ސްކޫލަށްދާން ދަރިފުޅު ތައްޔާރުތަ؟

ކޮވިޑް-19އިގެ ސަބަބުން ދުނިޔެ ހުއްޓުމަކަށް އައުމަށްފަހު، މި ބައްޔާއެކު އުޅެން ދަސްކޮށް އާންމު ދިރިއުޅުމާއިގެން ކުރިއަށް ދިޔުމުގެ މަސައްކަތްފަށާފައި ވާއިރު، މި ބަލީގެ ސަބަބުން ދިރިއުޅުމުގެ އާދަތަކަށް ކުރިމަތިކުރުވި ބަދަލުތަކުގެ އަސަރު އެންމެ ބޮޑަށް ތަހަންމަލުކުރަން ޖެހުނު އެއްބަޔަކީ ކުޑަކުދިންނެވެ. ސްކޫލްތަކުގެ ދަރިވަރުންނެވެ. މިއަދަކީ ދިވެހިރާއްޖޭގައި ބަންދުކުރި ސްކޫލްތަކުގެ ދޮރުތައް އެ ދަރިވަރުންނަށް ހުޅުވާލާ ދުވަހެވެ. ބައެއް ކުދިންނަށް މިއީ އެތައް މަސްތަކެއްފަހުން، އެ ކުދިންގެ ދިރިއުޅުމުގެ ބޮޑުބަޔެއް ހިއްސާކުރި ރަހުމަތްތެރިންނާއި، މުދައްރިސުންނާ ބައްދަލުވާ އުފާވެރި ދުވަހަކަށް ވީ ނަމަވެސް، ޤަބޫލުކުރަން ޖެހޭ ހަގީގަތަކީ އެތައް ދުވަހަކު ގެބަންދުގައި ތިބުމަށްފަހު މީހުންގެ ތެރެއަށް ނުކުންނައިރު އިތުރު އިހުސާސްތަކެއް ހުރުން އެކަށީގެންވާނެ ކަމެވެ.

ގިނަ ދުވަސްތަކަކަށްފަހު ސްކޫލަށް ނުކުންނައިރު ބެލެނިވެރިން ވިސްނަންޖެހޭ ގިނަ ކަންތައްތަކެއް އެބަހުއްޓެވެ.

advertisement

އެންމެ ފުރަތަމަ ކަމަކީ ދަރިފުޅު ސުކޫލަށް ދިޔުމާމެދު ހިތްނުތަނަވަސްވެ، ޖެހިލުންވާގޮތް ވުމަކީ މައްސަލައެއްނޫންކަން އަމިއްލަ އަށް ގަބޫލުކުރުމާއެކު ދަރިފުޅަށް ވިސްނައިދިނުމެވެ. އާންމު ހާލަތްތަކުގައިވެސް ޗުއްޓީއަށްފަހު އައު އަހަރަކަށް ސްކޫލަށް ދާންފެށުމަކީ ދަރިވަރުންނަށް ހާސްކަންވެސް ގެނުވާކަމެއްކަމަށް ދިރާސާތަކުން ދައްކައެވެ. އެހެންކަމުން މިހާރު ކުރިމަތިވެފައިވާ ޕެންޑެމިކްގެ ސަބަބުން މި ހާސްކަން އިތުރުވުން ގާތްއިރު، ސްކޫލަށް ދިޔުމާމެދު ހިތްހަމަ ނުޖެހުން ފާޅުކުރާނަމަ، އެއީ ކިޔަވާ ހިތްނުވާތީ ނުވަތަ ކިޔެވުން މަތިން ފޫހިވާތީ ބުނާ އެއްޗެއްކަމުގައި ނިންމުމުގެ ބަދަލުގައި، ދަރިފުޅަށް ހާސްކަން މެދުވެރިކުރުވާ ސަބަބާމެދު ދަރިފުޅާ ވާހަކަދެއްކުން ހިޔާރުކުރާށެވެ.   

ގިނަ ދުވަސްތަކެއްފަހުން އަލުން ސްކޫލަށްދާއިރު މާސްކު އަޅަންޖެހުމާއި، އެންމެ ގާތް ރަހުމަތްތެރިންނާ ގައިދުރުކަން ބަހައްޓަންޖެހުމަކީވެސް ކުޑަކުދިންނަށް ނަގައިގަންނަން ދަތިކަންކަމަށް ވުމަކީވެސް ހާސްކަން މެދުވެރި ކުރުވާކަމަކަށް ވުން އެކަށީގެންވެއެވެ. އެހެންކަމަށްވާނަމަ، ގައިދުރުކަން ބަހައްޓަމުންވެސް ރަހުމަތްތެރިންނާ އޮންނަ ގާތްކަން ދެމެހެއްޓުމަށް ކުރެވިދާނެ ކަންކަމާމެދު ވާހަކަދެއްކިދާނެއެވެ. އެގޮތުން ދުރުގައި ތިބެގެން ކުޅެވޭނެފަދަ ގޭމްތައް ބުނެދީ، ސްކޫލްމާހައުލުގައި ދުޅަހެޔޮކަމާއެކު ގުޅުންބަދަހިކުރެވޭނެ ގޮތްތައް ކިޔައިދެވިދާނެއެވެ.

އަދި ސްކޫލްތަކުގައި ކޮވިޑް ފެތުރުން ހުއްޓުވުމަށް ގާއިމުކޮށްފައިވާ ވަސީލަތްތަކާމެދު ދަރިފުޅާ ވާހަކަ ދެއްކުމާއި، އަތްދޮވުމާއި، ކެއްސާ ކިނބިހި އަޅާއިރު ނޭފަތާއި އަނގަ ނިވާކުރުމުގެ މުހިންމުކަމާމެދު ވާހަކަ ދެއްކުމަކީވެސް، ދުނިޔެއަށް ކުރިމަތިވެފައިމިވާ ހާލަތުގެ ސަބަބުން ކުރިމަތިވާ ހާސްކަމަށް އެހީތެރިވެދޭނެ ކަމެކެވެ. ހާއްސަކޮށް ކެއްސާ ކިނބިހި އަޅާއިރު އަމަލުކުރާނެ ގޮތާއި، އަތްދޮންނަ ގޮތް ދަސްކޮށްދިނުން މުހިންމެވެ. ސްކޫލްތަކަކީ މުދައްރިސުންގެ އިރުޝާދުތައް އަޑުއަހާ ގަަބޫލުކުރާނަމަ ސްކޫލަކީ ގެއެކޭ އެއްފަދައިން ރައްކާތެރިތަނަކަށް ވާނެކަން ހަނދާންކޮށްދިނުމަކީވެސް އެހީއަކަށް ވާނެ ކަމެކެވެ.

މާސްކުއެޅުމާމެދު ދަރިފުޅު ހިތްހަމަނުޖެހުން ފާޅުކުރާނަމަ، ބޮޑުމީހެއްގެ ހައިސިއްޔަތުންވެސް މާސްކް އަޅައިގެން އުޅުމުގެ އުނދަގޫކަން އަމިއްލައަށް އިހުސާސްވާވަރު ދަރިފުޅަށް ބުނެދޭށެވެ. އަދި އުނދަގުވާކަންކަމާއި ހާސްވާ ކަންކަމާމެދު ވާަހަކަ ދެއްކުމުގެ މުހިންމުކަން ހަނދާންކޮށްދިނުމާއެކު، ކުޅެ، ދުވެ ހަދާއިރު މާސްކު އެޅުމަކީ އެންމެ ފަސޭހަ ގޮތަށް ނުވި ނަމަވެސް، ގަވާއިދުތަކަށް ބޯލެނބުމުގެ މުހިންމުކަން ކިޔައިދޭށެވެ. މާސްކްއަޅަށް ޖެހުމުން ދަތިވި ނަމަވެސް ދަރިފުޅާއި އެހެންމީހުންގެ ސަލާމަތަށްޓަކައި މަންމަ ނުވަތަ ބައްޕަ މާސްކްް އަޅައިގެން އުޅޭކަން ހަނދާންކޮށްދޭށެވެ. އެގޮތުން މުޖުތަމައުގަ އެންމެންގެ ރައްކާތެރިކަމަށް ހެދިފައިވާ އެހެން ގަވާއިދުތަކާއި އެ ގަވާއިދުތަކަށް ހުރުމަތްތެރިކޮށް ހިތުމުގެ ނަތީޖާއާއި މުހިންމުކަން ކިޔައިދޭށެވެ.   

އޮންލައިންކޮށް ބައި އަހަރެއްހާ ދުވަސް ކިޔެވުމަށްފަހު އަލުން ކްލާހަށް ފޮނުވާއިރު މި ކަންތައްތަކުގެ އިތުރުން، އެންޒައިޓީ ނުވަތަ ސްޓްރެސްގެ އެހެން އަލާމާތްތަކަށް ސަމާލުވާށެވެ. މި ހާލަތުގައި ހާސްކަމާއި ކަންބޮޑުވުމަކީ އެންމެންވެސް އިހުސާސްކުރާ އާންމު ކަމެއްކަމާއި، މައްސަލައެއް ނޫންކަން ވިސްނައިދިނުން މުހިންމެވެ. އަދި ގިނަގިނައިން ކުދިންނާ ވާހަކަދެއްކުމާއި، ކުދިންގެ އިހުސާސްތައް ދެނެގަތުމަށް މަސައްކަތްކުރުމާއެކު، ދެރަވުމާއި ރުޅިއައުންފަދަ އިހުސާސްތަކަކީ އެކަމާމެދު ލަދުގަންނަންޖެހޭ އިހުސާސްތަކަކަށް ނުހަދައި، އެއީ ދުޅަހެޔޮގޮތުގައި ފާޅުކުރެވޭނެ އިހުސާސްތަކެއްކަން އަންގައިދިނުމަކީ ބެލެނިވެރިއްގެ ހައިސިއްޔަތުން މިވަގުތު އެކުދިންނަށް އެހީތެރިވެދެވޭނެ އެންމެ ރަނގަޅުގޮތެވެ.