ބްރޯޑްކޮމް އަށް ލިބެންޖެހޭ ފައިސާ ހޯދުމަށް އެކަށީގެންވާ މަސައްކަތް ކޮށްފައެއް ނެތް: އޮޑިޓް

ބްރޯޑްކާސްޓިން އާއި ރީބްރޯޑްކާސްޓިން ލައިންސެންސް ފީ އާއި ޖޫރިމަނާތައް ދޫކޮށްގެން ދައުލަތަށް ލިބެންޖެހޭ ފައިސާ ހޯދުމަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން އެކަށީގެންވާ މަސައްކަތް ކޮށްފައި ނުވާ ކަމަށް އޮޑިޓް ރިޕޯޓްގައި ބުނެފިއެވެ.

އޮޑިޓަ ޖެނެރަލް އޮފީހުން ނެރުނު ބްރޮޑްކޮމްގެ 2019 ވަނަ އަހަރުގެ އޮޑިޓް ރިޕޯޓްގައި ބުނެފައި ވަނީ އެކި ފަރާތްތަކުން ބްރޯޑްކޮމް އަށް ލިބެންޖެހޭ ފީ އާއި ޖޫރިމަނާ ހޯދުމަށް ކޮމިޝަނުން ކުރަންޖެހޭ ބައެއް ކަންކަން ކޮށްފައި ނުވާ ކަމަށެވެ. އެ ގޮތުން ލައިސަންސް ފީ އާއި ޖޫރިމަނާގެ ގޮތުގައި ބްރޯޑްކޮމް އަށް ލިބެންޖެހޭ 4.2 މިލިއަން ރުފިޔާ ނުލިބިވާ ކަމަށާއި ނަމަވެސް ގާނޫނާއި ގަވާއިދާ އެއްގޮތަށް އެ ފައިސާ ހޯދުމަށް ޝަރީއަތަށް ހުށަހަޅާފައި ނުވާ ކަމަށް އޮޑިޓް ރިޕޯޓްގައި ވެއެވެ. އޭގެ ތެރޭގައި 2015 ވަނަ އަހަރު ލިބެންޖެހޭ ފައިސާ ވެސް ހިމެނޭކަން އެ ރިޕޯޓްގައި ފާހަގަކޮށްފައި ވެއެވެ.

advertisement

އޮޑިޓް ރިޕޯޓްގައި ބުނެފައި ވަނީ ފީ އާއި ޖޫރިމަނާ ހޯދަން ފުރިހަމަކުރަންޖެހޭ މަރުހަލާތަކެއް ހުރި އިރު އެ މަރުހަލާތައް ނުވަތަ މަރުހަލާތަކުން ބައެއް ފުރިހަމަކޮށްފައި ނުވާކަން ފާހަގަކުރެވިފައިވާ ކަމަށާއި އެ ގޮތުން ނޯޓިސް ފޮނުވުމާއި ޝަރީއަތަށް ހުށަހެޅުން ފަދަ ކަންކަން ކޮށްފައި ނުވާކަން ފާހަގަކުރެވިފައިވާ ކަމަށެވެ.

މިއީ ދައުލަތަށް ލިބެންޖެހޭ ފީ އާއި ޖޫރިމަނާކަމަށް ވާއިރު އެ ފައިސާ ހޯދަން މަސައްކަތް ނުކުރާ ނަމަ، އެ ފައިސާ އިން ދައުލަތަށް ލިބެންޖެހޭ މަންފާ ނުލިބޭނެ ކަމަށާއި މާލިއްޔަތު ގަވާއިދާ އެއްގޮތަށް ލިޔުން ފޮނުވައި ހަނދާންކޮށްދިނުމުން ވެސް ފައިސާ ނުދައްކާ ނަމަ ޝަރީއަތަށް ހުށަހަޅަންޖެހޭނެ ކަމަށް އޮޑިޓަރ ޖެނެރަލްގެ އޮފީހުން ބުނެއެވެ. އެ ގޮތަށް އަމަލުކުރުމަށް އޮޑިޓަރ ޖެނެރަލް ވަނީ ލަފާދެއްވާފައެވެ.

އޮޑިޓް ރިޕޯޓްގައިވާ ގޮތުން ފައިސާ ހޯދުމަށް އެކަށީގެންވާ މަސައްކަތް ނުކުރާ ކަމަށް އެ އޮފީހުން ކުރިން އެކުލަވައިލި ރިޕޯޓްގައި ވެސް ފާހަގަކޮށްފައި ވެއެވެ.

މިދިޔަ ސަރުކާރުން ބްރޯޑްކޮމް ހިސޯރުކޮށްފައި އޮތް ކަމަށް ގިނަ ފަރާތްތަކުން ތުހުމަތުކުރާ އިރު 2019 ވަނަ އަހަރުގެ ބޮޑު ބައެއް ދިޔައީ އެ ކޮމިޝަންގެ މަސައްކަތްތައް ނުކުރެވިއެވެ. އެ ގޮތުން މެންބަރުން އިސްތިއުފާ ދިނުމާއި ވަކިކުރުމާއި އޮފީހަށް ހާޒިރުނުވެ މުސާރަ ނެގުމާއި ކޯރަމް ހަމަނުވެގެން ޖަލްސާތައް ނުބޭއްވި ގިނަ ދުވަސްތަކެއް ހޭދަވުން ފަދަ ކަންކަން ހިނގައިދިޔައެވެ. ކޮމިޝަނުން އިސްތިއުފާ ދިން އަދި ވަކިކުރި މެންބަރުންގެ ބަދަލުގައި މެންބަރުން ހޮވުމަށް ގާނޫނުގައި ބުނާ މުއްދަތު ފަހަނަ އަޅައި ގޮސް ގާނޫނީ ހުސްކަމެއްގައި އެތައް ދުވަސްތަކެއް ހޭދަވި ފަހުން ކޮމިޝަންގެ ގާނޫނީ އަދަދު ހަމަވާ ވަރަށް ވެސް މެންބަރުން އައްޔަންކުރެވުނީ 2019 ވަނަ އަހަރުގެ ޑިސެމްބަރު މަހުއެވެ. އާ ސަރުކާރާއި އާ މަޖިލީހަކާ އެކު ކޮމިޝަންތަކަށް ބަދަލު ގެނައުމުގެ ތެރެއިން މިހާތަނަށް ބްރޯޑްކޮމްގެ ހަތް މެންބަރުންގެ ތެރެއިން ހަތަރު މެންބަރަކު ވަނީ ބަދަލުވެފައެވެ. ކުރީ ސަރުކާރުގައި މަޖިލީހުން އައްޔަންކުރި މެންބަރުންގެ ތެރެއިން މިހާރު ކޮމިޝަންގައި ތިއްބެވީ ދެ މެންބަރެކެވެ. އެއް މެންބަރެއްގެ މަގާމު މި ވަގުތު ވެސް އޮތީ ހުސްކޮށެވެ.