މިދިޔަ އަހަރު ހެއްދީ 13،600 ޕާސްޕޯޓް، މިއީ %70 ދަށްވުމެއް

މިދިޔަ އަހަރު ޕާސްޕޯޓް ހެއްދީ 13،600 މީހުން ކަމަށް އިމިގްރޭޝަނުން ބުނެފި އެވެ.
އިމިގްރޭޝަނުން ބުނީ 2019 ވަނަ އަހަރު ހެއްދި ޕާސްޕޯޓަށްވުރެ މިދިޔަ އަހަރު ޕާސްޕޯޓް ހެއްދި މިންވަރު 70 ޕަސެންޓް ދަށްވެފައިވާކަމަށެވެ. 2019 ވަނަ އަހަރު 51،900 ޕާސްޕޯޓް ޕްރޮސެސް ކޮށްފައިވެ އެވެ. އިމިގްރޭޝަނުން ބުނީ، މިދިޔަ އަހަރު ޕާސްޕޯޓު ހެއްދުން އެހާ ބޮޑަށް މަދުވީ ދަތުރުފަތުރު ކުރުން ހުއްޓި، ކޮވިޑާ ގުޅިގެން ގިނަ ދުވަސްތަކަކަށް އޮފީސް ބަންދުކޮށްފައި ހުރުމުގެ ސަބަބުން ކަމަށެވެ.
މިދިޔަ އަހަރު ޕާސްޕޯޓުގެ އިތުރުން 39 ޕާސްޕޯޓް ކާޑު ވެސް ހައްދައިފައިވެ އެވެ. ރާއްޖޭގައި މިހާރު ބޭނުން ކުރާ ޕާސްޕޯޓަކީ މި ސަރަހައްދުގައި ވެސް އެންމެ ވަރުގަދަ އެއް ޕާސްޕޯޓެވެ. ވިސާ ހޯދުމެއް ނެތި ރާއްޖޭގެ ޕާސްޕޯޓުގައި 85 ގައުމަށް މިހާރު ދަތުރު ކުރެވެ އެވެ.
2020 ވަނަ އަހަރު އެވަރެޖްކޮށް ދުވާލެއްގެ މައްޗަށް 37 ޕާސްޕޯޓް ހައްދާފައިވާއިރު، 2019ވަނަ އަހަރު އެވަރެޖްކޮށް ދުވާލަކު ހައްދާފައިވަނީ 283 ޕާސްޕޯޓްކަމަށް އިމިގްރޭޝަންގެ ތަފާސްހިސާބުތަކުން ދައްކައެވެ.
މާލޭ ހެޑް އޮފީސް މެދުވެރިކޮށް 2019ވަނަ އަހަރު 51955 ޕާސްޕޯޓް ހެއްދިނަމަވެސް މިދިޔަ އަހަރު ހައްދާފައިވަނީ 9836 ޕާސްޕޯޓެވެ. ކުއްލި ޙާލަތުގައި މިދިޔަ އަހަރު ޕާސްޕޯޓް ހައްދާފައިވަނީ 94 މީހުންނެނެވެ. 2019ވަނަ އަހަރު ކުއްލި ޙާލަތުގައި 269 ޕާސްޕޯޓް ވަނީ އިމިގްރޭޝަނުން ދޫކޮށްފައެވެ. 2020ވަނަ އަހަރު 39 ޕާސްޕޯޓް ކާޑު ހައްދާފައިވެއެވެ. އަދި ތަރޑް ޕަރޓީ އެޕްލިކޭޝަންގެ ގޮތުގައި 2932މީހުން ޕާސްޕޯޓް ހެއްދުމަށް ހުށައަޅާފައިވެއެވެ.

މިދިޔަ އަހަރު އަތޮޅުތަކުގައި ހުރި އިމިގްރޭޝަންގެ ސްޓޭޝަންތަކުން ހައްދާފައިވާ ޕާސްޕޯޓުގެ އަދަދަކީ 800 އެވެ. ނަމަވެސް 2019 ވަނަ އަހަރު މި އަދަދު ހުރީ 15408 ގައެވެ. އަތޮޅުތަކުން ޕާސްޕޯޓް ހެއްދެނީ ސ.ހިތަދޫ، ފުވައްމުލައް، ހދ.ކުޅުދުއްފުށި އަދި ހއ.ދިއްދޫ އިންނެވެ.

advertisement