ސީއެންއެންއާއިއެކު ރާއްޖެ އިޝްތިހާރުކުރުމަށް ކުރިއަށްގެންދާ ކެންޕެއިން ފުޅާކޮށްފި

ދިވެހިރާއްޖޭގެ ފަތުރުވެރިކަން ދުނިޔޭގެ އެކި ކަންކޮޅުތަކަށް އިޝްތިހާރުކުރުމަށް ދުނިޔޭގެ ބޮޑު އެއް ހަބަރުފަތުރާ ވަސީލަތް ސީ.އެންއެންއާއެކު ކުރިއަށްގެންދާ ކެމްޕެއިން އިތުރަށް ފުޅާކޮށްފިއެވެ.

ސީ.އެންއެން އާއިއެކު ކުރިއަށްދާ ކެމްޕެއިން ފަށާފައިވަނީ ދިވެހިރާއްޖޭ ބޯޑަރު އަލުން ފަތުރުވެރިންނަށް ހުޅުވުމާ ދިމާކޮށެވެ. މި ކެމްޕެއިން ކުރިއަށްދާނީ ޑިޖިޓަލް އަދި އޮންލައިން ޕްލެޓްފޯމްތައް މެދުވެރިކޮށް ޓީވީ އިޝްތިހާރުތަކާއި ވިންޔެޓް އަދި ސީ.އެންއެން ސައިޓްގައި ފެނިގެންދާ ޑިޖިޓަލް ބެޏާތަކެއްގެ ޒަރިއްޔާއިންނެވެ.
މިކެމްޕެއިންގެ ދަށުން ޗުއްޓީ ހޭދަކުރަން އާ މަންޒިލްތައް ހޯދަމުން އަންނަ ފަތުރުވެރިންނަށް، ރާއްޖެއަކީ ޗުއްޓީ ހޭދަކުރަން ޒިޔާރަތްކުރަން އެންމެ ރައްކާތެރި އަދި އެންމެ އެކަށީގެންވާ މަންޒިލްގެ ގޮތުގައި އިޝްތިހާރުކުރެވިގެންދާނެކަމަށް އެމްއެމްޕީއާރުސީން ބުނެއެވެ.
ސީއެންއެންއާއެކު ކުރިއަށްގެންދާ ކެމްޕެއިންގެ ތެރެއިން ރާއްޖޭގެ ފަތުރުވެރިކަމުގެ އިތުރުން، ރާއްޖޭގެ ޑައިވަރުންނާއި، ޝެފުން އަދި އިތުރު ހުނަރުވެރިންގެ ހަރަކާތްތައްވެސް ދަނީ ދައްކާލަމުންނެވެ. އަދި ޓުއަރިޒަމް މިނިސްޓަރގެ އިންޓަވިއުތައްވެސް ސީއެންއެންއިން ދަނީ ދައްކަމުންނެވެ.

މިއަހަރުގެ މިހާތަނަށް އެމްއެމްޕީއާރުސީން ވަނީ 22 މާކެޓެއްގައި ރާއްޖެ އިޝްތިހާރުކުރުމަށް 412 ހަރަކާތެއް ކުރިއަށްގެންގޮސްފައެވެ. މީގެތެރެއިން 314 ހަރަކާތެއް އޮންލައިން އަދި އޮފްލައިންކޮށް ކުރިއަށް ގެންގޮސްފައިވަނީ ކޮވިޑްގެ ކާރިސާގެ ތެރޭގައެވެ. އޭގެ ތެރޭގައި ފެއާތަކުގައި ބައިވެރިވުމާއި، ވެބިނާ، ފެމް ޓްރިޕްސް، އޮންލައިން ރޯޑް ޝޯ، އައުޓްޑޯ ކެމްޕެއިން އަދި ޑިޖިޓަލް ކެމްޕެއިންތައް ވެސް ހިމެނެއެވެ.

advertisement