ކޯވިޑް19 އިން އަރައިގަތުމަށް އީޔޫ އަދި ޑަބްލިއުއެޗްއޯ އިން ރާއްޖެއަށް އެހީވެދީފި

ކޮވިޑް-19 ގެ ސަބަބުން ރާއްޖެ އަށް ލިބިފައިވާ ގެއްލުންތަކުން އަރައިގަތުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އާއި ޔޫރަޕިއަން ޔޫނިއަން (އީޔޫ) ގުޅިގެން އެއްމިލިއަން ޔޫރޯގެ އެހީ ދީފިއެވެ.

މި އެހީ ބޭނުން ކުރާނީ ކޮވިޑް ޖެހޭ މީހުން ބެލެހެއްޓުމުގެ ކަންތައްތައް މިހާރަށް ވުރެ ހަރުދަނާ ކުރުމަށެވެ. ދެ ޖަމިއްޔާ ގުޅިގެން ދޭ މި އެހީގެ ދަށުން، އައިސީޔޫގައި ބައިތިއްބައިގެން ދޭ ފަރުވާގެ ފެންވަރު ރަނގަޅު ކުރަން އިސްކަމެއް ދޭނެ ކަމަށް ޑަބްލިއުއެޗްއޯ އިން ބުނެއެވެ.

advertisement

މި އެހީގެ ތެރޭގައި ބޭހާއި ސިއްޙީ ދާއިރާގައި ބޭނުންކުރާ ތަކެތީގެ އިތުރުން މެޑިކަން ފެސިލިޓީތަކަށް ބޭނުންވާ ބައެއް ސާމާނި ހިމެނެއެވެ. އަދި ރާއްޖޭގެ ކޯވިޑް-19 ބަލިމީހުންނަށް ފަރުވާދޭ އައިސީޔޫއަށާއި އެހެން ބައެއް ފެސިލިޓީތަކަށް ބޭނުންވާ ތަކެތިވެސް ހިމެނެއެވެ. ރާއްޖޭގެ ކޯވިޑް-19ގެ ހާލަތު ދަށަށް ދިޔަ ނުދީ ހިފެހެއްޓުމަށާއި ރެޕިޑް ރެސްޕޮންސް ޓީމަށް ބޭނުންވާ އެހީވެސް ވަނީ ޑަބްލިއު.އެޗް.އޯއިން ފޯރުކޮށްދީފައެވެ.

އީޔޫ އިން ރާއްޖެ އާއި ސްރީލަންކާ އަށް ކަނޑައަޅާފައިވާ އެކްޓިން އެމްބެސެޑަރު އެޗްއީ ޑެނިސް ޗައިބީ ވިދާޅުވީ ރާއްޖެ އަށް މާލީ އެހީ ދިނުމަކީ މި ބަލިމަޑުކަމުން އަރައިގަންނަން އެކި ގައުމުތަކަށް އީޔޫ އިން ވަމުން އަންނަ އެހީތަކުގެ ތެރޭގައި ހިމެނޭ ކަމެއް ކަމަށެވެ.

އީޔޫ އާއި ޑަބްލިއުއެޗްއޯ އިން ރާއްޖެ އަށް ވަމުން އަންނަ އެހީތެރިކަމަށް ހެލްތު މިނިސްޓަރު އަހުމަދު ނަސީމް ވެސް ޝުކުރު އަދާކުރެއްވި އެވެ.