ރައީސުލްޖުމްހޫރިއްޔާ ޖަޕާނުގެ ސަފީރަށް ބައްދަލުކުރައްވައިފި

ޖަޕާނުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ކެއިކޯ ޔަނާއީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އަރިހަށް އިޙްތިރާމުގެ ޒިޔާރަތެއް ކުރައްވައިފިއެވެ. މި ބައްދަލުކުރެއްވުން ބާއްވަވާފައި ވަނީ އިއްޔެ ރައީސުލްޖުމްހޫރިއްޔާގެ އޮފީހުގައެވެ.

ރައީސުލްޖުމްހޫރިއްޔާއާއި ޖަޕާނުގެ ސަފީރާއިއެކު ބޭއްވެވި މި ބައްދަލުވުމުގައި ރައީސް ވަނީ ޖަޕާނުގެ ސަރުކާރުން ދިވެހިރާއްޖެއަށް ވެދެއްވަމުންގެންދަވާ އެހީތެރިކަމާއި ބަހައްޓަވާ ގާތްގުޅުމަށް ޝުކުރު އަދާކުރައްވާފައެވެ. މީގެއިތުރުން ރާއްޖޭގެ ތަރައްޤީގައި ޖަޕާނުން ވެދެއްވަމުންގެންދަވާ އެހީތެރިކަމަށް ރައީސް ވަނީ ޝުކުރު އަދާކުރައްވާފައެވެ.
ކޮވިޑް-19ގެ ހާލަތުގައި ރާއްޖެއަށް އެހީތެރިވުމުގެ ގޮތުން ޖަޕާނުން ވަނީ ރާއްޖެއަށް 5 ބިލިޔަން ޔެންގެ ހިލޭ އެހީއެއް ފޯރުކޮށްދީފައެވެ. މިއީ ކޮންސެޝަނަލް ލޯނުގެ ގޮތުގައި މިހާތަނަށް މިގޮތަށް ޖަޕާނުން ރާއްޖެއަށް ދީފައިވާ އެންމެބޮޑު އަދަދުކަމަށްވާއިރު ރައީސުލްޖުމްހޫރިއްޔާވަނީ އެކަމަށް ވަރަށް ބޮޑަށް ޝުކުރު އަދާކުރައްވާފައެވެ.
މި ބައްދަލުވުމުގައި ޖަޕާނުގެ ސަފީރު ވަނީ ގިނަ ދާއިރާތަކަކުން ޖަޕާނުން ރާއްޖެއަށް އެހީތެރިކަން ފޯރުކޮށްދިނުމަށް ހަމަޖެހިފައިވާކަމަށް ވިދާޅުވެފައެވެ. އޭގެތެރޭގައި ޒުވާނުންނަށް ވޮކޭޝަނަލް ތަމްރީނުގެ ފުރުޞަތުތައް ފަހިކޮށްދިނުމާއި ދެމެހެއްޓެނިވި ގޮތުގައި ކުނިމެނޭޖްކުރުމާއި ޞިއްހީދާއިރާ ކުރިއެރުވުމަށާއި އަދި ސަލާމަތާބެހޭ ދާއިރާއިން އެހީތެރިކަން ފޯރުކޮށްދިނުން ހިމެނޭކަމަށް ސަފީރު ވަނީ ވިދާޅުވެފައެވެ.  

advertisement