އެސްޑީއެފްސީންގެ ލޯނަށް އެދި ހުށައެޅުން ވަގުތީގޮތުން މެދުކަނޑާލަނީ

އެސްޑީއެފްސީން ދޫކުރަމުންދާ ލޯނުތަކަށް އެދި ހުށައެޅުން، މިމަހުގެ 25 ވަނަ ދުވަހުން ފެށިގެން ވަގުތީގޮތުން މެދުކަނޑާލާނެކަމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަނުން އެސްޑީއެފްސީން ވިދާޅުވެއްޖެއެވެ.

އެސްޑީއެފްސީން ބުނީ މި ޚިދުމަތް މެދުކަނޑާލަން ނިންމީ 2020 ވަނަ އަހަރުގެ މާލީ ހިސާބުތައް ނިންމުމާއި، އެ ކޯޕަރޭޝަނުން ދެމުންގެންދާ ޚިދުމަތްތައް އިތުރަށް ފުރިހަމަކުރުމަށް ގެންނަންޖެހޭ ބަދަލުތައް ގެނައުމަށްކަމަށެވެ. އެގޮތުން މިމަހުގެ 25 ވަނަ ދުވަހުން ފެށިގެން ލޯނަށް އެދި ހުށަހަޅާ ފޯމްތައް ބަލައިގަތުން މެދުކަނޑާލާނެއެވެ. އެސްޑީއެފްސީން ވިދާޅުވީ ލޯނަށް އެދި ހުށަހަޅާ ފޯމުތައް ދެން ބަލައިގަންނަން ފަށާނީ އަންނަ އަހަރުގެ ފެބްރުއަރީ މަހުގެ 1 ވަނަ ދުވަހުން ފެށިގެންނެވެ.

އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަނުން އުފައްދާފައިވަނީ ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދިނުމަށެވެ. ކުދި ފަންތިއާއި މެދު ފަންތީގެ ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދިނުމުގެ ގޮތުން މިއަހަރު 285 ފަރާތަކަށް ޖުމްލަ 395 މިލިއަން ރުފިޔާގެ ލޯނު ދޫކޮށްފައިވާކަމަށް އެސްޑީއެފްސީއިން ބުނެއެވެ. އެގޮތުން މިއަހަރު އެންމެ ގިނަ ލޯނު ދޫކޮށްފައިވަނީ ފަތުރުވެރިކަމުގެ ދާއިރާއާއި ގުޅުންހުރި ވިޔަފާރިތަކާއި، ކޮމާޝަލް ވިޔަފާރިތަކަށެވެ.

advertisement