ރާއްޖެއިން ޕާކިސްތާނަށް ދަތުރުކުރާއިރު ކޯވިޑް އަށް ޓެސްޓް ހަދަން ނުޖެހޭގޮތް ހަދައިފި

ރާއްޖެއިން އަވަށްޓެރި ޕާކިސްތާނަށް ދަތުރުކުރާ މީހުން އެޤައުމަށް އެތެރެވުމުގެ ކުރިން ކޯވިޑް-19ގެ ޓެސްޓު ހަދަން ނުޖެހޭގޮތަށް ހަމަޖައްސައިފިއެވެ.

ޕާކިސްތާންގެ ސިވިލް އޭވިއޭޝަން އޮތޯރިޓީން މިދިޔަ އަނގާރަދުވަހު ވަނީ އެޤައުމަށް އެތެރެވާއިރު، ކޯވިޑް-19ގެ ޓެސްޓުގެ ނަތީޖާ ހުށަހަޅަން ނުޖެހޭ ވަކި ޤައުމުތަކެއް ކަނޑައަޅާފައެވެ. މި ޤައުމުތައް ވަނީ އޭ، ބީ އަދި ސީ ކެޓަގަރީއަށް ބަހާލާފައެވެ.

ކެޓަގަރީ އޭގައި ހިމެނޭ ޤައުމުތަކުން ޕާކިސްތާނަށް ދަތުރުކުރާއިރު ޕީސީއާރު ޓެސްޓުގެ ނަތީޖާ ހުށައަޅާކަށް ނުޖެހެއެވެ. ރާއްޖެ ހިނެނެނީ ކެޓަގަރީ އޭ ގައެވެ. ރާއްޖޭގެ އިތުރުން މި ކެޓަގަރީގައި 23 ޤައުމެއް ހިމެނެއެވެ. އޭގެތެރޭގައި އޮސްޓްރޭލިއާއާއި ނިއުޒިލެންޑާއި ފިންލޭންޑާއި ސިންގަޕޫރު، ސައުތު ކޮރެއާ ވަނީ ހިމަނާފައެވެ.
ކެޓަގަރީ ބީގައި ހިމެނޭ ޤައުމުތަކުން ދަތުރުކުރާ މީހުން 96 ގަޑިއިރު ނުވާ ޕީސީއާރު ޓެސްޓެއްގެ ނަތީޖާ ހުށަހަޅަންޖެހެއެވެ.
ކެޓަގަރީ ސީ ގައި ހިމެނޭ ޤައުމުތަކުން ޕާކިސްތާނަށް އަންނަ މީހުން ދަތުރުކުރުމުގެ ކުރިން ޕީސީއާރު ޓެސްޓެއް ހަދަން ޖެހެއެވެ. އަދި ޕާކިސްތާނަށް އެތެރެވުމަށްފަހުވެސް ޕީސީއާރު ޓެސްޓު ހަދަން ޖެހޭނެކަމަށް ޕާކިސްތާންގެ ސިވިލް އޭވިއޭޝަން އޮތޯރިޓީން ހާމަކުރެއެވެ. ކެޓަގަރީ ސީގައި މިވަގުތު އެއްވެސް ޤައުމެއް ހިމަނާފައެއް ނުވެއެވެ.

advertisement