އަހަރުގެ އެންމެ ހިތްގައިމު ޖަޒީރާ މަންޒިލްގެ އެވޯޑް ރާއްޖެއަށް

އިންޓަނޭޝަނަލް ޓްރެވަލް އެވޯޑްސްގެ މިއަހަރުގެ އެންމެ ހިތްގައިމު ޖަޒީރާ މަންޒިލްގެ އެވޯޑް ރާއްޖެއަށް ލިބިއްޖެއެވެ.

މި އެވޯޑު ރާއްޖެއަށް ލިބުމާ ގުޅިގެން އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވީ އެމްއެމްޕީއާރުސީގެ ޓީމާއި ފަތުރުވެރިކަމުގެ ދާއިރާގައި މަސައްކަތް ކުރައްވާ ހުރިހާ ބޭފުޅުންވެސް ދިވަހިރާއްޖެއަކީ އެންމެ ރައްކާތެރި އަދި މަޤުބޫލް މަންޒިލްގެ ގޮތުގައި ދެމެހެއްޓުމަށް ގިނަ މަސައްކަތްތަކެއް ކުރަމުންދާކަމަށެވެ. އަދި މިފަދަ އެވޯޑްތަކަކީ މި މަސައްކަތްތަކުގެ ކާމިޔާބީގެ ހެއްކެއްގެ ގޮތުގައި އޭނާ ވަނީ ވިދާޅިވެފައެވެ.
މި އެވޯޑުގެ ފަނޑިޔާރުކަން ކުރައްވާފައިވަނީ އެކިއެކި ދާއިރާއިން ހުނަރާއި ތަޖުރިބާ ލިބިވަޑައިގެންފައިވާ ބޭފުޅުންނެވެ. މިޓީމުން ވަނީ ގިނަ ވަގުތުތަކެއް ހޭދަކޮށްގެން ފަރުވާތެރިކަމާއެކު، އެވޯޑަށް ނޮމިނޭޓްވި ކޮންމެ ފަރާތެއްވެސް މުރާޖާކޮށް ބަލައި ފާސްކޮށްފަ އެވެ. ކޮންމެ އަހަރަކުވެސް މި އެވޯޑްތައް ލިބޭ ފަރާތްތަކަށް އިސްތިހާރު ކުރުކުރުމުގެ އެތަކެއް ފުރުސަތުތަކެއް ހުޅުވެއެވެ.

advertisement

އިންޓަނޭޝަނަލް ޓްރެވަލް އެވޯޑްސް އިންތިޒާމްކޮށްފައިވަނީ ކޭ.އެސް.އޭ ޓޫރިޒަމް މާކެޓިންގ އެންޑް ޕީ.އާރް ކޮމްޕެނީގެ ފަރާތުންނެވެ. މި ކުންފުންޔަކީ ދުނިޔޭގެ ފެންވަރުގައި 5000 ގްލޯބަލް ފަތުރުވެރިކަމުގެ ބްރޭންޑް އިޝްތިހާރު ކުރުމުގައި 10 އަހަރަށް ވުރެ ގިނަ ދުވަހުގެ ތަޖުރިބާ ލިބިފައިވާ ކުންފުންޔެކެވެ.

އަދި މިއީ ފަތުރުވެރިންގެ އިތުރުން މި ސިނާއަތުގައި މަސައްކަތް ކުރާ ފަރާތްތަކުގެ މެދުގައި މަގުބޫލުކަން ހޯދައިފަވާ ކުންފުންޏެކެވެ. މިގޮތުން މިއެވޯޑްތަކަށް ނޮމިނޭޓް ވެފައިވާ މީހުންނަށް 100000އަށް ވުރެ ގިނަ ފަތުރުވެރިން އަދި މި ދާއިރާގެ މާހިރުން ވޯޓް ލާފައިވެއެވެ.
ކޯވިޑް19 ގެ ހާލަތުގައިވެސް ބައިނަލްއަޤްވާމީ އެކިއެކި މާކެޓްތަކުގައި ރާއްޖެ އިޝްތިހާރުކުރުމަށް އެމްއެމްޕީއާރުސީން ވަނީ ގިނަ މަސައްކަތްތަކެއް ކޮށްފައެވެ. އެގޮތުން 22 މާކެޓަށް ޙާއްސަކޮށްގެން412  ހަރަކާތެއް ވަނީ ހިންގާފައެވެ. މީގެތެރެއިން 47 ހަރަކާތެއް މިހާރުވެސް ކުރިއަށްދާކަމަށް އެމްއެމްޕީއާރުސީން ބުނެއެވެ. 314 ހަރަކާތަކީ ކޯވިޑް19 ގެ ކާރިސާގެ ތެރޭގައި ހިންގާފައިވާ ހަރަކާތްތަކެކެވެ.