މިއަހަރުގެ މިހާތަނަށް ރާއްޖެއައި ފަތުރުވެރިންގެ އަދަދު ވަނީ އިތުރުވެފަ

މިއަހަރުގެ މިހާތަނަށް ރާއްޖެއައި ފަތުރުވެރިންގެ އަދަދު އިތުރުވަމުންއަންނަކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮން މިއަހަރުގެ ފުރަތަމަ 3 ވަހު ރާއްޖެއައި ފަތުރުވެރިންގެ އަދަދު ދުވަހަކުން ދުވަހެއް ވަނީ އިތުރުވެފައެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ ފުރަތަމަ 3 ދުވަހު ރާއްޖެއަށް 10,360 ފަތުރުވެރިން ވަނީ ޒިޔާރަތްކޮށްފައެވެ. ޖަނަވަރީ މަހުގެ 1 ވަނަ ދުވަހު ރާއްޖެ އައިސްފައިވަނީ 2005 ފަތުރުވެރިންނެވެ. ނަމަވެސް ޖެހިގެންއައި ދުވަހު ރާއްޖެއައި ފަތުރުވެރިންގެ އަދަދު 2 ގުނަ އިތުރުވެ 4160 އަށް ވަނީ އަރާފައެވެ. އަދި ޖަނަވަރީ މަހުގެ 3 ވަނަ ދުވަހު ރާއްޖެ އައީ 4195 ފަތުރުވެރިންކަމަށް ޓޫރިޒަމް މިނިސްޓްރީގެ ތަފާސްހިސާބުތައް ދައްކައެވެ.

އަހަރުގެ ފުރަތަމަ 3 ދުވަހު ރާއްޖެއަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ ރަޝިއާއިންނެވެ. އެއީ 3226 ފަތުރުވެރިންނެވެ. 2 ވަނައަށް އެންމެ ގިނަ ފަތުރުވެރިން ރާއްޖެ އައީ ޔޫކްރެއިންއިންނެވެ. އެއީ 979 ފަތުރުވެރިންނެވެ. 778 ފަތުރުވެރިންނާއިއެކު 3 ވަނައަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ އިންޑިއާއިންކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

advertisement

މިދިޔަ އަހަރުގެ ފުރަތަމަ 3 ދުވަހު ރާއްޖެ އައިސްފައިވަނީ 16،203 ފަތުރުވެރިންނެވެ. އެހެންކަމުން ކޯވިޑް19 ގެ މިހާލަތުގައި ރާއްޖެއަށް 10،360 ފަތުރުވެރިން ރާއްޖެ އައުމަކީ މިއަހަރު ފަތުރުވެރިކަމުން ކުރެވޭ އުންމީދު ބޮޑުވެގެންދާ ކަމެކެވެ.

ރާއްޖޭގައި މިވަގުތު ފަތުރުވެރިންނަށް ޙިދުމަތް ދިނުމަށް 541 ފެސިލިޓީއެއް އަންނަނީ އޮޕަރޭޓްވެސް ކުރަމުންނެވެ. މި ފެސިލިޓީތަކާއިއެކު ބެޑް ކެޕޭސިޓީ ވަނީ 41000 އަށްވުރެ އިތުރުވެފައިކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. މީގެތެރޭގައި ރިސޯޓް، ސަފާރީ، އަދި ގެސްޓްހައުސްތައް ހިމެނެއެވެ.