އަމިއްލަ ހިޔާލު: ހިޔާ ސަރަހައްދުގެ ހަޓްތައް — އެ މީހަކާ އެމީހެއް!

ކުރީގެ ރައީސް އަބްދުﷲ ޔާމީންގެ ސަރުކާރުން އަޅަން ފެށި ހިޔާ ފްލެޓްތައް މިދިޔަ ސަރުކާރުގައި ނިންމައި މީހުންނާ ހަވާލުކުރަން ފެށި އިރު ވެސް އެ ސަރަހައްދުގައި މީހުން ދިރިއުޅުމަށް ބޭނުންވާ ވަސީލަތްތައް ހުރީ ގާއިމު ނުވެއެވެ. އެތައް ހާސް ބަޔަކު އެއްތަނަކަށް ޖަމާކުރުމަށް އެޅި 7،000 ފްލެޓްގައި މީހުން ދިރިއުޅެން ފެށި އިރު އެންމެ ކުޑަ މިނުން ކާބޯތަކެތި ވިއްކާނެ ތަނެއް ވެސް ނެތެވެ. 

ނަތީޖާއަކަށްވީ އެ ތަނުގައި ވަށައިގެން އޮތް ހުސް ތަންތަނުގައި ވަގުތީ ހަޓްތައް ޖަހައި މީހުން ވިޔަފާރި ފެށުމެވެ. ވެހިކަލްތަކުގައި ވެސް އެކަން ކުރިއެވެ. ބައެއް ބިދޭސީން ޖެހުނު ތަނެއްގައި ހަޓްތައް ހަދައިގެން އެ މަސައްކަތް ފެށިއެވެ. އެ މީހުން އެތަނުން ބޭރުކުރެވުނީ ވަރަށް ވަރުންނެވެ. އެތައް ދުވަހެއް ފަހުން ބާރުގެ ބޭނުން ކޮށްގެންނެވެ. 

advertisement

އާދައިގެ ގޮތަކަށް ފެށި ނަމަވެސް މިހާރު ވަރުގަދަ ސައި ހޮޓާތައް

ހިޔާ ސަރަހައްދުން ހަޓްތައް ނެގުމުން ދެން އެ މީހުން ބަދަލުވި އެ ސަރަހައްދުގެ އިރުން ބީޗަށް ނުކުންނަށް އޮތް ހަނި މަގަށެވެ. މަގުގެ ދެ ފަރާތުގައި ހަޓް ޖަހައި ފުރަތަމަ ވިއްކަން ފެށީ ހެދިކާއެވެ. ވަރަށް އާދައިގެ ގޮތަކަށް ފެށި ނަމަވެސް ދުވަހެއް ދުވަހަކަށް ހަޓްތައް ގިނަވެ، މިހާރު އެ ސަރަހައްދުގައި ވަރުގަދަ ސައި ހޮޓާތައް ހިންގައެވެ. އެ ވަރުން ނިމުނީއެއް ނޫނެވެ. 

މީހުން ހިތްހަމަ ޖައްސާލަން އޮތް ބީޗް ސަރަހައްދު ވެސް އެ މީހުން ހިސޯރުކޮށްފިއެވެ. އެ މީހަކާ އެ މީހެކެވެ. ވެރިންނަކީ ކޮބައި ކަމެއް ނޭނގެއެވެ. ހުއްދައެއް ނެތެވެ. ކަރަންޓެއް ނެތުމުން އަލި ކަމެއް ވެސް ނެތެވެ. މުޅި ސަރަހައްދު ވަނީ ގޮނޑުކޮށްފައެވެ. ދުރުން ބަލާއިރު ސިފަ ވަނީ ހިޔާ ފްލެޓްތައް ކައިރިން އުފެދިފައިވާ “ސަލަމް” އޭރިޔާއެއް ހެންނެވެ. ދޭސީންނާއި ބިދޭސީން ތަނަށް އަތްގަދަކޮށްފިއެވެ. 

ގަވާއިދާ ހިލާފަށް ވިޔަފާރިކުރާތީ އެ ސަރަހައްދު ސާފުކުރަން އެތައް ފަހަރެއްގެ މަތިން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެންގި ނަމަވެސް ދުވަހެއް ދުވަހަކަށް އެ ސަރަހައްދުގައި ހަޓްތައް ދަނީ އިތުރުވަމުންނެވެ. އެޗްޑީސީން މިހާރު ވެސް ވަނީ އެފަދަ އިއުލާނެއް ކޮށްފައެވެ. ބީޗް ސަރަހައްދު ތަރައްގީކުރަމުން ގެންދާތީ އެ ސަރަހައްދުގައި ހުރި ހަޓްތައް މި މަހުގެ 14 ވަނަ ދުވަހުން ފެށިގެން 30ގެ ނިޔަލަށް ސާފުކުރަން އިއުލާނުގައި ވެއެވެ. އަދި އެހާތަނަށް ހަޓްތައް ނުނަގައިފި ނަމަ އެ ސަރަހައްދު ސާފުކުރުމުގެ މަސައްކަތް އެ ކޯޕަރޭޝަނުން ކުރާނެ ކަމަށާއި އެ މަސައްކަތުގައި މުދަލަށް ލިބޭ އެއްވެސް ގެއްލުމަށް ޒިންމާ ނުވާނެ ކަމަށް ބުނެ ގަދަ އިންޒާރާ އެކު އިއުލާނުކުރިއެވެ. 

ގަވާއިދާ ހިލާފަށް އެ ސަރަހައްދުގައި ހަޓް ޖަހައިގެން ވިޔަފާރިކުރުން ހުއްޓުވުމަށް މީގެ ކުރިން ވެސް އެޗްޑީސީން މަސައްކަތް ކުރިއެވެ. ނަމަވެސް މި ފަހަރު ކުރި އިއުލާނާ އެކީގައި އެ ސަރަހައްދު ސާފުވާނެ ކަމަށް ގިނަ ބަޔަކު އުންމީދުކުރި ނަމަވެސް ހަޓްގެ ވެރިން މާ ވަރުގަދައެވެ. އެ މީހުން ޝަކުވާތައް އަޑުއަހަށް ސިޔާސީ ވެރިންނަށް ވެސް އެ ސަރަހައްދަށް ދާން މަޖުބޫރުވިއެވެ. 

ދެން ފެނުނީ ކުރިން ގަދަ ބަސް ބުނެފައި އެޗްޑީސީން ނެރުނު އިއުލާން ބާތިލްކޮށް ބަދަލުތަކެއް ގެނެސް އާ އިއުލާނެއް ކުރިތަނެވެ. މި ފަހަރުގެ އިއުލާނުގައި ވަނީ އެ ހަޓްތައް ބަދަލުކުރާނެ އެ ސަރަހައްދެއް ވެސް ބުނެދީފައެވެ. އެ ގޮތުން މިހާރު ހަޓްތައް ހުރި މަގުގެ އުތުރުން އޮތް ހުސް ބިމަށް އެ ހަޓްތައް ބަދަލުކުރަން ވަނީ އަންގާފައެވެ. 

މިކަމާ ގުޅިގެން މައުލޫމާތު ދިން މީހަކު ބުނީ ހަޓްތައް ހިންގުމުގައި ބޮޑަށް ހަރަކާތްތެރި ވަނީ ވެސް އެޗްޑީސީގެ ވަޒީފާތަކުގައި އުޅޭ މީހުން ކަމަށެވެ. އަދި ވަކި ބަޔަކު އެ ސަރަހައްދަށް އަތްގަދަކޮށްފައިވާ ކަމަށާއި ހަޓް ޖެހެނީ ވެސް އެ މީހުންނާ ގުޅުން އޮންނަ މީހުންނަށް ކަމަށެވެ. މިވާހަކަ ސޯޝަލް މީޑިއާގައި ވެސް ފެންމަތިވެފައި ވެއެވެ. އަދި ގަވާއިދާ ހިލާފަށް ކުރާ ކަމަކަށްވާ އިރު ކަމާ ބެހޭ ފަރާތްތަކުން އެކަން ނުހުއްޓުވަނީ ކީއްވެތޯ އެތައް ބަޔަކު އަންނަނީ ސުވާލުކުރަމުންނެވެ. 

ބައެއް ފަރާތްތަކުން ދެކޭ ގޮތުގައި އެފަދަ ހަޓްތަކެއް ހެދުމަކުން މައްސަލައެއް ނެތް

އެ ސަރަހައްދުގައި ހުރި ހަޓްތައް އެހެން ތަނަކަށް ބަދަލުކުރަން ފުރުސަތު ދިނުމަށް އިއުލާނުކުރި ނަމަވެސް އެތަންތަނުން ޖާގަ ދޭނެ ގޮތެއް އިއުލާނުކޮށްފައެއް ނުވެއެވެ. އެހެން ކަމުން އެއްވެސް އުސޫލެއް ހަމައެއް ނެތި ހަމަ ކޮންމެ މީހަކު ވެސް ގޮސް އެ ސަރަހައްދުގައި ހަޓް ޖަހައި ވިޔަފާރިކުރަންވީއެވެ. ގޮނޑި މޭޒު ޖަހައި ކެފޭ ހިންގަންވީއެވެ. އާންމުންގެ ޝަކުވާއަކީ ހަޓްތައް ހުރުން އެކަންޏެއް ނޫނެވެ. ފެނެއް ކަރަންޓެއް ނެތް ތަނެއްގައި ކަބޯތަކެތި ވިއްކުމުގެ އެއްވެސް ސާފުތާހިރުކަމެއް ނެތް ގޮތަކަށް އެކަން ކުރަން ބަޔަކަށް ފުރުސަތު ދިނުމަކީ ވެސް ކަންބޮޑުވުމެކެވެ.

އެވެސް އުސޫލެއް ނެތި ހުޅުމާލޭ ފޭސް 2 ގެ ބީޗް ސަރަހައްދާއި އެ ސަރަހައްދާ ގުޅިފައިވާ ބައެއް މަގުތަކުގައި ހަޓް ޖަހައިގެން ގަވާއިދާ ހިލާފަށް ވިޔަފާރި ކުރާ މީހުން މުޅި ސަރަހައްދު ވަނީ ގޮނޑުކޮށްފައެވެ. އެ މީހުން އުފައްދާ ކުނި މުޅި އެކަށީގެންވާ ގޮތެއްގައި ނައްތާ ނުލެވެއެވެ. އޭގެ ސަބަބުން އެ ސަރަހައްދަށް މޫދަ އެރި ހިތްހަމަޖައްސާލަންދާ މީހުންނަށް ވެސް އެ ތަން އުނދަގުލެއް ކުރިމަތިވެއެވެ. އަދި ގޮނޑި މޭޒު ޖަހައި ހިޔަކޮށްގެން ބޮޑެތި ކެފޭތައް ހަދައިގެން ތިބި މީހުންގެ ސަބަބުން އެ ސަރަހައްދުގެ ހަގީގީ ބޭނުން ވަނީ ކެނޑިފައެވެ. 

ބައެއް ފަރާތްތަކުން ދެކޭ ގޮތުގައި އެ ސަރަހައްދުގައި އެފަދަ ހަޓްތަކެއް ހެދުމަކުން މައްސަލައެއް ނެތެވެ. އަދި އެ ސަރަހައްދަށް ހިތްހަމަޖައްސާލަން ދާ އާއިލާތަކަށް އެއީ މުހިންމު ހިދުމަތެކެވެ. އެހެން ނަމަވެސް އެކަން ކުރަންޖެހޭނީ ރަނގަޅަށް ޕްލޭންކުރެވި ހުއްދަ ދެވިގެންނެވެ. މޮނީޓާކުރެވި ވަސީލަތްތައް ގާއިމުކުރެވިގެންނެވެ. 

ފެނާއި ކަރަންޓާއި އެ ނޫން ވެސް އަސާސީ ހިދުމަތް ވެސް ލިބިގެންނެވެ. ބާލަކުނޑި އާއި ދަބަރު ޖެހި ޓިނުން ފުރާޅެއް ހަދައި މުޅި ސަރަހައްދު ހިސާރުކޮށް، ގަދަ މީހާ ގަދަވާ ގޮތަށް ކަންކަން ކުރަން ފުރުސަތު ދެވިގެން ނުވާނެއެވެ. އަނެއްކޮޅުން އެ ސަރަހައްދަކީ މާލެ ސަރަހައްދުގައި ވެސް މިހާރު ބިމުގެ އަގު އެންމެ ބޮޑު ސަރަހައްދެވެ. އެތައް މިލިއަން ރުފިޔާ ދީގެން ބަޔަކު ވަނީ އެ ސަރަހައްދުން ބިން ގަނެފައެވެ. އަދި އިތުރު ބިން ވެސް ވިއްކަން ވަނީ ހުޅުވާލާފައެވެ. މިފަދަ ގޮތަކަށް ކަން އޮތް އިރު ގަވާއިދާ ހިލާފަށް ވިޔަފާރިކުރަމުންދާ ބަޔަކަށް ބަޔަކަށް ހިލޭ ބިން ދިނުމަކީ އެޗްޑީސީ އަށް ވެސް ކުރެވިގެންވާނެ ކަމެއް ނޫނެވެ.