުންނެވެ. ކޯވިޑް19 ގެ ސަބަބުން ގެސްޓްހައުސް ސިނާއަތް ބަންދުކޮށްފައި އޮތުމަށްފަހު އެންމެ ފުރަތަމަ ފަތުރުވެރިންނަށް ހުޅުވާލާފައިވަނީވެސް މާފުށީގެ ގެސްޓްހައުސްތަކެވެ.

އެޗްޕީއޭއިން އެންމެފަހުން ކަނޑައަޅާފައިވާ ގައިޑްލައިންގައިވާގޮތުން ރާއްޖޭގެ ގެސްޓްހައުސް ހިންގާ ރަށްރަށުގެ މީހުން ބޭރަށްދާއިރު މާސްކް އެޅުމަކީ މަޖުބޫރުކަމެކެވެ. އަދި ބޭރަށް ނިކުމެއުޅޭއިރު އިޖްތިމާއީ ގައިދުރުކަން އެކަކުއަނެކަކާއި ދެމެދު ބަހައްޓަންޖެހެއެވެ.