ފަތުރުވެރިކަމަށް 4 ރަށެއް ދޫކުރަނީ

ފަތުރުވެރިކަމަށް 4 ރަށެއް ދޫކުރުމަށް ޓުއަރިޒަމް މިނިސްޓްރީން ނިންމައިފިއެވެ.

ޓުއަރިޒަމް މިނިސްޓްރީން އާންމުކޮށްފައިވާ ވީޑިއޯއެއްގައި ބުނެފައިވަނީ ތަފާތު ހަތަރު އަތޮޅަކުން 4 ރަށެއް، ފަތުރުވެރިކަން ތަރައްޤީ ކުރުމަށް އަންނަ ހަފްތާގެ އާދީއްތަ ދުވަހު އިއުލާން ކުރާނެ ކަމަށެވެ.ނަމަވެސް މިއީ ކޮން އަތޮޅުތަކެއް ރަށްތަކެއް ކަމެއް މިނިސްޓްރީން އަދި ހާމަކޮށްފައެއް ނުވެއެވެ.

ކޯވިޑް19 ގެ ސަބަބުން ރާއްޖޭގެ ފަތުރުވެރިކަން މިއަހަރު ވަނީ ވަރަށް ބޮޑަށް ހީނަރުވެފައެވެ. އަދި މިއަހަރު ހުޅުވަން ނިންމި ގިނަ ރިސޯޓްތައްވެސް ހުޅުވުން ވަނީ މަޑުޖައްސާލާފައެވެ. އަދި ފަތުރުވެރިކަން ތަރައްޤީކުރަން ރަށްތައް ހުޅުވާލުންވެސް ވަނީ މިނިސްޓްރީން މަޑުޖައްސާލާފައެވެ.
މިއަހަރު 12 ފެސިލިޓީއެއްގެ މަސައްކަތް ކޯވިޑް-19ގެ ސަބަބުން ނުނިމި އޮތްކަން ފާހަގަކުރައްވައި މިނިސްޓަރ ވަނީ އަންނަ އަހަރަށް މިތަންތަންވެސް ހުޅުވި، ސިނާޢަތް ފުޅާވެ ރަނގަޅު އަހަރަކަށް ވެގެންދާނެ ކަމަށް ވިދާޅުވެފައެވެ.

މީގެ އިތުރުން ޓުއަރިޒަމް ޤާނޫނަށް އިސްލާހުތަކެއް ގެނެސް މުޅި މަޖިލީހުގެ ކޮމެޓީން ވަނީ ފާސްކޮށްފައެވެ. އެގޮތުން ޕްރައިވެޓް އައިލެންޑް ތަރައްގީކޮށް، ސެކަންޑް ހޯމްގެ ގޮތުގައި ބޭރުގެ ފަރާތްތަކަށް ދިގު މުއްދަތަކަށް ކުއްޔަށް ދިނުމާއި ރިސޯޓްކާއި ގެސްޓްހައުސް ފަދަ ތަންތަން ހެޑް ލީސްގެ މުއްދަތަށް ވިއްކުމުގެ ފުރުސަތު ފަހިކުރުން ހިމެނެއެވެ.

advertisement