ސަރުކާރުގެ ސިޔާސަތަކީ ހުރިހާ ރައްޔިތުންނަށް ހިލޭ ވެކްސިން ފޯރުކޮށްދިނުން: ރައީސް

ސަރުކާރުގެ ސިޔާސަތަކީ، އެއްވެސް ރައްޔިތަކު ބާކީނުކޮށް، ރާއްޖޭގެ ހުރިހާ ރައްޔިތުންގެ އިތުރުން ރާއްޖޭގައި ދިރިއުޅޭ ހުރިހާ އެންމެންނަށް ހިލޭ ކޮވިޑް-19ގެ ވެކްސިން ފޯރުކޮށްދިނުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.

ލ. އަތޮޅަށް ރައީސް އިބްރާހީމް މުހައްމަދު ސޯލިހް މިހާރު ކުރައްވަމުން ގެންދާ ދަތުރުފުޅުގައި ލ. ގަމުގައި ވާހަކަފުޅު ދައްކަވަމުން ވިދާޅުވީ ކޯވިޑުގެ ބަލިން ސަލާމަތްވުމަށްޓަކައި މުޅި ދުނިޔެ އެކީގައި ގިނަ މަސައްކަތްތަކެއް މިހާރު ކުރަމުން އަންނަ ކަމަށާއި އެގޮތުން، އެ ބައްޔަށް ވެކްސިނެއް ހޯދުމުގެ އެންމެފަހުގެ މަރުޙަލާތައް ނިމި، ރައްޔިތުންނާ ހިސާބަށް އެ ވެކްސިން ފޯރުކޮށްދިނުމުގެ މަސައްކަތް، ގިނަ ޤައުމުތަކުގައި ކުރަމުން އަންނަ ކަމަށެވެ.

advertisement

ރައީސް މީގެ ކުރިން ވިދާޅުވެފައި ވަނީ އަންނަ އަހަރުގެ ތެރޭގައި ރާއްޖެ އަސް ވެކްސިން ލިބޭނެ ކަމަށެވެ. އަދި ހުރިހާ ރައްޔިތުންނަށް ވެކްސިން ހޯދައިދޭނެ ކަމަސް ހެލްތު މިނިސްޓްރީން ބުނެފައި ވެއެވެ. ސަރުކާރުން ވެސް އަންނަނީ ވެކްސިން ލިބުމުގެ ކުރިން ވާންޖެހޭ ތައްޔާރީތައް ވަމުންނެވެ. އެގޮތުން ވެކްސިން އެންމެ ފުރަތަމަ ދޭނެ ފަރާތްތައް ކަނޑައެޅުމާއި ވެކްސިން ރައްކާތެރިކަމާ އެކު ބަހައްޓާނެ އިންތިޒާމުތައް ހަމަޖެއްސުން ހިމެނެއެވެ.

ރާއްޖެ އިން ހޯދަން މަސައްކަތްކުރަމުންދަނީ އޮކްސްފަޑް ޔުނިވަސިޓީ އާއި އެސްޓްރަޒެނިކާގެ ވެކްސިނާއި މޮޑާނާގެ ވެކްސިނެވެ. ހަމަހަމަކަމާ އެކު ގައުމުތަކަށް ވެކްސިން ލިބޭނެކަން ކަށަވަރުކުރުމަށް ހިންގާ ބައިނަލްއަގުވާމީ ޕްރޮގްރާމް، ކޮވެކްސްގެ ތެރެއިން އެންމެ ފުރަތަމަ ވެކްސިން ލިބޭނީ ތިން ޕަސެންޓަށެވެ. އެ ވެކްސިންތައް ދޭނީ ސީދާ ބައްޔަށް ހުށަހެޅިފައިވާ ފްރޮންޓްލައިންގެ ފަރާތްތަކަށެވެ. ދެން ވެކްސިން ދޭނީ ހައި ރިސްކް ކެޓަގަރީގައި ހިމެނޭ ފަރާތްތަކަށެވެ.