އަހަރުގެ ފުރަތަމަ ހަފްތާގައިވެސް ރާއްޖެއަށް 20،000 އަށްވުރެ ގިނަ ފަތުރުވެރިން

މިއަހަރުގެ ފުރަތަމަ 7 ދުވަސްތެރޭ ރާއްޖެއަށް 20612 ފަތުރުވެރިން އައިސްފައިވާކަމަށް ތަފާސް ހިސާބުތަކުން ދައްކައިފިއެވެ.
މި އަހަރުގެ ފުރަތަމަ 7 ދުވަސްތެރޭ ރާއްޖެއަށް 20 ހާހަށްވުރެ ގިނަ ފަތުރުވެރިން އައިސްފައިވާއިރު، މިއީ ބޯޑަރު އަލުން ހުޅުވާލިފަހުން މިދިޔަ ޖުލައި، އޮގަސްޓު އަދި ސެޕްޓެމްބަރ ރާއްޖެއަށް އައި ޖުމްލަ ފަތުރުވެރިންގެ އަދަދަށްވުރެ އިތުރު އަދަދެކެވެ.

ތަފާސް ހިސާބުތައް ދައްކާގޮތުން އޯކްޓޫބަރުމަހު ރާއްޖެއަށް 21515 ފަތުރުވެރިން އައިސްފައިވެއެވެ. ނޮވެމްބަރުމަހު ރާއްޖެއަށް 35759 ފަތުރުވެރިން އައިސްފައިވާއިރު، ޑިސެމްބަރުމަހު ރާއްޖެއަށް އައިސްފައިވަނީ 96225 ފަތުރުވެރިންނެވެ.

މިއަހަރުގެ މިހާތަނަށް 4195 ފަތުރުވެރިންނާއިއެކު އެއްދުވަހެއްގައި އެންމެ ގިނަ ފަތުރުވެރިން ރާއްޖެ އައީ މިމަހުގެ 3ވަނަ ދުވަހުއެވެ.

މިއަހަރުގެ ފުރަތަމަ ހަތް ދުވަހު އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީ ރަޝިއާއިންނެވެ. އެޤައުމުން ރާއްޖެއަށް 5331 ފަތުރުވެރިން އައިސްފައިވެއެވެ. ރަޝިއާއަކީ މިދިޔަ އަހަރުވެސް ރާއްޖެއަށް ގިނަ އަދަދަކަށް ފަތުރުވެރިން އައި ޤައުމެކެވެ.

މިއަހަރުގެ މިހާތަނަށް 2 ވަނަ އަށް އެންމެ ގިނަ ފަތުރުވެރިން ރާއްޖެ އައިސްފައިވަނީ އިންޑިއާއިންނެވެ. އެއީ 1816 ފަތުރުވެރިންނެވެ. ތިންވަނައަށް އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީ ޔޫކްރެއިންއިންނެވެ. އެގޮތުން މިއަހަރުގެ ފުރަތަމަ 7 ދުވަހުގެ ތެރޭ ޔޫކްރެއިންއިން ރާއްޖެއަށްވަނީ 1779 ފަތުރުވެރިން އައިސްފައެވެ.

advertisement

މިއަހަރުގެ ފުރަތަމަ 7 ދުވަހު ރާއްޖެއަށް 20612 ފަތުރުވެރިން އައިނަމަވެސް މިއީ މިދިޔަ އަހަރުގެ މި މުއްދަތާއި އަޅާ ބަލާއިރު 44.4 އިންސައްތަ ދަށް އަދަދެކެވެ. މިދިޔަ އަހަރުގެ ފުރަތަމަ 7 ދުވަސްތެރޭ ރާއްޖެއަށްވަނީ 37048 ފަތުރުވެރިން އައިސްފައެވެ.