ފަތުރުވެރިންނަށް ޙިދުމަތްދިނުމުގެ ހުއްދަ މިހާތަނަށް 257 ގެސްޓްހައުސްއަކަށް ދީފި

ރާއްޖޭގައި އޮޕަރޭޓްކުރާ 257 ގެސްޓްހައުސްއެއް އަލުން ހުޅުވުމުގެ ހުއްދަ ޓޫރިޒަމް މިނިސްޓްރީން ދީފިއެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މީގެތެރޭގައި ހިމެނެނީ ގްރޭޓަރ މާލެ ސަރަހައްދުގެ 36 ގެސްޓްހައުސްއަކާއި އަތޮޅުތަކުގެ 221 ގެސްޓްހައުސްއެކެވެ. ރާއްޖޭގެ އެކި ސަރަހައްދުން 257 ގެސްޓްހައުސްއެއް މިހާރު ހުޅުވާފައިވާއިރު މި ހުރިހައި ގެސްޓްހައުސްއެއްގެ ބެޑް ކެޕޭސިޓީ ވަނީ 5028 އަށް އަރާފައެވެ.

12 އަތޮޅަކުން 39 ރަށެއްގައި ގެސްޓްހައުސްތައް މިހާރު ހުޅުވާފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތައް ދައްކައެވެ. އެންމެ ގިނަ ގެސްޓްހައުސް މިހާތަނަށް ހުޅުވާފައިވަނީ ކ. އަތޮޅުންނެވެ. އެގޮތުން ގްރޭޓަރ މާލެ ސަރަހައްދު ހިމެނޭގޮތުން މާލެ ސަރަހައްދުގެ 9 ރަށެއްގެ ގެސްޓްހައުސްތައް ވަނީ އަލުން ހުޅުވާފައެވެ. އެއީ 118 ގެސްޓްހައުސްއެވެ. މި 118 ގެސްޓްހައުސްއާއިއެކު ކ. އަތޮޅުގައި ފަތުރުވެރިންނަށް ޙިދުމަތްދޭ އެނދުގެ އަދަދު ވަނީ 2888 އަށް އަރާފައެވެ.

advertisement

އަތޮޅުތެރޭގެ ގެސްޓްހައުސްތައް ހުޅުވުމުގެ ހުއްދަ ޓޫރިޒަމް މިނިސްޓްރީން ދީފައިވަނީ މިދިޔަ އަހަރުގެ އޮކްޓޯބަރމަހުގެ 15 ވަނަ ދުވަހުއެވެ. އަދި މާލެ ސަރަހައްދުގެ ގެސްޓްހައުސްތައް ހުޅުވުމުގެ ހުއްދަ ދިނީ މިދިޔަ ޑިސެމްބަރ މަހުގެ 14 ވަނަ ދުވަހުއެވެ.

މާލެ ސަރަހައްދުގެ ގެސްޓްހައުސްތައް ހުޅުވުމުގެ ހުއްދަ ދިނުން ލަސްވީ މި ސަރަހައްދުގައި ކޯވިޑް19 ގެ ކޮމިއުނިޓީ ސްޕްރެޑްއެއް އޮތުމުގެ ސަބަބުންނެވެ. މާލެ ސަރަހައްދުގެ ގެސްޓްހައުސްތައް ހުޅުވައި ޙިދުމަތްދޭން ފެށުމާއިއެކު ރާއްޖޭގައި ފަތުރުވެރިންނަށް ޙިދުމަތްދޭ ހުރިހާ ފެސިލިޓީތައް ހުޅުވުމުގެ ހުއްދަ ވަނީ ލިބިގެންގޮސްފައެވެ.

ކޮންމެ ރަށެއްގެ ގެސްޓްހައުސްއެއް ހުޅުވުމުގެ ކުރިންވެސް ވަކި ހާއްސަ އެސްއޯޕީއެއް، އެ ގެސްޓްހައުސްއަކުން ޓޫރިޒަމް މިނިސްޓްރީއަށް ހުށައަޅަންޖެހެއެވެ. ޓޫރިޒަމް މިނިސްޓްރީން ހުއްދަ ދެނީ މި އެސްއޯޕީތަކަށް ބެލުމަށްފަހުގައެވެ.

އެޗްޕީއޭއިން އެންމެފަހުން ކަނޑައަޅާފައިވާ ގައިޑްލައިންގައިވާ ގޮތުން ރާއްޖޭގެ ގެސްޓްހައުސް ހިންގާ ރަށްރަށުގެ މީހުން ބޭރަށްދާއިރު މާސްކް އެޅުމަކީ މަޖުބޫރުކަމެކެވެ. އަދި ބޭރަށް ނިކުމެއުޅޭއިރު އިޖްތިމާއީ ގައިދުރުކަން އެކަކު އަނެކަކާއި ދެމެދު ބަހައްޓަންޖެހެއެވެ.