މިދިޔަ އަހަރު ރާއްޖެއަށް ޒިޔާރަތްކުރީ 555213 ފަތުރުވެރިން

މިދިޔަ އަހަރު ރާއްޖެއަށް 555213 ފަތުރުވެރިން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީން ހާމަކޮށްފިއެވެ. އަދި ބޯޑަރު ހުޅުވާލިފަހުން ރާއްޖެއަށް ޒިޔާރަތްކޮށްފައިވަނީ 172366 ފަތުރުވެރިންނެވެ.

ކޯވިޑް19 ގެ ސަބަބުން 2020 ވަނަ އަހަރު މުޅި ދުނިޔޭގެ ފަތުރުވެރިކަމަށް ހީނަރުކަން އައި އަހަރެކެވެ. ރާއްޖޭގެ ފަތުރުވެރިކަން ހުއްޓި ބޯޑަރުވެސް މިދިޔަ އަހަރު ވަނީ ބަންދުކޮށްފައެވެ. ރާއްޖެ އަންނަ ފަތުރުވެރިންގެ އަދަދު ފުރަތަމަ ފަހަރަށް ސުމަކަށް ވަނީ ވެއްޓިފައެވެ. ފަތުރުވެރިކަމުން 2020 ވަނަ އަހަރު ނަފާއެއް ނުލިބޭނެކަމަށް ބެލެވުނުނަމަވެސް ބޯޑަރު އަލުން ހުޅުވައި އެޅި ރައްކާތެރިކަމުގެ ފިޔަވަޅުތަކުގެ ސަބަބުން ރާއްޖޭގެ ފަތުރުވެރިކަން ވަނީ ރަނގަޅުވާން ފަށާފައެވެ.
ބޯޑަރު ހުޅުވާލި ޖުލައިމަހު ރާއްޖެއަށް އައިސްފައިވަނީ 1701 ފަތުރުވެރިންނެވެ. އަދި އޮގަސްޓުމަހު 7628 ފަތުވެރިޔަކު ރާއްޖެ ޒިޔާރަތްކޮށްފައިވެއެވެ. އަދި ސެޕްޓެމްބަރުމަހު ރާއްޖެއަށް އައިސްފައިވަނީ 9538 ފަތުރުވެރިންނެވެ. އޮކްޓޫބަރުމަހު ރާއްޖެއަށް 21515 ފަތުރުވެރިން ޒިޔާރަތްކޮށްފައިވާއިރު، ނޮވެމްބަރުމަހު ރާއްޖެއަށް ވަނީ 35759 ފަތުރުވެރިން ޒިޔާރަތްކޮށްފައެވެ. އަދި ޑިސެމްބަރުމަހު ރާއްޖެއަށްވަނީ ގިނަ އަދަދަކަށް ފަތުރުވެރިން ޒިޔާރަތްކޮށްފައެވެ. އެގޮތުން ޑިސެމްބަރ މަހު ރާއްޖެ އައިސްފައިވަނީ 96225 ފަތުރުވެރިންނެވެ. މިއީ ބޯޑަރު ހުޅުވާލި ފަހުން އެއް މަސް ދުވަސްތެރޭ އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވާ މަހެވެ.

advertisement

ރާއްޖޭ ބޯޑަރު ހުޅުވާލިފަހުން އެންމެ ގިނަ ފަތުރުވެރިން ރާއްޖެ އައިސްފައި ވަނީ، ރަޝިޔާއިންނެވެ. ރަޝިޔާއިން 31800 ފަތުރުވެރިޔަކު ރާއްޖެ ޒިޔާރަތްކޮށްފައިވެއެވެ.