170 ގެސްޓްހައުސްއެއް އަލުން ހުޅުވުމުގެ ހުއްދަ ޓޫރިޒަމް މިނިސްޓްރީން ދީފި

ރާއްޖޭގެ ބޯޑަރު އަލުން ހުޅުވި ފަހުން މިހާތަނަށް 170 ގެސްޓްހައުސް ހުޅުވާފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތައް ދައްކައިފިއެވެ.

ޓޫރިޒަމް މިނިސްޓްރީން އާއްމު ކޮށްފައިވާ ތަފާސް ހިސާބުތައް ދައްކާ ގޮތުގައި މި މަހުގެ 16 ވަނަ ދުވަހުގެ ނިޔަލަށް 170 ގެސްޓްހައުސްއެއް ވަނީ ހުޅުވާފައެވެ. މިއާއިއެކު މިވަގުތު ރާއްޖޭގެ ގެސްޓްހައުސްތަކުގައި ފަތުރުވެރިންނަށް ޙިދުމަތް ދެމުންއަންނަ އެނދުގެ އަދަދު ވަނީ 3،088 އަށް އަރާފައެވެ.

advertisement

މިހާތަނަށް އެންމެ ގިނައިން ގެސްޓްހައުސް ހުޅުވާފައި ވަނީ މާލެ އަތޮޅުންނެވެ. މާލެ އަތޮޅުގައި 72 ގެސްޓްހައުސްއެއްގެ 1،606 އެނދު ވަނީ އޮޕަރޭޝަނަށް ގެނެސްފަ އެވެ. އަދި އއ. އަތޮޅުގެ 48 ގެސްޓްހައުސްއެއް ހުޅުވައި ޙިދުމަތްދޭ އެނދުގެ އަދަދު 656 އަކަށް އަރާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

އެންމެ ގިނަ ގެސްޓްހައުސްތައް ހުޅުވާފައި ވަނީ އއ. ތޮއްޑޫ އެވެ. އެ ރަށުގެ 23 ގެސްޓްހައުސްއެއް ހުޅުވައި، 300 އެނދު ވަނީ އޮޕަރޭޝަނަށް ގެނެސްފަ އެވެ. އަދި ކ. މާފުށީގެ 17 ގެސްޓްހައުސްއެއްގެ 776 އެނދު ވެސް ހުޅުވައި ހިދުމަތް ދޭން ފަށައިފި އެވެ.

ޓޫރިޒަމް މިނިސްޓްރީން ހާމަކުރާގޮތުގައި ގެސްޓް ހައުސްތައް އަލުން ހުޅުވުމަށް މިނިސްޓްރީން ހުއްދަދޭއިރު އެންމެ ފުރަތަމަ ކަމެއްގެ ގޮތުގައި ބަލާނީ ރަށު ފެންވަރުގައި ފުރިހަމަކުރަންޖެހޭ ކަންކަން ފުރިހަމަކޮށްފައިވޭތޯއެވެ. އެގޮތުން ކަރަންޓީނާއި، އައިސޮލޭޝަންގެ އިންތިޒާމްތަކާއި، ޞިއްޙީގޮތުން ފުރިހަމަކުރަންޖެހޭ ކަންކަން ފުރިހަމަކޮށްފައިވާކަން އެ ރަށެއްގެ ކައުންސިލުން މިނިސްޓްރީއަށް ކަށަވަރުކޮށްދޭންޖެހެއެވެ. އަދި އެތަނެއް ހުޅުވުމުގައި ކައުންސިލުގެ އެއްވެސް އިއުތިރާޒެއްނެތްކަމަށް މިނިސްޓްރީއަށް އެންގުމުން، ވަކިވަކި ގެސްޓް ހައުސްތަކުން ހުށަހަޅާ އެސް.އޯ.ޕީތަކަށް ބެލުމަށްފަހު، ހުޅުވުމުގެ ހުއްދަ ޓޫރިޒަމް މިނިސްޓްރީން ދަނީ ދެމުންނެވެ.

ލޯކަލް ޓޫރިޒަމްގެ ޚިދުމަތްދޭ ރަށްރަށުގައި ގެއިން ބޭރުގައާއި، އާއްމު ތަންތަނުގައި އުޅޭއިރު، އަނގައާއި، ނޭފަތާއި، ދަތްދޮޅި ނިވާވާގޮތަށް މާސްކް އެޅުމަށް އެޗް.ޕީ.އޭއިން ވަނީ އަންގަވާފައެވެ.