މާރޗް މަހު ކައުންސިލް އިންތިހާބު ނުބޭއްވޭނެކަން ޔަޤީންވެއްޖެ

މާރިޗް މަހު ބާއްވަން މަސައްކަތްކުރި ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިހާބު ނުބޭއްވޭނެކަން ޔަޤީންވެއްޖެއެވެ. ކައުންސިލް އިންތިހާބު ނުބޭއްވޭނެކަން ޔަޤީންވެފައިވަނީ ރާއްޖޭގައި އިއްވާފައިވާ ކުއްލި ނުރައްކަލުގެ މުއްދަތު އިތުރުކުރުމާއި ގުޅިގެންނެވެ.
ކޯވިޑް-19ގެ ސަބަބުން ލޯކަލް ކައުންސިލްތަކުގެ އިންތިޚާބު ފަސްކުރުމަށް ކަނޑައަޅައި ރައްޔިތުންގެ މަޖިލީހުން ފާސްކުރި ޤާނޫނުގައިވާގޮތަށް މާޗްމަހުގެ ކުރީކޮޅު އިންތިޚާބު ބާއްވަން އިލެކްޝަންސް ކޮމިޝަނުން އައީ މަސައްކަތްކުރަމުންނެވެ.
އަންނަ މާޗް މަހުގެ 6ވަނަ ދުވަހު އިންތިޚާބު ބޭއްވޭނީ މިހާރު އޮތް ކުއްލިނުރައްކަލުގެ ހާލަތު އުވާލައިފިނަމަ ކަމަށާއި، ނަމަވެސް ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގެ މުއްދަތު މިއަދު އިތުރަށް ދިގުދަންމާލުމުން އެމުއްދަތުގައި ދެން އިންތިޚާބު ނުބޭއްވޭނަކަމަށް އިލެކްޝަންސް ކޮމިޝަނުންގެ ރައީސް އަޙްމަދު ޝަރީފްވެސް ވަނީ ވިދާޅުވެފައެވެ.

ކައުންސިން އިންތިޚާބު ބޭއްވުމަށް އެންމެ ފުރަތަމަ ތާވަލްކޮށްފައިވަނީ 2020ވަނަ އަހަރުގެ އޭޕްރިލްމަހުގެ ތެރޭގައެވެ. ނަމަވެސް ކޯވިޑް-19ގެ ބަލިމަޑުކަމާއެކު ރާއްޖެ އެއްކޮށް ލޮކްޑައުން ކުރުމާގުޅިގެން އިންތިޚާބު ވަނީ މުއްދަތެއް ނެތްގޮތަށް ފަސްކޮށްފައެވެ. އަދި އިންތިޚާބާބެހޭ ޚާއްސަ ޤާނޫނެއް އެކުލަވާލައި އައު އިންތިޚާބެއް ބާއްވައި ހުވާކުރުމާ ހަމައަށް މިހާރު ތިބި ކައުންސިލަރުން ތިބޭގޮތަށް ޤާނޫނަށްވަނީ ބަދަލު ގެނެސްފައެވެ.

advertisement