ޖަނަވަރީ 1 ވަނަ ދުވަހު ވަކި ގަޑިތަކެއްގައި ވެހިކަލް ދުއްވުން މަނާ

ޖެނުއަރީ 1 ވަނަ ދުވަހުގެ ހަވީރުގެ ވަކި ވަގުތެއްގައި މާލެ އާއި ވިލިމާލޭގެ މަގުތަކުގައި ވެހިކަލް ދުއްވުން މާލޭ ސިޓީ ކައުންސިލުން މަނާކޮށްފި އެވެ.

އެ ކައުންސިލުން ބުނީ ޖެނުއަރީ މަހުގެ ފުރަތަމަ ދުވަސްވާ ހުކުރު ދުވަހު، ހަވީރު 4 އިން ރޭގަނޑު 8 އަށް، މާލެ އާއި ވިލިމާލޭގެ މަގުތަކުގައި އިންޖީނުލީ އުޅަނދު ދުއްވުން މަނާވާނެ ކަމަށެވެ. އެގޮތަށް ހަމަޖެއްސީ، އާއްމު ރައްޔިތުންނަށް ހިތްހަމަޖެހުމެއް ގެނެސްދިނުމަށްޓަކައި ކަމަށް ކައުންސިލުން ބުނެއެވެ.

advertisement

އާ އަހަރުގެ ފުރަތަމަ ދުވަހު އާއްމު އުޅަނދުތަކަށް ދުއްވުން މަނާ ކުރި ނަމަވެސް ބައެއް އުޅަނދުތައް އިސްތިސްނާވެ އެވެ. އޭގެ ތެރޭގައި ހިމެނެނީ ސަލާމަތީ ބާރުތަކުގެ އުޅަނދުތަކާއި އެމްބިއުލާންސާއި ހާއްސަ އެހީއަށް ބޭނުންވާ މީހުންގެ ސައިކަލާއި ބަހުގެ ހިދުމަތުގެ އިތުރުން، ހާއްސަ ހުއްދައެއްގެ ދަށުން ދުއްވާ އުޅަނދުތަކެވެ.

ސިޓީ ކައުންސިލްގެ މި އެންގުމާ ޚިލާފުވާ ފަރާތްތައް ޖޫރިމަނާ ކުރާނެ ކަމަށްވެސް އެ ކައުންސިލުން ވަނީ ބުނެފައެވެ. ހާއްސަ ދުވަސް ދުވަހާ ގުޅިގެން، މާލޭގައި ބައެއް ވަގުތުތަކަށް ވެހިކަލް ދުއްވުން މީގެކުރިންވެސް ބައެއް ފަހަރު ވަނީ މަނާކޮށްފައެވެ.