ވީއައިއޭ ބާރުބޮޑުވެ ޑޮމެސްޓިކް ފްލައިޓުތަކަށް ނޯތު އޭޕްރަންއަށް

ރާއްޖެ އަންނަ ފްލައިޓްތައް ގިނަވުމުގެ ސަބަބުން ޑޮމެސްޓިކް ފްލައިޓުތަކަށް މީހުން އެރުމާއި ބޭލުން، ނޯތު އޭޕްރަންއަށް ބަދަލުކޮށްފި އެވެ. މިއީ ވަގުތީ ގޮތުން ގެނައި މި ބަދަލެކެވެ. މި ބަދަލާއިއެކު ޑޮމެސްޓިކް ޓާމިނަލަށް ދަތުރުވެރިން ގެންނާށާއި ބޯޓުތަކަށް އުފުލާނީ ބަސްތަކުގައެވެ.

ނޯތު އޭޕްރަންއަކީ ރާއްޖޭގައި ޗުއްޓީ ހޭދަކުރަން އަންނަ މަހުޖަނުންގެ ޖެޓްތައް ޕާކްކުރަން ހާއްސަކުރި ސަރަހައްދެކެވެ. އެކަމަކު އަމިއްލަ ޖެޓްތައް މިހާރު ޕާކްކުރަނީ، އާ ރަންވޭއާ އިންވެގެން، އިރުމަތީ ފަރާތުގައި ހަދާފައި އޮންނަ އޭޕްރަންގަ އެވެ.

advertisement

ރާއްޖޭގެ ބޯޑަރު އަލުން ހުޅުވާލުމާއިއެކު ރާއްޖެ އަންނަ ފްލައިޓްތަކުގެ އަދަދު ވަނީ އިތުރުވެފައެވެ. މިހާރު ބައިނަލްއަޤްވާމީ 20 އަށްވުރެ ގިނަ އެއަރލައިނުން އަންނަނީ ރާއްޖެއަށް ދަތުރުކުރަމުންނެވެ. އެހެންކަމުން އެއަރޕޯޓް ވަނީ ބާރުބޮޑުވެފައެވެ.

ޑޮމެސްޓިކް ފްލައިޓްތައް ނޯތް އޭޕްރަންއަށް ބަދަލުވުމުގެ ސަބަބުން ރަންވޭ ބިޒީވެގެން ގިނަ އިރު މަތީގައި ބޯޓުފަހަރު އޮންނަ އޮތުމަށް ރަނގަޅު ހައްލެއް ލިބޭނެކަމަށް އެމްއޭސީއެލްއިން ބުނެއެވެ.

މިހާރު ރާއްޖެ އަންނަ ފަތުރުވެރިންވެސް ވަނީ ބޮދުތަނުން އިތުރުވެފައެވެ. އިއްޔެ އެކަނި ވެސް ރާއްޖެއަށް 6،000 އަށް ވުރެ ގިނަ ފަތުރުވެރިން ވަނީ ޒިޔާރަތްކޮށްފަ އެވެ.