އިންކަމް ސަޕޯޓް އެލަވަންސް ދިނުމުގެ މުއްދަތު ސަރުކާރުން އިތުރުކޮށްފި

އިންކަމް ސަޕޯޓް އެލަވަންސްދިނުމުގެ މުއްދަތު ސަރުކާރުން އިތުރުކޮށްފިއެވެ. އިކޮނޮމިކް މިނިސްޓްރީއިން ވިދާޅުވީ އެލަވަންސް ހޯދުމުގެ 3ވަނަ ބުރެއް ކުރިއަށްގެންދިއުމަށް ސަރުކާރުން ނިންމާފައިވާކަމަށާއި، މި ބުރުގައި އޮކްޓޯބަރު، ނޮވެމްބަރު އަދި ޑިސެމްބަރުމަހު އަމްދަނީއަށް އަސަރުކުރި ފަރާތްތަކަށް އެލަވަންސް ދިނުމަށް ވަނީ ހަމަޖެހިފައެވެ.
މިނިސްޓްރީއިން މިހާރުވަނީ އޮކްރޯބަރު އަދި ނޮވެމްބަރު މަހުގެ އިންކަމް ސަޕޯޓް އެލަވަންސްއަށް އެދުމުގެ ފުރުސަތު ހުޅުވާލާފައެވެ. މި ދެ މަހުގެ އެލަވަންސްއަށް އެދުމަށް ފޯމު ހުށައެޅުމުގެ ސުންގަޑިއަކީ މި ހިނގާ ޑިސެމްބަރު މަހުގެ 31ވަނަ ދުވަހެވެ.
ޑިސެމްބަރު މަހަށްވެސް އެލަވަންސް ދޫކުރުމަށް ނިންމާފައިވާއިރު، ޑިސެމްބަރު މަހުގެ އެލަވަންސްއަށް އެދި ފޯމު ހުށައެޅޭނީ 10ޖެނުއަރީން ފެށިގެން 31 ޖެނުއަރީގެ ނިޔަލަށެވެ. އިންކަމް ސަޕޯޓް އެލަވަންސްއަށް އެދުމަށް ޝަރުތު ހަމަވަނީ 1ޑިސެންބަރު 2019އިން ފަށައިގެން އާމްދަނީއަށް ނުރަނގަޅު އަސަރުކޮށްފައިވާ ފަރާތްތަކަށެވެ.

އިންކަމް ސަޕޯޓް އެލަވަންސްއަކީ ކޯވިޑް-19އާ ގުޅިގެން ގިނަ ބައެއްގެ ވަޒީފާ ގެއްލުމާއި، އަދި ވިޔަފާރިތައް ހުއްޓި އާމްދަނީއަށް އަސަރުކުރުމާއިގުޅިގެން، އެފަދަ ފަރާތްތަކަށް އެހީވުމަށް ސަރުކާރުން ދޭންފެށި އެލަވަންސްއެކެވެ.

އިނަކަމް ސަޕޯޓް އެލަވަންސްއަށް އެދެން ޖެހެނީ jobcenter.mv ޕްލެޓްފޯމް މެދުވެރިކޮށް އޮންލައިން ފޯމަކުންނެވެ. އެގޮތުން އީފާސްގައި ރެޖިސްޓަރ ވުމާއި، އެޕްލިކޭޝަން ހުށައެޅުމާއިގުޅޭ ތަފްސީލް ޖޮބްސެންޓަރގެ ވެބްސައިޓުން ލިބޭނެއެވެ.

advertisement

އެލަވަންސް ދިނުން މިހާތަނަށް ދެ ބުރަކަށް ބަހާލައިގެން ވަނީ ކުރިއަށްގެންގޮސްފައެވެ.. 2ވަނަ ބުރުގެދަށުން ޖުލައި، އޮގަސްޓް، ސެޕްޓެމްބަރު މަހުގެ އެލަވަންސްއަށް ހުށައަޅާގައިވާ އެޕްލިކޭޝަނަށް އިތުރު ލިޔެކިޔުން ހުށައެޅުމުގެ ވަގުތު 12ޑިސެމްބަރަށް ހަމަވާނެކަމަށް އިކޮނިމިކް މިނިސްޓްރީއިން މަޢުލޫމާތުދެއެވެ. ފުރަތަމަ ބުރުގައި އެލަވަންސް ދޫކޮށްފައިވަނީ އޭޕްރިލް، މެއި، ޖޫން މަހު އާމްދަނިއަށް އަސަރުކުރި މީހުންނަށެވެ.

މިދިޔަ މަހުގެ 20 ވަނަ ދުވަހުގެ ނިޔަލަށް 11 ހާހަށްވުރެ ގިނަ މީހުންނަށް 129 މިލިއަން ރުފިޔާ އިންކަމް ސަޕޯޓް އެލަވަންސްގެ ގޮތުގައި ދޫކޮށްފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.