ގައުމީ މާޝަލް އާޓްސް ސެންޓަރާއި ޓީޓީ ހޯލް ރައީސް ހުޅުވައިދެއްވައިފި

ހުޅުމާލޭގައި ގާއިމް ކުރެވިފައިވާ މިނި ސްޕޯޓްސް ކޮމްޕްލެކްސްގައި ގައުމީ މާޝަލް އާޓްސް ސެންޓަރާއި ޓީޓީ ހޯލް ރައީސް އިބްރާހިމް މުހައްމަދު ސޯލިހު ހުޅުއްވަވާދެއްވައިފިއެވެ.

ގައުމީ މާޝަލް އާޓްސް ސެންޓަރާއި ޓީޓީ ހޯލް ރައީސް ސޯލިހު ހުޅުއްވަވާދެއްވާފައި ވަނީ އިއްޔެއެވެ.

advertisement

ރާއްޖޭގައި ވަރަށް ހުނަރުވެރި ކުޅުންތެރިންނާއި އެތުލީޓުން ތިބިކަން ފާހަގަކުރައްވައި ރައީސް ވިދާޅުވީ ޙަޤީޤީ ކާމިޔާބަކާ ހަމައަށް ނުދެވެނީސް، އޭގެ ތެރެއިން ގިނަ ކުޅުންތެރިން ކުޅިވަރުގެ މައިދާން ދޫކޮށްލާތަން ފެނިގެންދާކަމަށެވެ. ސަބަބަކީ، ކުޅުންތެރިންގެ ކިބައިގައި ހުރި ހުނަރުތައް ތަރައްޤީކޮށްދެވޭނެ ރަނގަޅު ޕްލޭނެއް ނެތުމުންކަން ރައީސް ފާހަގަކުރެއްވިއެވެ.\

ކުޅިވަރު ތަރައްޤީކުރުމުގައި ސަރުކާރުގެ އެންމެ ފުރަތަމަ އަމާޒަކީ ކުޅިވަރުގެ ވަސީލަތްތައް ޤާއިމުކޮށްދީ ތަރައްޤީކޮށްދިނުންކަމަށާ، ރާއްޖެއާއި ރާއްޖެއިން ބޭރުން ރަނގަޅު ތަމްރީނާއި ތަޖުރިބާގެ ފުރުޞަތުތައް ކުޅުންތެރިންނަށް ހޯދައިދިނުންކަމަށް ރައީސް ވިދާޅުވިއެވެ.

މި ރަސްމިއްޔާތުގައި ރައީސް ވަނީ އެކިއެކި މުބާރާތްތަކުގައި ރާއްޖެއަށް ރަން މެޑަލްތަކާއި ވަނަތައް ހާސިލްކޮށްދިން ފަރާތްތައް ފާހަގަކޮށްފައެވެ. އެގޮތުން އައިއޯއައިޖީ އާއި އޭޝިއަން ގޭމްސް އަދި ޗެސް މުބާރާތުގައި ރާއްޖެއިން ރަން މެޑަލް ހޯދި ފަރާތްތައް ރައީސް ސޯލިހު ވަނީ ފާހަގަ ކުރައްވާފައެވެ.

މި ރަސްމިއްޔާތުގައި އެކިއެކި ކުޅިވަރު އެސޯސިއޭޝަންގެ އިސް ވެރިންނާއި، އެޗްޑީސީގެ އިސް ވެރިންނާއި، ގިނަ އަދަދެއްގެ އެތްލީޓުންގެ އިތުރުން ބެލެނިވެރިންވެސް ވަނީ ބައިވެރިވެފައެވެ.