ކޯވިޑް19 ގެ އެންމެ އަލާމާތެއް ފެނުނަސް މިހާރު ޓެސްޓްކުރަންޖެހޭ

ކޮވިޑް-19 އިން އާންމުކޮށް ފެންނަ އަލާމާތްތަކުގެ ތެރެއިން އެންމެ އަލާމާތެއް ފެނުނަސް އެ މީހަކު ބައްޔަށް ޓެސްޓުކުރަންޖެހޭ ގޮތަށް ކޮވިޑް-19 ގެ ޑިފިނިޝަން ބަދަލުކޮށްފި އެވެ.

މިދިޔަ އަހަރުގެ ޖޫން މަހު ރިވައިޒްކުރި ކޮވިޑް-19 ގެ ކޭސް ޑެފިނިޝަން ރާއްޖޭގައި މި ބަދަލުކުރީ ކޮވިޑްގެ އާ ވޭރިއަންޓް ތަކާ އެކު ދުނިޔޭގެ ސިއްހަތު ޖަމިއްޔާއިން ވެސް އެ ބަލީގެ ޑެފިނިޝަން ބަދަލުކޮށްފައިވާތީ އެވެ. އާ ކްރައިޓީރިއާ އެޗްޕީއޭ އިން ވަނީ އާއްމުކޮށްފަ އެވެ.

advertisement

އާ ޑެފިނިޝަންގައި ވާ ގޮތުން ކޮވިޑަށް ޝައްކުރެވޭ އަލާމާތެއް ކަމަށް ބަލާ ކަންތައްތަކުގެ ތެރެއިން އެންމެ ކަމެއް ހުއްޓަސް އެއީ ބައްޔަށް ޝައްކުކުރެވޭ މީހެއްގެ ގޮތުގައި ކަނޑައަޅަން ޖެހޭނެ އެވެ. ކޯވިޑް19 ގެ އަލާމާތްތަކުގެ ތެރޭގައި ކެއްސުން، ހުން އައުން، ނޭވާކުރުވުން އަދި ވަސް ނުދުވުން ނުވަތަ ރަހަނުލުން ހިމެނެއެވެ.

މީގެ އިތުރުން ބޮލުގައި ރިއްސުމާއި، ކަރުގައި ރިއްސުމާ އެކުގައި ނޭފަތުން ފެން އައުން ނުވަތަ ވަރުބަލިވުމާ ހުން އައުން ފަދަ ދެ ކަމެއް އެކުގައި ވުމަކީ ވެސް ކްލިނިކަލް ގޮތުން ކޮވިޑަށް ޝައްކުކުރެވޭ މީހެއް ކަމަށް ބަލަން ޖެހޭ ހާލަތެކެވެ.

އެޕިޑެމިއޮލޮޖިކަލް ކްރައިޓީރިއާގެ ގޮތުގައި ބަލާނީ ބަލި ފެތުރުމުގެ ނުރައްކާ އޮތް ތަނަކަށް 14 ދުވަހުގެ ތެރޭގައި ދަތުރުކޮށްފައި ވުމާއި، އެފަދަ ސަރަހައްދަކުން އަންނަ މީހަކާ ބައްދަލުވެފައި ވުމާއި، ސިއްހީ ހިދުމަތްދޭ ތަނަކަށް ޒިޔާރަތްކޮށްފައިވުން ނުވަތަ އެފަދަ ތަނެއްގައި މަސައްކަތް ކޮށްފައިވުމެވެ.

އެޗްޕީއޭ އިން ނެރުނު ބަޔާނުގައި ބުނެފައިވަނީ ކޯވިޑަށް ޝައްކުރެވޭ ނުވަތަ ޕްރޮބަބްލް ކޭސްއެއްގެ ގޮތުގައި ބެލެވޭ އެއްވެސް މީހަކު އެ ބައްޔަށް ޓެސްޓް ނުކޮށް ދޫ ނުކުރުމަށެވެ.